Ларгсса нюжмардий МахIачкъалалив най диркIсса «Тарки-Тау» луттирдал ярмарка-выставкалул лагрулий хьунни хъинну ххуйсса, оьрмулул дянивсса ва бугьарасса буккултран дакъа, ялун нанисса жула жагьилмур никирангу ххира хьусса личIи-личIисса конкурсру, суратирттал выставкарду, флешмобру ва цIуну бувксса луттирдал презентациярду.
Выставкалул сакиншинначитурал цала тамашачитуран хIадур дурну дия цIусса луттирдал автортуращалсса хIазсса хьунабакьавуртту ва жагьилмур никирахь миллатирттал багьу-бизулия, культуралия, аьдатирттая бусласисса конкурсру. Дия мукунна хъинну агьамсса, хIакьину луттирду бищаврил ва баххаврил аралуву цIюрувкьусса масъалартту, буруккинну ххал бигьлагьисса батIавурттугу най.
З. АьбдурахIманова
Вай гьантрай Миллатрал библиотекалуву луттирдацIун дархIусса цумур-цагу мероприятие къананисса мурцIу бакъая. Цалчинмур зивулий, масалдаран, най дия мяйцIаллаксса издательстварттал луттирдащал кIул буллалисса ярмарка, кIилчинмур зивулий – презентацияртту ва конкурсру, лувчIиннийсса зивулийгу МахIачкъалаллал магьирлугърал школардал дуклаки оьрчIал суратирттал выставка дия.
ХIукуматрал чулухасса вакилталгу гьурттуну выставка тIиртIусса шадлугърал хъирив, цала гьунарду ккаккан бувуна МахIачкъалаллал ОьрчIал художествалул школалул дуклаки оьрчIал ва цаппара вузирдал студентътурал. Ва кьини вайннал магьирсса каруннал чагъардания, яннардая, бурчуя ва цаймигу материаллая дурсса лаххи-ликкиялувусса, чIявучин кIулсса магьравасса, луттирдавасса геройтал, рухI дуркIун, цал архIал шиккун бувкIсса хханссия. Бия вайннавух Дагъусттаннал миллатирттал магьравасса караматсса урша-варакъащалсса аьнтIикIахъул ва янна-ярагъуннил балгусса виртталгу.
Ва проектрал сакиншинначитурал пикрилий, миллатирттал литература тамашалун дуккан дурсса кIанай миннал лаххи-ликкия машгьур дуллалаву тIайлассар. Жула оьрчIан, ялун нанисса никиран кIулну бикIан аьркинссар жула ппухълуннал таний лахлай, канай, ишла дуллай бивкIмуния.
Мура кьини журналист-международник, телеведущий Николай Баратовлул «Кулинарное путешествие по Дагестану» тIисса луттирал презентациягу хьунни. Луттирал автор ур жунма чIявучин кIулсса «Барбекю» журналданул сакиншинначигу. Дагъусттаннал миллатирттал яла нахIуми дукрардал тIин-тIааьндалул хъирив лаллай, хъуннасса даву цачIун дурсса ва лу тамашалун буккан бувсса «Дагъусттан» издательствалул экспозициялий хьусса презентациялий «Тарки-Тау» выставкалул сакиншинначи Марат ХIажиевлул бувсунни авторнан лу сакин бан цукун дакIнийн багьссарив ва му буккултрачIан биян бан цалла дурсса гьурттушиннарая.
— Николай Баратовлул лу сакин баврийну Дагъусттаннан дурунни цала чулухасса хъуннасса бахшиш. Гьай-гьай, ва ца инсаннаща дан бюхъайсса даву дакъая. Лу сакин бавриву щуруй дуссия фотографтурал, художниктурал ва личIи-личIисса пишакартурал команда. На навагу, художник хIисаврай, гьуртту хьура му сакин бавриву, амма дайдихьулий нава ци дуллай, ссаха зий ивкIссарив къакIула. Утти тIурча, пахрулий ура ва даврин ттущавагу чансса бухьурчагу кумаг бан бюхъаврия.
Луттирал авторналгу аьч бунни Дагъусттаннаясса, шиккусса миллатирттал аьдатирттаясса, дукра-къюссуясса, хъамалушиннараясса асарду. Бувсунни республикалул щархъавунсса аьрххирдая.
— Дагъусттаннайн ттул хьунни 7-8 аьрххи. Гьар увкIтари ттунна хъамалушиндаран дурсса дукрардал тIин-тIааьн лаласлай, миннуя цIухлай, миннул суратру ришлай икIайссияв. Ца ххуллух
«Дагестан» басмаханалул ттухь тавакъю бувна Дагъусттаннал миллатирттал дуки-хIачIиялия бусласисса лу сакин бан. На най уна рязи хьуссияв. Ахиргу, Маратгу гьурттуну, щаллу буварду лу, -бувсунни Николай Баратовлул.
Ванал бусаврийну, цIубакIрай лу бувккун бивкIун бур оьрус мазрай, яла му Николайл арснал таржума бувну бур ингилис мазрайн. ЦIана яла ххуйсса 12 сурат язи дургьуну, итабавкьуну бур ялун нанисса шинайнсса календарь.
Николай Баратовлул бувсунни жула халкьуннал дукра-къюссуву хъунмурчIин дикIул, иникьаллул, лаччи-чимус хIаласса дукрарду гьарзашиву, му жула тIабиаьтрал шартIирдацIун дархIуну душиву. Лахъсса, гьава бявкъусса зунттал кIанай ялапар хъанахъисса халкьуннал чурххан тIалавсса дукрарду аьгъусса-гъилисса, тухъсса, хъунмасса хIаллай лялиян дуллалисса дикIан багьлай тIий. Ванал хIисав дурну, иникьали, дикI, уртту-щин, лаччи-чимус гьарзану букайсса бур зунттаву яхъанахъисса Испаннал, Ирландиянал ва цаппара цаймигу хIукуматирттайсса халкьуннал.
Презентациялий гьуртту хьусса цаппара басмаханардал вакилтуралгу мукунма бувсуна цала бивщусса цIусса луттирдая ва кIицI бувна ттигу ххуйсса, мяъна-мурадрал куртIсса луттирдал ялув зий, ми бищун хIадур хъанай бушиву ва чIал къархьуну хьунтIисса Евразиянал луттирдал выставкалий гьуртту хьун хIадур хъанай бушиву.
