Дагъусттаннал халкь никирая никирайн цIакь дуллай бивкIссар чил билаятирттаясса чапхунчитуращалсса дяъвирдаву ххувшаву ларсъсса виричунал сиппат.

РувхIанийсса хазна цаву бусса дакIнихсса халкьуннал творчествалул гьайкаллаву, жулва тарихрал виричусса лажинт ккаккан даврищал, сакин дурну дуссар халкьуннал виричушиврул яргсса сиппатругу.
Тарихрал личIи-личIисса чIун­­нардий сакин бувсса Дагъус­ттаннал халкьуннал оьрмулувасса ли­чIи-личIисса иширттан хас був­сса зунттал халкьуннал эпический поэмардал дуссар гьарцаннан аьм­сса хасият. Миннуву халкьуннал ккаккан дуллай дур виричусса талаталал сиппат.
ДакIнихсса халкьуннал творчествалувугу, литературалувугу хьхьичIунну дуссар тарихраву бунияла хьусса ишру ккаккан буллалисса кьяйдарду. Ми кьяйдарду цаву дусса «Надир-Шагьнащалсса талатаву», «Чарил оьрчI», «ПартIу-ПатIима» ва цаймигу дакIнихсса творчествалул гьайкаллу хIакьинугу дуссар хъирив нанисса никираву гражданшиврул хIуччарду ва ватандалухсса ччаву тарбия дуллай. Инсан тарбия авриву магьирлугърал цуксса агьамсса кIану бугьлагьиссарив бувчIлай, магьирлугърал усттартурал цалва произведениярттаву- музыкалуву, поэзиялуву, живописьраву, скульптурардаву, драматургиялуву ва театрдануву дихьлай буссар вирттаврал сиппатру. Жулва театрдалгу чIун-чIумуй бишайссар аьрали-патриот темардан хас бувсса пьесарду. Хъунмасса Буттал КIанттул цIанийсса дяъвилул шиннардий жулва театрду, аьрай талатисса дагъусттанлувтураясса пьесарду бишаврицIун, кIура баллай бивкIссар Дагъусттаннал халкьуннал виричусса тарихрая бусласисса хьхьичIазаманнул произведениярттачIангу. Да­гъусттаннал сценалий хъунма­сса тIайлабацIулущал бихьлай бивкIссар М. Хуршиловлул «Андалал» ва «Шамил», А. Аджаматовлул «Чаннаннил къатIа», ХI. ЦIадассал «Базалай», Ш. Аьбдуллаевлул «Зунтталчунал кьисас ласаву», К. Симоновлул «Парень из нашего города».
Щала Европанал агьулданийн щавщи бивсса яла оьттул ттур дурк­сса дяъви къуртал хьуну цикссагу шинну ларгун махъгума агьамсса теманура лирчIунни дяъвилул тема театрдал репертуарданувугу, литературалувугу, магьирлугъравугу.
А-В. Сулаймановлул «Дяъвилийсса хъатIи», С. Эмировлул «Виричушиву», А. Хачаловлул «Аманат» ва цаймигу дагъусттаннал миллатирттал мазурдийсса пьесардаву буслай бур Ватандалухлу жан дуллусса виртталсса арсваврая.
Жулва театрду шиная шинайн зий бур хъун хъанахъисса никираву ватандалухсса ччаву, жулва халкьуннал виричушиврия пахрулул асарду тарбия буллалисса темардаха. Му мурадрай бихьлай бур дяъвилийн къаршисса цIу-цIусса спектакллу: Р. ХIамзатовлул «Къуртал къархьусса концерт» — Оьруснал театрдануву, ЦI. Камаловлул «Хан-Муртазааьли», Г. Бодыкиннул ва С. Челкил «АхIмад-хан Султан», Р. ХIамзатовлул «Оьрмулул чарх» — Лакрал театрдануву; Г. Султановал «Лехху, кьурукь», М. Айтматовлул «Ниттил монолог» — Нугъайнал театрдануву ва чIявусса цаймигу.
Ларгсса шинал жура кIицI лагарду душман ххит увну 70 шин там шаврил юбилей. Ххувшаврил юбилейрал хьунийн дагъусттаннал цинявппагу театрдаву бивхьуссар школалийн гьан бувасса оьрмулул оьрчIая тIайла хьуну бугьараминнан цIа кусса аьрали-патриот темалун хас бувсса спектакллу: Лакрал театрдануву А. Къапиевлул «КъаруртIунна лирчIсса макь»; Ссихьрал театрдануву – Р. Файзулиннул «Петрушка на войне»; Оьрус­нал театрдануву – А. Арбузовлул «Домик на окраине»; Даргиял театрдануву – Р. Хубецовал «Сердце матери»; Яру­ссаннал театрдануву Х. Аьбдулгъапуровлул «Недопетая песня»; Къумукьнал театрдануву – къумукьнал шаэртурал произведениярттая чивчусса «Победители»; Табасараннал театрдануву – В. Жеребцовлул «Будем жить»; Лазгиял театрдануву – Х. Хаметовал ва З. Салимгереевал «Капли дождя»; Опералул ва балет­рал театрдануву – К. Симоновлул «Жди меня»; Нугъайнал театрдануву И. Букавчаннул «Выстрел на рассвете».
ХIакьинугу жулва мурад бур, щаллагу инсаниятрал хьхьичI дацIлацIисса оькьинирдайн къарши бавцIуну, дунияллий дакьаву дуруччин.
Гулизар Султанова,
Лакрал театрданул завлит, Аьрасатнал магьирлугърал лайкь хьусса деятель