Гьарца инсаннан цIана бувчIин багьлай бур, цува чув ухьурчагу, урувччуну икIан аьркиншиву. Бурувччуну бикIан багьлай бур инсантал яхъанахъисса къатта-къуш, жулва оьрчIру тарбия буван ва кIулшиву дулун лагайсса оьрчIал багъру, школарду, чIявусса инсантал цачIун шайсса культуралул идарартту. Ттул хIакьинусса ихтилат аьмсса иширттаятусса бухьурчагу, ттунма инсантал буруччаврил чулуха хьхьарану чIалачIисса Ккуллал райондалийсса оьрчIал багъирдаяту ва школардаятуссар.

ХIажимурад ХIусайнов
Ахир-зума дакъар багьана ба­къанма инсантал литIлатIисса иширттал. Вана цIунилгу Бельгиянал Брюссель шагьрулий, жула Дагъусттаннай, Табасараннал райондалий, хьунни терактру (ва му­къул мяъна ххал дуван, луглай, ттун ва махъ я оьруснал, я лакрал словардай къалявкъунни).
Бугьарами инсантуран дакI­ний дикIантIиссар ччянира телевизорданувух ккаккан дуллай диркIсса Бразилиянал «Рабыня Изаура» тIисса кино. Га чIумала кинорах буруглагиминнал янилун багьлай бивкIссар тайннал лахъ къатрал гьарца подъездраву лавай, ялавай нанисса инсантурах уруглагисса къаралчи. Дакъая га чIумал утти куннасса пIякьучавурттугу. Ва иширал бусласиссар инсантал апатIирттаяту буруччаврияр агьамсса иш цамур бикIан къабюхъайшиву. Шиккува кIицI буван ччива, Дагъусттаннал МЧС-рал зузалтрал чIун-чIумуй телефоннайн гьан дуллай дур, тIабиаьтраву хъанахъисса дахханашивуртту хIисавравун ларсун, цумур кьини цумур ссятрай бурув­ччуну бикIан багьлагьиссарив бусласисса баян бавуртту. Хъунмасса барчаллагь вайннайн.
Ккуллал райондалийсса чIявуми оьрчIал багъру, школарду бур зий ччянива халкьуннал цалва бюхъу-хъитлийну дурсса къатраву. Вай цивппагу бур ххуллурдал чIарав ва арх бакъа. Гьай-гьай, шяраваллал администрацияртту буржлувссар цала шяраваллал халкь яхъанахъи­сса кIантту, тIабиаьтрал чулуха хьуннав, утти ялун дирсса, дунияллий­сса гьарцагу хIукуматрай багьана бакъа хъанахъисса хатIардаяту буруччавуртту дуллан. Явара ва багьана бакъанма инсантал литIлатIаву ччянира най дия дунияллий ва жула Аьрасатнал хIукуматрай. Зун дакIнийссар, 17 шинавусса Владимир Ильич Ульянов (Ленин) цала ниттил чIарав авцIуну, «Жува цамур ххуллийх гьанну?» тIий, дирхьусса сурат. Ганал уссу зиянчи, утти мазрай учиннача, террорист ивкIссар.
Цила чIумал ялув кIицI був­сса оьрчIал багъирдал ва школардал къатри буллалийни, жула инсантурал гай бувну бакъар, къатри дуваврил СНИП-ру бурувччуну. Вай СНИП-ру буруччавуну цалчин хъанахъиссар цукунсса духьурчагу жяматралсса, таксса инсаннал­сса хьуннав, къатрал дянийх дикIан багьлагьишиву яла чанну шанна мет­ра. Ванил тIиссар, нажагь цIу дагьарчагу, цамур тIабиаьтрал ишру багьана хьуну лекьлурду хьурчагу, чIаххуралми къатран зарал къахьунсса ишру хIисавравун ласлай бушиву. Инсаннал оьрму багьа бищун къабюхъайсса зат бухьувкун, жулва жува бурувччуну бикIан багьлай бур. Чара бакъа Ккуллал райондалийсса оьрчIал багъирдал, школардал, культуралул идарарттал лагма видеокамерартту бивхьусса чапарду дикIан багьлай бур. Ялув кIицI бувсса куццуй, циняв оьрчIал багъирдал, школардал лагмасса чапардал кьатIух дикIан багьлай бур 3 метра цичIав дакъа­сса аьрщарал. Ва масъала шяраваллал администрациярттахун бувтун битайсса масъала бакъарча, райондалул депутатътурал гьаз буван багьлагьисса, кIицI дурсса давуртту дуван арцу аьркинсса духьувкун, ххал бигьинсса ма­съала бур. Шиккува чIалай бур вай иширттавух гьуртту хьун аьркиншиву МЧС-рал пишакарталгу.
Жулва жува буруччирча, Аллагьналгу буруччинтIиссару жува.