«Ча дуркра, инт!» тIисса интнил хьхьунусса мажлис-тяхъашиву хIадур дурну дия ГьунчIукьатIрал даэлийсса Культуралул къатлул художествалул каялувчи Шуаьева Багъдагуллул ва методист Кьурбанова ПатIимал.
Щалва жяматгу лагма лавгун, аьркинмунил щаллушинна дуллай бия колхозрал председатель Сиражуттин Чавтараев ва администрациялул хъунаманал хъиривма Юсуп Шуаьев.
Балайлул ва къавтIаврил итххявхсса жямат цаннагу, цивппа ккаккан бувкIнангу балайрду тIий, ххишала дакъа тяхъасса интнил хьхьунил байран хьунадаркьуна. Бугьарами бия дуаьрду дуллай, Ш. Кьурбанов ва А. ХIаммадаев бия балайрду тIий, къавтIи бия ягинну лавхъун. КъавтIилийхгу тIанкIа тIий, «ЦIуцIаву цIарахьхьун, цIуллушиву чурххахьхьун» тIий, буттал буттахъая нанисса аьдатру дуллай бия жагьи-жугьулт. Яла-яла ва байрандалия ххари хъанай бия мюрщулт. ЧIал чIун хьуннин ва ххаллилсса ссувхIатрал чIу лагь хъанай бакъая. Ххарину хьунадаркьусса кунна ва инт, ххарину тIайлагу дукканнав, авадансса шин хьуннав.
Зура дукангу, чин ма учингу бюхълай личIаннав зу, шяраваллил жямат.
