Муфтиятрал баян бунни

Республикалул муфтиятрал мизитирттал имамтурайн тапшур бунни агьалинан бувчIин буллан Зумаритавал байрандалий, кувннал кув барча буллай, бахшишру дуллалаву – му чара бакъа дуван аьркинсса даву дакъашиву.

«Жу бахшишру дуллалаврий къадагъа дихьлай бакъару, дуван бучIиссар, амма, ваца цуманал цукунсса бахшишру дувайрив ккак­лай, бяст-ччал баян бувсса кунма, булукьай. Укунмур ишираятуру махъаллил хьияра, кувнначIан кув бувххун, хъамалу шаврийну гьашиву дувара тIисса. Лайкьсса бахшиш ласунсса каши дакъами оьр­мулул бугьарасса инсантал барча буван къалаглан бикIай, канил дугьанмур дакъа, ламусну. Мюрщисса оьрчIан дуллалисса нацIу-кьацIулул хIакъиравурив, оьрчIру ххари бан, ми дуллуну хъинссар, му гьарманал цала ишри», — тIий ур муфтийнал кумагчи МахIаммад МахIаммадов.
Соцсетирдайгу тамансса бусравсса инсантал бур, нацIу- кьацIулул кьуцуртту бачIаву гьа­ссар, цамур цичIав пишкаш дуллан­сса чара бакъашиву дакъар, цаннал каши духьурча, гаманал дакъар, дакъама гъагъан увансса иш хъанай бур тIий.