ХIажимирзахъал тухумраясса хъуна Садикьлул арсурваврая мукьра къяртта най дур ГьунчIукьатIрал шяраву. Ва агьулданувугу аьрабрайгу, бух­аьжамрайгу чичингу-буккингу кIулсса бивкIун бур хьхьичIва. Мунин сававгу цирив чивчуну бу­ссар «ГьунчIукьатIрал тухумру» тIисса луттирай. Хъуна Садикьлул арснал Давудлул арсная Аьбдуллагьлуя сакин хьусса къяртлуясса бусалар ва. Амин Аьбдуллаев Аьбдуллагьлул цанма щарну бувцуну бур Савдат тIисса чачан душ. Гайннал дянив хьу­сса оьрчIаяту ливчIун бур 3 арс ва 3 душ. Арсру: Оьма, ХIажи, Мяммадацци. Ва агьулдануву дурккусса, итххявхсса чиваркI хьхьичIвагу, уттигу гьарзану бивкIссар. Аьбдуллагьлул фамилия ХIажимирзаев дуна, мунал оьрчIал Кьадиров циванни фамилия дусса куну цIувххуссия на Амаев Амирдухь. Танал бувсуна цала ниттиуссил Оьмал жагьилну ивкIусса цала ссурахъил Кьадирдул цIанияту фамилия дурссар куну. Миччасса духьунссар Аьбдуллагьлул оьрчIал Кьадиров фамилия дишаву. Вай шамагу уссу (Оьма, ХIажи ва Мяммадацци) гьуртту хьуссар дяъвирдаву. Оьма увну ур 1914 шинал ГьунчIукьатIрал шяраву мухIулттий дувайсса усттарнал хъудугьул кулпатраву. Буйнакскалий 1937 шинал къуртал бувну бур зооветеринарный техникум. Гара шинал увцуну ур аьралий бурж лахъан ЯтIул Аьралуннавун. Къуллугъ буллай ивкIун ур Владикавказрай, гиккува кавалеристурал школа къуртал бувну, сержантнал чин дуллуну дур. 1939 шинал Финнащалсса дяъвилуву гьуртту хьуну ур, 1940 шинал зана хьуну ур шавайн. 1940-1959-ку шиннардий зий ивкIун ур Ккуллал ва Лакрал районнай ветврачну. 1960-1967-ку шиннардий Тамазаллал ветучасткалул хъунаману, 1967-1980-ку шиннардий ЦIуссалакрал ветучасткалул ветфельдшерну ивкIун ур. Ва лайкь хьуну ур «За оборону Кавказа», «За доблестный труд», «За трудовое отличие» ва цаймигу медаллан. Лайкь хьуну ур цалва пишарал хIурматрал цIанин, мукуна ХIурматрал грамотарттан. 1999 шинал Новолакрай аьпа­лухьхьун лавгун ур. Аьбдуллагьлул чIивима арс Кьадиров Мяммадацци увну ур 1919 шинал. ГьунчIукьатIрал школалий 7 класс къуртал бувну, увххун ур Гъумучиял педучилищалувун. Му къуртал къабувна, 1939 шинал аьралий бурж лахъан увцуну ур. Гьуртту хьуну ур Финнащалсса дяъвилуву. Цалва бурж лахълай ивкIун ур Прибалтикалий. Гикку къуртал бувну бур училище, ларсун дур чIивима лейтенантнал чин. Талай ивкIун ур немецнащал. Махъва-махъсса чагъар бувкIун бур Зифилс тIисса шагьрулия 1941 шинал август зуруй. 