[dropcap]М[/dropcap]артрал 10-нний Уфа шагьрулий жулла «Ан­жи» команда футболданул майданнай данди дарцIунни миналул «Уфа» командалущал.

Руслан Къардашов
Цалчинмур таймрал дайдихьу хьунни командарттал кIул буллай тIуркIулул бияла щил кIунттихь буссарив. Цал «Уфа» командалул махъ най, таймрал ахир «Анжилул» кьянкьасса жаваб дуллай хьунни. Бакьайми голлугу хьунни кIилчинмур таймрай. ТIуркIулул 53-мур минутIрай жула гьужумчи Лес­канол къапулул мурцIнийн гьан бувсса ттуп «Уфалул» къапучи Беленовлул байщун бувунни. Цаппарава минутIирттава жула командалул къапулуву хъамалу бан багьунни «Уфа» командалул гьужумчи Никитиннул архния бивщуну гьан бувсса ттуп.
Хъунма хIал къалавгун, «Анжилул» гьужумчи Лесканоща бювхъунни майданналул зумания гьан бувсса ттуп бакIрах ишан дурну тIайла буккан «Уфалул» къапулувун. «Анжи» ххари хьунсса минутIрал муттавагу къавхьунни, цаннил хъирив ца кIива гол «Уфа» командалул бавкьунни жулла командалул къапулувун. Тай футболданий буклай, жулами, чIирацI бавцIуну, тайннай тамаша буллалисса хханссия.

ТIуркIулул ливчIсса манзилданий футболданул майданнай «Анжилул» шама футболист ахха­на увну, хIарачатгу бивхьуну, ца гол бакьин бювхъунни. Ахиргу 3:2 счетрайну ва тIуркIу къуртал хьунни.

«Анжилул» хъиривмур тIуркIу хьунтIиссар Кас­пийс­калий мартрал 17-нний «Тосно» командалущал. Билетру уквассар, бухьхьияра тамаша бан, жуламиннал чIарав бацIан. Ва тIуркIулул кка­ккан бантIиссар, дуссарив «Анжилухь» ялунчIилгу Аьрасатнал премьер-лигалуву гьуртту хьун­сса каши.

«Уфа» — «Анжи» — 3:2
Голлу: Никитин, 57 (1:0). Лескано, 64 (1:1). Пауревич, 65 (2:1). Йокич, 67 (3:1). Полуяхтов, 81 (3:2).
«Уфа»: Беленов, Йокич, Салатич, Сысуев, Живоглядов, Пауревич, Тумасян (Никитин, 35), Фатаи (Еркебулан, 46; Аликин, 89), Неделчару, Стоцкий, Табидзе.

«Анжи»: Лория, Данченко (Прудников, 90+2), Армаш (Будковский, 79), Брызгалов, Самарджич, Полуяхтов, Антон, Хубулов (Калмыков, 72), Бакаев, Маркелов, Лескано.