Жижара

qwenХIусайнова Написат
Оьрмулул 92 шинаву аьпалу­хьхьун лавгунни щаллагу республикалий машгьурсса медициналул зузала, сакиншинначи, ДР-лул лайкь хьусса хIакин, Дагъусттаннай цалчинминнавухсса духтур-зунттал душ, ХIажинал душ ХIусайнова Написат.

Написат бувну бур 1924 шинал ЧукIуннал шяраву Буйдалаевхъал ХIажинал ва ПатIиматлул къушлий. ЧукIнав ряхва классрал учкъула бувккуну махъ, 1937 шинал Написат бувххун бур дуклан фельдшер-акушертурал школалийн. Му був­ккуну мукьах тIайла бувккун бур зун Лакрал райондалийн. Зий бивкIун бур Кьубав ва Убрав медидаралул каялувчину. Зий бивкIун бур комсомол сакиншиндарал секретарьну. 1943 шинал ванин дуллуну дур ДАССР-данул Верховный Советрал ХIурматрал грамота.
1943 шинал бувххун бур Да­гъусттаннал медициналул институтравун. Му къуртал бувну махъ тIайла бувккун бур зун Ккуллал райазарханалул хъунмур хIакинну. 1951 шинал, Дагъусттаннал цIуллу-сагъшиву дуруччаврил министерствалул тIалавшиндарайн бувну, гьан бувну бур зун Дахадаевуллал райазарханалул хъунмур хIакинну. МуницIунма тай шиннардий Написат биттур буллай бивкIссар цайми-цайми къуллугъругу: ДАССР-данул ЯтIул Ххачлил обкомрал пленумрал член, Дахадаевуллал райсовет­рал исполкомрал депутат ва член ва м.ц. Написат бувчIуну бивкIссар СССР-данул терапевтътурал XVI съездрал депутатну.
1964 шинал бивтссар Республикалул клиникийсса азарханалул хъунама хIакиннал хъиривчуну, каялувшиву дуллай бивкIссар Дагъусттан Республикалул ВТЭК-рай.
КIулшиврул ва пишалул аралуву лахъсса даражалий бартбигьлай бивкIсса иширттахлу Н. ХIусайновал хIалал дурссар чIярусса наградартту, хIурматрал грамотартту, бахшишру ва барчаллагьру.
Дагъусттаннал лайкьсса душниясса аьпа абадлий личIантIиссар жула цинявнналагу дакIурдиву.
Написат ахиратрал шаврил пашманшивугу кIидачIлай, дакI­нийхтуну жижара буллай буру арснахь Рашидлухь, арснал оьрчIахь Шамиллухь ва Иринахь ва махъсса щалвагу агьлу-авладрахь. Цил бунагьирттал аьпа баннав, рухI бигьаний дишиннав.
ЧукIуннал жямат

————————-

230001КЬУРБАННУЛ ДУШ ХIАСАНХIУСАЙНОВА АМИНАТ

Оьрмулул 82 шинаву аьпалу­хьхьун лавгунни ЧIятусса Гъазлахъал Кьурбаннул душ ХIасанхIусайнова Аминат.
Аминат бувну бур март зурул 8-нний 1934-кусса шинал. ЧIавасса оьрмулий дяъвилул шиннардий зий бивкIун бур ЧIяйннал «ЯтIул партизан» колхозрал дояркану, махъ – интернатрал завхозну. 1952-кусса шинал Буйнакскалийн лавгун, зун був­ххун бур уссал фабрикалийн. Шиччава пенсиялийнгу бувккун бур. Цила оьрмулул дус, цIанихсса педагог Бадавинащал вайннал хъунигу бувну, чивун буккан бувссия 8 оьрчI.
Аминат гьаттавух бивхьуну кIира ссят лагайхгу, хар-хавар бакъа приступ хьуну, накьлу хьунни ванила куяв Расулхъал Аьбидлул ва Камилатлул арс МахIаммад.
МахIаммад увну ур октябрь зурул 1-нний 1955-кусса шинал ЧIяйннал шяраву. ЧIяйннал дянивмур даражалул школагу къуртал бувну, лавгун ур армиялийн, къуллугъ буллай ивкIун ур Бакуй. Армиялия зана шайхту, зун увххун ур райондалул пожарный отделданийн. Муния махъ лавгун ур Туркманнавун гъанссанначIан, цала дуланмагъралсса бан. Шанна шин тийх дурну, зана хьуну ур буттал шяравун ва зун ивкIун ур колхозраву, къурнил бригадиршиву дуллай. Му даврий хъинну хьхьичIунну зийгу ивкIссар 35 шинал мутталий.
Аминат ва МахIаммад аьпа­лухьхьун лагаврил хъуннасса кьурчIишивугу кIидачIлай, жижара буллай буру кулпатрахь Саидахь, ХIасанхIусайннухь, Аминатлул ссурваврахь ПатIимахь, Ажихь, арсурваврахь, душваврахь, уссу-ссурваврахь ва махъсса цинявппагу гъан-маччанахь.
Вайннал гьав нурданул ду­цIиннав, алжаннул ххари баннав. Махънал оьрмурдай барачат бишиннав. Амин.
ЧIяйннал жямат