1941 шинал ноябрьданий акъа хьуну ур. Оьрмулул 22 шинаву Мяммадацци Ватан дуручлай ивкIуну ур. Лявма арс ХIажи увну ур 1917 шинал усттар хъудугьул кулпат­раву. ХIажинал буттал пиша лавхьхьуну, Краснодар шагьрулий мухIулттив дуллай зий ивкIун ур. 1938 шинал цанма щарну бувцуну бур цала гъансса ХIапсат тIисса ШтанчIаев Малучил ссу. 1939 шинал ХIажинан увну ур арс. Ванан цала буттал цIа Аьбдуллагь дирзун дур. 1940 шинал ХIажи, Краснодар шагьрулул военкоматрал, цалва бурж лахъан армиялийн увцуну ур. 1941 шинал ХIажиналгу ватандалухлу талай жан дуллуну дур. Буттал лажин къаккарксса Аьбдуллагьгу ятин хьуну ур. ЧIивинияцIакула захIмат ххирану аьдат хьусса зунттал хъамитайпа, буттал лажин къаккарксса, 2 шинайн къаивсса арснащал, 23 шинаву щащар хьуну ливчIун бур. Цила дакIнил къюву ХIапсатлул давриву паракьат дувайсса диркIун дур. Арснан ппу акъашиву кIул къадан ХIапсатлул хъунмасса захIмат бивхьуссар тай кьянатсса дяъвилул шиннардий, хьхьу-кьини къакуну зий-занай, оьрчIан аьркинмур дузал дуван. ХIапсатлун цила арс Аьбдуллагь ишинсса кIану бакъа бикIайва, ванаха чIалачIин къадикIайва. Цуксса захIматсса даву дулурчангу, га даврия ма­хъунмай къашайва. Тай дяъвилул шиннардий ХIапсат кунма жагьилну щар хьуну, дяъвилий ласру ливтIуну, ца ягу кIива оьрчIащал цивппалу ливчIсса хъами чIявусса бивкIссар. Гьарцагу лакрал шяраваллаву ми хъаннин гьайкаллу дацIан дуван буржлувссар жямат. ГьунчIукьатIату дяъвилийн лавгсса 287 адаминая бачIи зана къавхьуссар цала къушайн. Абадлий чил аьрщараву ливчIссар, аслантал кунмасса, ГьунчIукьатIрал щар къадурцу­сса 69 жагьил. Миннавату бачIи ххишалагу цалва хушрай лавгссар дяъвилийн. 24 шинаву ватан дуручлай ивкIуссар ХIапсатлул лас, Аьбдуллагьлул ппу ХIажигу. Ва макьалалул ахир дуллай чичин ччай бур, ХIапсатлул ххишала бакъа хъунмасса захIмат бивхьуссар ГьунчIукьатIрал колхозрал даву дуллай, ччарчан зунттаву, ччарчан даэлий, кIинттул ва гъинттул. Ванил цила арсгу тарбия увссар даву ххирану, хъуниминнал хIурмат-иззат буну. Аьпа бан цал, Аьбдуллагь оьрмулул чагъираву дунияллия лавгунни. Ванахь ванал нину ХIапсат бикIайва «аман, дадал, на цахъис ххуйну бусраврай дучча, чIявусса захIмат бивхьуссарча ттулва оьр­мулуву» тIий. Аьбдуллагьлулгу ванихь учайва: «Я, дадай, на ина сагъну дуна дуччивав, мудан мукун тIий дурахха?!» — куну. ДукIу Зумаритавал гьантрай на ттулва ссурвавращал лавгссияв Бабаюртливсса ГьунчIукьатIрал даэлийн буттал гьаттайн биян. Гикку хIатталлий ттун ххал хьунни лухIисса мармарчарил кIялабарз бусса гьаттай ца лухIи лархсса хъамитайпа щябивкIун, кьулгьу буллай бия. Га бия цила арснал Аьбдуллагьлул гьаттай кьулгьу буллалисса ХIапсат. ХIапсатлул гикку увкунни: «На ванахь нара дучча тIий, ттуна ва уччин багьунни». ХIапсат кунмасса хъами жул шяраву чIявусса буссия ласурваврах, арсурваврах ялугьлай ахиратрал хьусса. Цал бунагьирттал аьпа баннав. ХIапсатлулгу оьр­мулий барачат бишиннав. Аьбдуллагьгу алжаннул ххари аннав, мунан бакъамур оьрчIан, оьрчIал оьрчIан булуннав.