Апрельданул 29-нний щаллагу дунияллий кIицI лагайссар КъавтIаврил кьини. Му байран цурдагу хас дурну дур къавтIаврил циняв журардан, стиллан. Му кьини кIицI лаглай байбивхьуссар 1982 шиная шиннай, ЮНЕСКО-лул хIукмулийн бувну, франциянал балетмейстер, къавтIаврил искусствалул реформатор ва теоретик Жан-Жорж Новер увсса кьини, цувгу тарихравун «утти­заманнул балетрал ппу» хIисаврай увхсса.

Бадрижамал Аьлиева
Ва байрандалул агьаммур пик­ригу бур къавтIаврил циняр направленияртту цачIун даву, искусствалул ца жура хIисаврай. Му Кьини цурдарив хъанай дур му искусствалул жура цал ххишалану дакIнийн бутансса, кIицI лагансса багьанану, мукунма политикалул тIий, культуралул, миллатирттал тIий, ччийкунсса дазурду дакъа дувансса, ца мазрай – къавтIаврил мазрай, гъалгъа тIий, дусшиврул ва дакьаврил цIаний инсантал цачIун бувансса сававну. Му кьини къавтIаврил щалларагу дуниял – опералул ва балетрал театрдал коллективру, утти­заманнул къавтIаврил труппарду, уттизаманнул бальный ва халкьуннал къавтIавурттал пишакартал, цайнува цивппа хьусса артистал – кIицI лаглан най дур цалла пишакаршиврул байран. Му пишакаршиврул кьини кIицI лагаврил журардугу личIи-личIисса бур – аьдат­райсса концертирттая тIайла хьуну, къавтIаврил флешмобирттайн бияннин.
КъавтIаврил кьинилун хасну, жулла республикалийгу хьун най дур личIи-личIисса шадлугъру. Апрельданул 28-29-нний МахIачкъалалив хьунтIиссар Рес­публикалул хореографиялул искусствалул конкурс («Дагестан» ансамбльданул КЗ). Сакиншинначитал – Республикалул Дуккаврил ва методикалул Центр.
Апрельданул 28-нний МахIач­къалалив Оьруснал театрдануву Чачаннал паччахIлугърал «Вайнах» ансамбльданул ккаккан дурссар концерт.
Апрельданул 29-нний Дарбантлив Лазгиял театрдануву хьунтIиссар хъуннасса концерт, «Культура – искусство мира» фестиваль лакьлакьисса лагрулий.
Апрельданул 29-нний МахIач­къалалив Оьруснал театрдануву хьунтIиссар «Кавказ – единая семья» фестивальданул гала-концерт. Сакиншинначи – Респуб­ликалул Халкьуннал творчествалул къатта.
Апрельданул 30-нний МахIач­къалалив Поэзиялул театрдануву хьунтIиссар ДР-лул Хореографтурал союзрал гьурттушиврийну­сса батIаву.