Апрель зурул 13-нний Каспийскалийсса ОАО «Концерн «Кизлярский Электромеханический завод» Авиамеханический заводрайн экскурсия бунни «Центр одаренных детей» тIисса Респуб­ликалул лицей-интернатрал дуклаки оьрчIал.

И. Саидова
Экскурсия хас бувну бия апрель зурул 27-29-нний Каспийск шагьрулий Аьли Аьлиевлул цIанийсса спорткомплексраву хьунтIисса «Молодые профессионалы» тIисса пишардал усттаршиву ккаккан дуллали­сса чемпионатран.
Дуклаки оьрчIру хьунабавкьунни Worldskills Russia РКЦ-лул каялувчи Заур Оьмаровлул, ДР-лул Жагьилтурал иширттал министерствалул студентътуращалсса ва жагьилтуращалсса давурттал отделданул маслихIатчи Ислам ХIажиевлул ва предприятиялул инженертурал ва пишакартурал.
— Жул центрданул ччя-ччяни бувайссар, дуклаки оьрчIру ва жагьилтал заводрайн бувцуну, цимурцаннущал кIул буллалисса экскурсиярду. Укунсса экскурсиярдайри дуклаки оьрчIан производствалуву даву дуллалисса куц ккаккайсса ва мукунна вайннан шикку цанма ххуй бивзсса пиша язи бугьансса сант дирияйссар. Чемпионат нанисса хIаллайгу дуклаки оьрчIаща бюхъайссар жагьилсса пишакартурал дянивсса бяст-ччаллах буруглан, — увкунни Заур Оьмаровлул.
Авиамеханикалул заводрал технический директор Шангерей Шангереевлул дуклаки оьрчIру кIул бунни заводрал кьуватращал, шиву итадакьай­сса продукциялущал ва ми чув ва ссан ишла дайссарив. Му ба­къассагу, ванал оьрчIахь бувсунни чIярусса цаймигу заводраву­сса кьюлтIшивурттая.
— ХIакьинусса кьини завод­ран яла тIалавми зузалт хъанахъиссар жагьилсса пишакартал. Шиккун зун кьамул бай­ссар технический колледжирттал выпускниктал. Му бакъассагу, цалва пишалий къазузисса жагьилсса юристураща ва экономистураща заводрай лахьхьин бюхъайссар цанма ччисса цайми пишарду, — увкунни Шангереевлул.
Экскурсиялийн бувкIсса оьрчIру хъинну гъирарай буруг­лай бия заводрай дуллалисса давурттах. Станокирттах зузи­сса оператортурал оьрчIан кка­ккан дунни личIи-личIисса деталлу дайсса куц.
Мукунма оьрчIан ккаккан бунни Авиамеханический заводрал кIулшивуртту дулаврил центр. Шикку оьрчIан ккаккан бунни ларайсса технологияр­ттайн бувну мах ишла дуллали­сса процессру, деталлал чертежру, цирда деталлу дуллали­сса куц ккаккан буллалисса видео роликру. Сант дирирну дунура оьрчIру хьунабавкьунни КЭМЗ-рал жагьилсса пишакартуращал, миннавух ия ларгсса шинал Ух­ссавнил Ккавкказуллал федерал округрай хьусса «Молодые профессионалы» тIисса чемпионатрай «CAD – дизайн» номинациялуву ххув хьусса, хъинну гьунар бусса жагьилсса пишакар МахIаммад Аьлиев.
ДакIнийн бутанну «Молодые профессионалы» тIисса региондалул чемпионат хьунтIишиву апрель зурул 27-29-нний Каспийк шагьрулий Аьли Аьлиевлул цIанийсса спортрал комплексраву.