МахIачкъалалив халкь луттирду ккалаккаврихун бичаву мурадрай, библиотекардаву дакъасса журалул давуртту дуллай бакъар, луттирдал выставкардая тIайла хьуну, личIи-личIисса конкурсирттайн, викторинардайн бияннин.

Уттигъанну хъуншагьрулул Кировуллал райондалул Мажлисрал депутат Тимур Аьлиевлул ва МахIачкъалаллал ЦБС-рал хъунмур Зулпат Ушановал сипталий хъунмур библиотекалул хьхьичIсса майданнив литературалул скамейка бивхьунни. Му цуппагу бувну бур муххая, кIукIлусса кIаралугу бивхьуну. Скамейкалул чулухсса къуршилува лавсун, гикку щяивкIманаща бюхъантIиссар уквасса лу буккин. Гьарманаща бюхъантIиссар цалами луттирдугу, цайминналгу буккиншиврул, гиву бишин. Ванийн бувну хъуншагьрулул библиотекалуща бюхълахъиссар махъ ппурттуву жагьилтурал дянив сийлийсса «буккроссинг» машгьур дуван.
Тимур Аьлиевлул бусаврийну, скамейка бан ванан дакIнийн багьну бур ца шинал хьхьичI «Библионочь» тIисса акциялувух гьуртту хьуну махъ.
«Микку ттун ккавккуна цала шеърирду, хаварду ккалаккисса гьунар бусса чIявусса жагьилтал. Мукун ттул бакIравугу хIасул хьуна литературалул скамейка бансса пикри. Укунсса скамейка бусса бур Гамбурграйгу. Жугу язи бугьарду тикку кунмасса жучIавагу бишин. ЧIал къавхьуну ванила чIарав укунсса цамургу бансса пикрилий буру»,-буслай ур депутат.
Зулпат Ушановагу барчаллагьрай бур ванайн укунсса даву дан дакIнийн багьаврихлу ва умудрайгу бур ттинин жула хъуншагьрулий къадурсса «бахшиш» халкьунналгу кьадру-кьимат буну, ххарину кьамул даншиврийн.

З. АьбдурахIманова