[dropcap]Л[/dropcap]аргсса алхIаткьини МахIачкъалалив Редуктор поселокрай­сса ттуплий буккай майданнив хьунни аьдатравун дагьсса «Лакку улклул Кубок» тIисса футболданул турнир тIитIлатIисса шадлугъ.

Зулайхат Тахакьаева
[dropcap]Д[/dropcap]акIнийн бутан, турнир дуллалиссар «Гъази-Гъумучи» жяматийсса фондрал сипталийну ва лак­рал шаннагу райондалул кабакьаврийну. Турнирданул агьаммур мурадну мунил сакиншинначитал ккаклай бия, так лакрал районная бакъассагу, цайми-цайми кIанттурдаятуссагу лакрал жагьилтал цачIунмай баву, ми цIуллусса оьрмулухух гьан баву. ХIакьину жущава дакI дарцIуну учин бюхълай бур, чулийн бувкссар ми мурад­ру куну.

Цанчирча чялишну хIала бувххунни му агьамсса давривух жула жагьилтал. МукьцIалуннийн дирсса футболданул командартту сакин хьунни. Ляхъан дунни цала-цала командарттал гербру. Хъирив нанисса никиран кIул хьунни ттинин къакIулну диркIсса лакрал щархъурду, дустал хьунни кувннащал кув, дакIру мачча хьунни. Мунивух гьурттушинна дурунни Москавлийсса лакрал жагьилтурал ккурандалулгу. Дагъусттаннаймур къуртал шайхту, тих тайнналгу байссар вава журалул Кубок, ацIраксса шяраваллал командар­тту гьурттусса.
Жагьилтурал дакIурдивусса гъира-гьавасгу чIалай, цурда турнирданул агьамшивугу дурчIлай, ца хъуннасса хъар цайнна ларсунни Илиясовхъал кулпатрал, ххув хьуминнансса бахшишру цала чулуха дуллансса. Утти сакиншинначитуралгу ва турнир хас дуллай бур Сиражуттин Илиясовлул завалун. Ванал арсурваврал бусласимунийн бувну, гьашинусса Кубокрай бахшиширттал фонд дусса дур 350 азарда къуруш.

[dropcap]Т[/dropcap]урнир тIиртIунни ссуттил «Лакку улклул Лига» турнирданий ххув хьусса Хъусращиял ва кIилчинмур кIану бувгьусса Къяннал командарттал тIуркIулийну. Муний ххув хьусса Хъусращиял командалун Сиражуттин Илиясовлул Супер-Кубок булаврия дайдирхьунни шадлугъ.

Хъусращиял командалул капитан Сулайман Чаллаев буслай ур ца миллатрал байрандалийн кунма бачайшиву цала командалул жагьилтал гьарцагу бигьалагай кьини ва турнирданийн, муний гьур­ттуми бакъасса, командалухлу буклакимигу, тамашалийн букIлакIимигу. КIицI лавгунни гьашину турнирданий цалчин гьуртту хъанай бушиву ттинин командалуву букIлай бивкIминнах бурган буклай бивкIсса жагьилтал. «Учин ччай бур ва турнирданул спортрах гъира бусса цIусса ник тарбия дурссар куну. Му бакъарив турнирданул тIайлабацIугу, мунил ялун бучIантIимур бушиврул барашиннагу», — увкунни
Сулайманнул.

[dropcap]М[/dropcap]уний гьуртту хьунни ДР-лул БакIчинал ва ХIукуматрал администрациялул управлениялул каялувчи Артур Исрапилов, «Гъази-Гъумучи» фондрал хъунама АьвдурахIин Дибиров, Халкьуннал Мажлисрал депутатътал Амирхан Амирханов ва Камил Давдиев, Ккуллал райондалул администрациялул бакIчи Шамил Рамазанов, Шяраваллил хозяйствалул министерствалул управлениялул каялувчи Эмил Ттаттаев, ишбаражанчи ХIасан Аьлиев ва чIявусса цаймигу.

АьвдурахIин Дибировлул кIицI лавгунни спортрахун, хасну футболданухун, машхулсса жагьилтал тIайласса ххуллия бигьану ба­къаччайшиву. Цанчирча футболданул хасият кьянкьа дуллалиссар ва миннал оьннасса чIун мюнпатиран ишла дуллалиссар. Жагьилтал кувннащал кув ччя-ччяни хьунабакьлакьиссаксса, дусшивугу цIакь шайссар. Барчаллагь увкунни чIарав бацIлацIиминнахь.

— Зун зунмавагу ттигу бувчIин бувассар миха-тиха бивщусса лак­рал щархъал жагьилтал цачIунмай бан зура цуксса хъуннасса даву ду­л­лалиссарув. Жул, оьрмулул бугьараминнал, яла хъунмур мурад мури – жагьилтал цачIу бушиву. Цанчирча миллатрал ялун бучIантIимур жагьилсса никирал кIунттихьри бусса. Жагьилтал цачIу бухьурча, миллатгу цассар. Цашивруву кьуватгу буссар, — увкунни Сиражу­ттин Илиясовлул.

Сакиншиндарал комитетрал член Халипа ТIагьировлул бувсунни гьашину турнирданий гьуртту хъанай душиву Лакрал, Ккуллал, ЦIуссалакрал, Ахъушиял ва Рутуллал районнал 36 шярава дурксса 38 команда.

Гьуртту хъанахъимигу, тамашалийн бавтIмигу кувннахь кув ххарину буслай бия турнир сававну ни­ттил мазрайсса гъалгъагума ишла хьуссар тIий. Цамур бакъахьурчагу, ниттил мазрайсса гъалгъа баянма цуксса къахъинни жунмагу, жула оьрчIангу гьарца бигьалагай кьини ва кIанттайн бучIаван тIий.
ТIайлабацIу баннав зун, жагьилтал!