Сентябрьданул 23-нний УнцIукIуллал райондалий АшилтIиял шяраву Ухссавнил Ккавкказуллал жагьилтурал слет тIитIлатIисса хъуннасса ва агьамсса шадлугъ хьуну дур. Слет батIаврил мурадгу бивкIун бур террорданийн ва экстремизмрайн чул бивщуми къатIайласса, дяйркьусса идеологиялул ххуллийх нанишиврия чIявучихьгу бусан. Жагьилмур ник хъяврин хьуну, хIакьмур щялумуния личIи бан лахьхьин бан, цал ялагу тикрал бан багьлагьисса хIакьинусса заманнай, слетрал сакиншинначитуран пикри хьуну бур ва шадлугъ жула ппухълунная ирсирай дирсса хъамал кьамул баврил аьдатрайн чул бивщуну дуван.

З. АьбдурахIманова
Шадлугърал гьурттучитурал ва хъамаллурал хьхьичI махъ лахълай, ДГПУ-рал профессор, Росмолодежьрал федерал эксперт ПатIимат Оьмаровал кIицI бувну бур хъамал кьамул баврил аьдат ишла дуван аьркиншиву жула билаятрал ва Ккавкказуллал миллатру цачIун бавриву. Куннал ку бувгьу­сса, цIакьсса общество хIасул хьуншиврул, цинявннан аьмсса ца идея дикIан багьлай бур.
— ДР-лул Миллатирттал ишир­ттал министерствалул сипталий, республикалул шагьрурдай ва щархъаву ларгсса шинал щурущи дурну дуссия хъинну ххуйсса, «Куначество» цIанилусса проект. Му проектраву гьуртту хьусса кулпатру цIанагу буссар цаннащал ца дахIаву дуну, цаннащал ца дусну. ХIазран дакъахьунссия жула ппухълуннал ва аьдат, дугу-дурурччуну, жуйнна диян дурсса, — тIий бур П. Оьма­рова.
Слетрайн бувкIун бур Ставрополлал крайраясса, Кабардин-Балкьарнавасса, Къарачай-Чаргас­навасса, Ухссавнил АьсатIи­ннавасса, Чачаннавасса делегацияртту, аьмну – 200-ксса инсан. Мукунма УзбакIнавасса, Къазахъис­ттаннавасса ва Мордовиянавасса вакилталгу.
Слет нанисса гьантрай шикку хьуну бур личIи-личIисса мастер-классру ва тренингру, флешмоб­ру ва конкурсру. Слетрал махъра-махъсса кьини – сентябрьданул 26-нний хьуну дур хъуннасса концерт.