[dropcap]Л[/dropcap]аргсса нюжмардий Гъумучиял школалий хьунни ДР-лул КIулшиву дулаврил министерствалул дуллалисса мюрщими классирттал дуклаки оьрчIал ахттаршиннардал конкурс «Ччи­ккул тIутIи» («Первоцвет»).

Гьуртту хьунни урчIва школалиясса 3-4-ми классирттал оьрчIру. Миннал ахттаршиннардал давур­тту дия «Ттул чIиви миллатрал тарих», «Аьрасатнал тарих», дуру­ххаврий, кIунулий даврил ва щащаврил ва цаймигу темардан хас дурсса.

«Ттул чIиви миллатрал тарих» темалийн дагьайсса конкурсрай цалчинмур кIану бувгьунни Аюбова ХIабибатлул (Гъумучиял школа, каялувчи С. Саидова). Аьра­сатнал тарихрайн дагьайсса яла ххуймур даву дия Къушиева Баянатлул (ГьунчIукьатIрал школа, каялувчи Тамара Ибрагьимова). Дуруххаврил, кIунулий даврил ва щащаврил яла ххуйми давуртту дия Жалаева Сонял ва Шихаьлиева Наргизлул (ШавкIуллал школа).

Яла хьхьичIунма чIиви конструктор хьунни Аьбдуллаев Сяъдуллагь (Ккурккуллал школа, каялувчи Д. ХIусманова). «ТIабиаьт – творчествалул щаращир» тIимур конкурсрай хьхьичIунсса давур­тту дия Сулайманова ХIабибатлул (Хьурттал школа, каялувчи С. Ванатиева), Исрапилова Каринал (КIундиннал школа, каялувчи К. МахIаммадова).
Ххув хьуми барчагу бувну, бахшишру дуллуна КIулшиву дулаврил управлениялул каялувчи Явсупи ХIамзаевлул.

Ва конкурс ххюлчинни райондалий дуллалисса. Гьарца шинал райондалул дуклаки оьрчIал хьхьичIунсса кIанттурду бугьай­ссар республикалул конкурсирттайгу. Ахттаршиннардаха зун гъира бусса мюрщултгу шиная шинайн чIяву хъанай бур.

ХIадур бувссар
Зулайхат Тахакьаевал