Апрельданул 15-нний Ккуллал 2-мур школалий хьунни увну гьашину 95 шин бартлаган тIий диркIсса шаэр, чичу, аьлимчу Абачара ХIусайнаевлун хас бувсса мажлис.

ХIажимурад ХIусайнов
Мажлис хIадур бувну бия Ккуллал шяраваллил библиотекалул хъунмур ХIажиева Аьйшал, биб­лиотекарь Маммаева Зоял, Ккуллал 2-мур школалул лакку мазрал учительница Кьурбанова Загьидатлул. Мажлисрай гьуртту хъанай бия школалул 5-6-ми классирттал дуклаки оьрчIру ва учительтал. Ккуллал библиотекалул залдануву, школалийсса лакку мазрал дарс дишайсса классраву Абачара ХIусайнаевлул луттирду бивхьусса, ванал оьрмулиясса макьалартту дирхьусса стендру дурну дия. Мажлис нанисса класс цуппава бия хасну лакку мазрал дарс дишайсса, хъинну ххуйну чIюлу бувсса.
Мажлис тIивтIуна Кьурбанова Загьидатлул. Ванил увкуна:
— Жула чIаххувсса Хъусращиял шяравасса, Ккуллал шяраву­сса школалий зий ивкIсса, хъунасса лакрал шаэр, чичу, аьлимчу хьусса Абачара ХIусайнаевлул хъунмасса кIану бугьлагьиссар лакрал литературалуву ва литературалул элмулуву. Ва, зу куна, зун­ттал кьянкьасса тIабиаьтрал тарбия увсса оьрчIая хьусса, цала хIа­рачатрайну цавувасса пагьму-гьунар ялун личин бувсса зунтталчу ивкIссар.
ХIажиева Аьйшал кутIану бувсуна Абачара ХIусайнаевлул оьрмулия, ванал чивчусса художествалул произведениярттая, гьарта-гьарзану бувсуна «Бадрижат» тIисса кьиссалия. Такну бавцIуна гивусса цаппара геройтурал образирттай. Хъирив Маммаева Зоял бувсуна ванал литература ахттар дуллай чирчусса давурттаяту.
Яла школалул оьрчIал бувсуна Абачара ХIусайнаевлул оьрмулия, бувккуна ванал шеърирду. КIилчинмур школалул директорнал хъиривма Ризванов Кьубанчил кIицI бувна Абачара ХIусайнаевлул чивчусса шеърирдаву, кьиссардаву, литература ахттар дуллалисса давурттаву жулла ватан цукунсса авадансса пагьму-гьунардал инсантал яхъанахъисса дуссарив ккаккан дурну душиврия. Мажлисрал ахирданий ХIажиева Аьйшал хъунмасса барчаллагь куна школалул оьрчIахь, укун ххуйну гьуртту хьуну тIий.
Ттула чулуха кIицI буван ччива ва мажлис байбишин хьхьичI Ккуллал шяраваллил библиотекалул зузалтрал цалва буруккинтрая був­сса ихтилат.
Жунма кIулсса куццуй, хьхьи­чIава библиотекарттан, луттирдал фондру цIу буван, итадакьай­сса диркIссар хIукуматрал арцу. Утти мукунсса иш бувагу ливчIун ба­къар. ХIажиева Аьйшал бусласаврийн бувну, кказит-журналлу чичин дурагу итадаркьуну дусса дия 500 къуруш. Муних бувагу ца «Илчи» кказит бакъа чичин хъанай бакъар. Мунийн бувну, вай тавакъю буллай бур лакрал шаэртурахь, чичултрахь, аьлимтурахь, цалва итабакьлакьи­сса луттирдал мукьва-ххюва экземплярвагу цачIангу булара тIий. Бугьарами буккулт: «Жу вайва вай лак­рал чичултрал луттирду ккалай, вай дакIних бусан лахьхьарду­хха, цIусса луттирду бакъа­ссарив?» — тIун бикIайшиврия буслай бия. Махъсса шиннардий Илиясова Марияннул кумаграйну итабавкьусса бувагу ца «Лакрал магьри» тIисса лу бия вайнначIан бивну. Бувагу бакъар тIива ялавайсса классирттал оьрчIал буккин кунмасса, хъунисса хIарпирдай чивчусса лакку мазрай­сса луттирду.
Нанияра, кказит-журналлу чичайни хьуннав, укунма жулва шаэртурал, чичултрал, аьлимтурал итабавкьусса луттирдайну кумаг булланнуча жула зунттавусса шяраваллал библиотекарттайн. ЧIивину чIаларчагу, явара му хъинну хъуннасса давуну хъанахъиссар.
Цинявнналлагу каши ххи хьу­ннав!