Июньдалул 19-нний ДР-лул ХIукуматрал Председательнал 1-ма хъиривчу Рамазан Аьлиевлул каялувшиврулу ххал бивгьунни «ДР-лий чIири бизнес ва цивппалу зузисса ишбажаранчишиврул сипталуцIун кабакьаву» тIисса приоритетсса проект дузрайн дуккан дуллалаврил масъала.
Рамазан Аьлиевлул бусаврийн бувну, 2017-2020 шиннардийнсса проектрал мурад бур региондалий чIири ва дянив ишбажаранчишиврул предприятияртту 2000-даксса гьарза даву, миннувату 672 – гьашину, мукунма 2500-нничIан бивсса зузи кIанттурду дузал баву (гьашину – 700). Мукунма бувсунни дурсса давурттал хIакъиравугу. ДР-лул чIири ва дянив ишбажаранчишиврул субъектирдал микрофинансированиялул фондрал дуллуну дур 39,5 млн. къурушрансса 36 микрозайм. Кредитру итадакьаврил фондрал – 98,4 млн. къурушрансса кредитру.
Январь-май зурдардий чIири ва дянив бизнесрал предприятиярттая ДР-лул бюджетравун дуркIун дур 620,5 млн. къуруш налогирттал (вара чIумал дукIу – 549,2 млн. къуруш).
ХIадур бувссар
ХI. Аьдиловлул
