Апрельданул 20-нний ДР-лул БакIчинал ХIукмулийну Бурлият Токбулатова бивтунни Дагъусттан Республикалул печатьрал ва информациялул министрну.
Дагъусттаннал ХIукуматрал Председательнал 1-ма хъиривчу Анатолий Карибовлул Республикалул Печатьрал ва информациялул министерствалул зузалтран ккаккан унни ведомствалул цIусса бакIчи – Бурлият Токбулатова. ХьхьичIва га зий бивкIссар «Дагестанская правда» кказитрал хъунама редакторну.
Карибовлул увкусса куццуй, хIакьину республикалий хъуннасса къулагъас дуллай бур циняв журардал СМИ-рдах.
«Буниялагу, цIанасса ппурттуву ва хъанай бур билаятрай ца агьамсса бутIану. СМИ-рдайсса цIусса хаварду, цIусса информация инсантурал лаласлай бур, хаснува жагьилминнал. СМИ-рдал хьхьичI бивхьуну бур задача экстремистшиврийн къарши буккаврил хасъсса контрпропаганда дачин даврил хIакъираву. Ва агьамсса ишру хъанахъисса ппурттуву, жунма циняв проблемарттаха хъамабитан къабучIиссар къабурувччуми инсантурал масъалартту щаллу буллан», — увкунни вице-премьернал. Ганал барчаллагь увкунни республикалул каялувчинал цIанияту министерствалул хьхьичIма каялувчи Азнаур Аджиевлухь цачIу зузаврихлу ва Бурлият Токбулатован чIа увкунни цIусса къуллугърай тIайлабацIуртту.
Токбулатовал бувсунни ганийн тапшур бувну бушиву агьамсса къуллугъ, даврил уртакьтурахь тавакъю бунни цалла-цалла давурттай ххуйну зун.
Азнаур Аджиевлул даврил уртакьтурахь барчаллагь увкунни цачIусса даврихлу. «Ттул кIулшивугу, бюхъугу утти аьркин хъанай бур цамур къуллугърай, на цинявннахь барчаллагь тIутIиссара 2,5 шинай ттула чIарав бацIаврихлу», — увкунни ганал.
Ахирданийгу Карибовлул бувсунни министерствалун чIявусса масъалартту щаллу буллан багьлай бушиву, миннувух харжирдал, оптимизациялул ва цаймигу.
ХIадур бувссар ХI. Аьдиловлул
