УрчIттурша вакил гьурттусса форум

Июньдалул 15-16-нний хьунни «Дагъусттаннал цIуллушиву дуруччаву: хIакьмур ва лябуккулул стратегия» цIанилусса республикалул форум. КIира кьини ххал бигьлай бия цIуллушиву дуруччаврил ва медициналул тагьарданул агьамсса масъалартту.

ХIасан Аьдилов
Форумрай гьуртту хьунни медициналул организациярдал, Аьрасатнал ЦIуллушиву дуруччаврил министерствалул ФОМС-рал, ДГМА-лул ва цаймигу медициналул идарарттал 900-ннияр ливчусса вакилтал.
Форумрай ккаккан дунни Да­гъусттаннай махъсса 3 шинал мутталий хьусса хьхьичIуннай­ши­вурттаясса кино.
Яла махъ лавхъунни ДР-лул БакIчи Рамазан АьбдуллатIиповлул. Ганал бусаврийн бувну, 4 шинай республикалий бувну бур 70-ннияр ливчусса медициналул идарартту, республикалул азарханарду кIура бавну бур ттизаманнул медициналул предприятиярттайн миннул каялувчитурал хIарачатрайну. 2012 шинал Дагъусттаннай цавагу къабувну бивкIссар лавайсса даражалул технологиялул операция, дукIу ми бувну бур 3 азарунния ливчусса. Вилттили оьрчIру литIаву лап чан хьуну дур.
Махъ лавхъунни Аьрасатнал Минздраврал мониторинграл ва анализрал отделданул хъунмур Марина Кочневал. Ганил був­ккунни ведомствалул каялувчи Вероника Скворцовал форумрайн бавтIминнахь аьла-ссалам буллалисса чагъар.
Дагъусттаннал цIуллушиву дуруччаврил министр Танка Ибрагьимовлул бувсунни экономикалул кризисрал шиннардий таман­сса давуртту дурну душиву. Мунал бусаврийн бувну, гьануми приоритетру хьуссар медициналул кумаг чIявуссанначIа ишлану бушиву ва му лахъсса даражалий буллай бушиву, хаснува гьан-бучIан захIматсса районнай, медициналул идарар­тту техникалул, кьай-кьуйрал дузал баву, информациялул технология зузи даву. ХIакьину республикалий зий ур 53 азаллий 398 медициналул зузала, миннавату 10 азара – хIакин. 2013 шиная шинмай республикалий буллай бур АМП. (Высокотехнологическая медицинская помощь).
Форумрай ихтилат бунни Аьра­сатнал Минздраврал травматологиялул ва ортопедиялул Аьрасатнал НИИ-рал директор Рашид Тигьиловлул. Ганал бусаврийн бувну, яла захIматми цIуцIавуртту, патологияртту думи най бур Ухссавнил Ккавкказнавату.
Муния махъ Дагъусттаннал яла ххуйми хIакинтуран дуллунни наградартту. Хъиривмур кьини форум буллай бия 6 секциялийх бавчIуну.