МахIачкъалалив халкь луттирду ккалаккаврихун бичаву мурадрай, библиотекардаву дакъасса журалул давуртту дуллай бакъар, луттирдал выставкардая тIайла хьуну, личIи-личIисса конкурсирттайн, викторинардайн бияннин.

Июньдалул 15-16-нний хьунни «Дагъусттаннал цIуллушиву дуруччаву: хIакьмур ва лябуккулул стратегия» цIанилусса республикалул форум. КIира кьини ххал бигьлай бия цIуллушиву дуруччаврил ва медициналул тагьарданул агьамсса масъалартту.

Июньдалул 19-нний ДР-лул ХIукуматрал Председательнал 1-ма хъиривчу Рамазан Аьлиевлул каялувшиврулу ххал бивгьунни «ДР-лий чIири бизнес ва цивппалу зузисса ишбажаранчишиврул сипталуцIун кабакьаву» тIисса приоритетсса проект дузрайн дуккан дуллалаврил масъала.

Закатрал ссaxI (Зака-туль фитр) булун буржлувссар гьарца муъминчу ва муъминщар.

Июнь зурул 16-нний Москавлив, Рамазан зурул чятирдануву, дунни Лакрал кьини. Москавливсса жагьилтурал (ММОЛ «Лакия») хIарачатрайну, чятирдануву зума итадакьин цачIун бавтIунни Москавлив ва областьрай яхъанахъисса лакрал агьлу.

Республикалул муфтиятрал мизитирттал имамтурайн тапшур бунни агьалинан бувчIин буллан Зумаритавал байрандалий, кувннал кув барча буллай, бахшишру дуллалаву – му чара бакъа дуван аьркинсса даву дакъашиву.

ДР-лул ХIукуматрал Председатель Аьбдуссамад ХIамидовлул муниципалитетирттал бакIчитурайн тапшур бунни капремонтрахсса взносру ратIаву гьарза дан. Тапшур баву дунни «ЖКХ-2017» тIисса республикалул форумрал чIумал.

МахIачкъалаллал юбилей кIицI лагантIисса сентябрь зуруйннин шагьрулий щириркIуну най дур давуртту. КIичIиртту, скверду, паркру бакьин буллалаврицIун, ми чIюлу буллансса композицияртту, арт-объектругу дихьлай бур.

Яла чIявусса цIу ларчIсса ишру хъанахъисса дунияллул ххюра хIукуматравух Аьрасатнал билаятгу бур. ЦIу ларчIсса кIанттурдай оьрмулуцIа хьусса инсантурал ккал хIисав дурну, жува хьхьичIва-хьхьичI буру.