Щалла дунияллий Туризмалул кьини кIицI лагайсса сентябрьданул 25-нний Дарбантливсса Сулайман Стальскийл цIанийсса паркраву «ШашликI – 2016» цIанилусса республикалул фестиваль хьуну дур.
З. АьбдурахIманова
Дагъусттаннай яла нахIумур шашликI дувул цIа ласун бястлий дурккун дур 19 команда. Вайннувух гьуртту хьуну бур МахIачкъалалиясса ва Дарбантлиясса ресторатортал, Ахттиял, Ахвахуллал, МахIарамккантуллал, Гъуниннал, Дахадаевуллал, Бущихъиял, Гумбетуллал, Къизлардал, Дарбантуллал, Тарумовкаллал, Къайтагъуллал, Агъуллал ва цаймигу районнаясса вакилтал. Гьуртту хьуну дур мукунна фермертурал хозяйстварттал ва шяраваллил хозяйствалул кооперативирттал Ассоциациялул чулухасса командагу.
Дарбантливсса дуки-хIачIиялул шадлугърай гьуртту хьуну бур жула билаятрайсса Китайнал посольствалул вакилтал ва Бакуясса, Уфалиясса, Ярославраясса, Москавлиясса, Красноярскалиясса, Ставрополлаясса, Санкт-Петербурграясса туристътал ва федерал СМИ-рдал журналистътал.
Фестиваль тIитIлатIисса шадлугърай гьуртту хьуну бур Дарбантуллал бакIчи Малик Багълиев, Кьиблалийсса территориал округрал ялувсса Республикалул БакIчиначIасса вихшаласса вакил Аьли Хасбулатов, ДР-лул туризмалул ва халкьуннал художествалул промыслирдал министр МахIаммад Исяев.
— ХIакьину аьвзалзаманнул Дарбантуллал аьрщарай «ШашликI – 2016» фестиваль дайдихьлай буру. Ккавкказуллай яла машгьурсса ва дукиялул фестиваль тарихрал Дарбантлив дан дакIнийн багьаву агьамсса ишри. Дурусну ца шинал хьхьичI жува буссияв Дарбантуллан 2000 шин хъанахъисса юбилей дуллай. Ва шинал дяниву жува мукIру хьуру Дарбантуллая мяйжаннугу Ккавкказнаву туризмалул вирдакI дуван бюхъантIишиврий. Республикалул БакIчи Рамазан АьбдуллатIиповлул жул хьхьичI бивхьуну буссар ца мурад – Дарбантуллая культуралул ва тарихрал, этнографиялул ва хьхьирил зуманий халкь бигьалагай туризмалул центр бувансса, — тIий ур М. Исяев.
Жюрилул яла нахIуми шашликIрал заллу ххал уллалиссаксса хIаллай паркраву къавтIий, балайрду тIий, личIи-личIисса конкурсру, тяхъашивуртту най диркIун дур.
Жюрилуву гьурттуну бивкIун бур «Дагестан» РГВК-лул гендиректор Елена ТIагьирова, журналист МахIаммад Салтинский, халкьуннансса дуки-хIачIиялул объектирдал Ассоциациялул хъунама ХIусайн Жанбеков, «Орион» машлул сетьрал бренд-шеф Гоги Базандарашвили ва цаймигу.
Жюрилул циняр шашликIру ва миннухунсса соусру ххал дурну махъ хIукму хьуну бур «Яла нахIумур соус» тIисса номинациялуву цалчинмур кIану булун МахIачкъалаливсса «Вейнерский сад» тIисса ресторандалул вакилтуран, кIилчинмур – Дарбантуллал райондалийсса «Мамедкала» кафелул цIигьуртуран (повартуран) ва шамилчинмур кIану – Гъуниннал райондалиясса повартуран.
Яла ххуйну хъамаллурал хьхьичIун дуккан дайсса дукра чIюлу-кьюлу дан ккаккан бувну бивкIсса номинациялуву ххув хьуну бур Къизлардал райондалиясса повартал, кIилчинмур кIанттай бур «Вейнерский сад» ресторандалул повартал ва шамилчинмур кIану буллуну бур Гъуниннал райондалун.
«Мусил шампур – 2016» тIисса агьаммур бахшишран лайкь хьуну бур «У фонтана» тIисса Дарбантливсса ресторан. Арцулмунин лайкь хьуну ур «Вейнерский сад» ресторандалул шашликI дуву ва чарвитул шампур лавсун бур Ахттиял райондалиясса повартурал.
«Тост-драйв» тIисса махъ лахъаврил номинациялуву ххув хьуну ур Дарбантуллал райондалиясса Тарлан Алекберов. Туризмалул министерствалул чулуха ванан бахшишран буллуну бур арцул кьуру.
ШашликIирттал цалчинмур фестивальданий кIиазараксса инсан гьуртту хьуну ур. Ванил сакиншинначитурал бусаврийну, ялунчIинсса шадлугърай гьуртту хьун оьвчин тIий бусса бур чил хIукуматирттаясса кулинартурайнгу.
