Дагъусттан Республикалул Миллатирттал иширттаха зузисса министерствалул, «Городские джунгли» тIисса квестру бувайсса сакиншинначитуращал цачIу, «Сокровища нации» тIисса этноквест буван хIадур хъанай бур.
З. АьбдурахIманова
Ва тIуркIу бувантIиссар кIира ятIапрай МахIачкъалалив ва Дарбантлив. МахIачкъалалив хьунтIимур тIуркIу майрал дязаннуву хьунтIиссар.
Зун такIуй пикри хьуссарив жулва шагьрулий итталун къадагьлагьисса лишаннал хъирив багьну, миннул ялув бакIцIуцIаву дуллан? Гьар кIанттул цинма-цинма лайкьсса бусала бушиву? Уттигъанну жула археологтурал канилун дагьну дур аьвзалзаманная шихуннай яхьусса артефакт ва мунил хIакъиравусса бусала. Вай укунсса затирдацIун бавхIусса бусалартту ва ссигъри бувчIавривур ва тIуркIулул мяъна-мурадгу. ТIуркIулуву гьуртту хьун ччинан кIулну бикIан аьркинссар Дагъусттаннал ва МахIачкъалаллал тарих, мукунна жула халкьуннал аьдатру ва эбадатру.
Квестравух гьуртту хьун ччинал апрельданул 30-ннин аьрзри булун аьркинссар, гикку цалла командалул бакIчинал цIа-бакIгу, цими инсан гьуртту хьунтIиссаривгу чивчуну. МуницIун телефондалул номергу.
