Ларгсса нюжмардий Дарбантлив Ухссавнил Ккавкказуллал федерал округрай туризм лядуккан давриха зузисса пишакартал ва ва аралуву зузисса вакилтал гьурттусса агьамсса батIаву хьунни.

З. АьбдурахIманова
БатIаву тIитIлай, Дагъусттаннал туризмалул ва халкьуннал художествалул промыслирдал министр МахIаммад Исяевлул кIицI бунни Ухссавнил Ккавкказуллай, тIабиаьтрал сурсатирттая тIайла хьуну, цимурца душиву туризм тIутIайх дичин дувавриха зунсса. Шикку душиву халкь хьхьирил зуманий, зунттаву, неххардицI, вацIраву бигьалагансса къулайшиннарду.
Дарбантуллал бакIчи Малик Багълиевлул ххи бунни, аьвзалзаманнул шагьрулий туризм лядуккан даву ва муния цIа ларгсса «бренд» бансса ххуллу-хха ляхълахъаву цал муниципалитетрал хьхьичIххуттай бушиву. Шикку ванал тикрал дунни Дарбантуллан 2000 шин хъанахъисса юбилейрал хьунийн дурну диркIсса давур­тту ва шадлугъругу. Ца яла агьам­сса иширан ккалли дуван аьркиншиву, ца жулла республикалий дакъа, Москавливгу, Парижрайгу ккаккан дурсса «Гончарный круг: от Дербентской крепости до ворот Кремля» цIанилу дурсса хъуннасса концерт. Мунийну жулла республикалия, жулла аьдатирттая ва миллатирттал культурардая бавшиву цайми-цайми регионнайнгу. Туризм лядуккан давриву ххуйсса иширан ккалли дан бучIишиву утти­гъанну Нарин-Къалалий хьусса АьФ-лул Обороналул министерствалул дянивсса оркестрданул ва опералул балайчи Юлия Погосовал дуллусса концерт. Гьашину Дарбантлив гостиницардаву бивкIсса 1 275 кIану туристътурал бувгьуну бивкIун бур. Дарбантуллал бакIчинал мукунма бувсунни хьхьирицIсса зума дакьин дуллалисса давурттая, кугьна хьусса къатрава цIусса къатравун халкь бизан бан ккаккан бувсса программа ци даражалий дуссарив ва тавакъю бувунни каялувчитурахь, амру баннин къабавцIуну, ва аралуву зузисса гьарнахь чялишсса гьурттушинна дуллан.
БатIаврил гьурттучитурал мукунна ххал диргьунни ялун нанисса шинал СКФО-рай туризмалул аралуву дувансса давурттал сияхI.