Апрельданул 27-нний Дарбантлив хьуну дур республикалий ттинин къархьуну диркIсса, ца яла хъуннасса, сайки 55 азараксса инсан гьурттусса, «2000-летний Дербент говорит террору нет!» тIисса акция.
З. АьбдурахIманова
Шагьрулул пресс-службалул бусаврийну, террорданул иширттаву бивщу-ливтIусса, оьрмурдацIа хьусса халкьуннан хасъсса аьпалул митингру хьуну дур Дарбантуллал циняв кIулшивуртту дулай идарарттаву, мизитирттаву, шагьрулул предприятиярттай, Тархъаншиврул майданнив, «Нарын –Къала» стадиондалий, Лазгиял театрданучIа, Жамикантуллал пострай, кIичIирттаву ва паркирдаву.
Дарбантуллал дязаннивсса Тархъаншиврул майданнив хьусса митинграй гьуртту хьуну ур Дагъусттаннал ХIукуматрал Председательнал хъиривчу Рамазан Жаппаров, шагьрулул бакIчи Малик Багълиев, Дагъусттаннал муфтинал хъиривчу Магьди-хIажи Аьбидов ва цаймигу.
Митинграйн бавтIминнал хьхьичI махъ лахълай, Рамазан Жаппаровлул кIицI лавгун бур, цув хъинну ххарину ушиву аьвзалзаманнул Дарбантуллал аьрщарай укунсса акция дуваврия.
«ХIакьину Дарбантуллал халкь циняв ца хьуну «Террор къачру!» тIий бур.Терроризм Дагъусттаннал аьрщарай къаляхъан аьркинсса затъя. Ттуршукурдай цаннащал ца дусну яхъанай бивкIсса миллатир_ттал дянивалу лиян дан ччиминнал макрур терроризм. Къачагътал-экстремистътурал мурад – жува цаннащал ца талати бувну, оьттул бярув бутавур», — тIий ур ва.
Малик Багълиев кIицI лаглай ур, 2000-ку шиная шинай Аьрасатнаву террорданул ишру сававну 1 500-сса инсан ивкIушиву, миннавух 200-сса мюрщи оьрчIругу, 4 азараксса инсаннан личIи-личIисса журалул цIунцIияртту хьуну дур.
«Жува ца кулпат хьуну къарши буккарча «террор» тIисса зулмулийн, умуд бур паракьатсса оьрму жущава жулва оьрчIан аманат бан бюхъантIишиврийн», — тIий ур Дарбантуллал бакIчи.
Шагьрулуву хьусса митингирттай махъру лахълахъиминнал цIунилгу дакIнийн дирчуну дур Аьрасатнал Бесланнай, Буденновскалий, Буйнакскалий, Волгодонскалий, Москавлив, Каспийскалий, Астраханнай хьусса хъунисса ва чIявусса халкь ливтIусса терактру.
Ахттайнмай ссят 1-нний акциялул гьурттучитал ттинин хьусса терактирдаву оьрмурдацIа хьуминнал аьпалун ца дакьикьалийсса пахъ багьну бур. Ссавруннайх гьаваллавун итабавкьуну бур лухIисса ва кIяласса шарду. Майданнив увкIсса гьарнал «умудрал мурхьирай», ххишала кьурчIишивуртту къахьуннав тIисса мурадрай, янналул лисри дархIуну дур.
Тархъаншиврул майданнив митинграл хъирив дурну дур вай иширттан хасну суратирттал выставкагу. Ахиргу, щаллагу дунияллун хъинмур, чаннамур чIа тIисса мяъналий, ссавруннайн дусшиврул лишаннан ккаллийсса кIяла хьхьирулт итабавкьуну бур.
