Февраль зурул бявкъусса гьантрай жуятува лавгунни, кьадарданул бувцуну, Да­гъусттаннай яхъанай бивкIсса гуржири душ Каммаева Нателла. Ва бия жяматийсса ишкка­кку, ФСБ-лул полковник Каммаев Сяидлул кулпат.

Бувну бур Александрдул душ Сихарулидзе Нателла 1928 шинал сентябрьданул 11-нний Кутаиси шагьрулий. Медучилище къуртал бувну махъ зий буссия шагьрулул больницалий операционный медсестрану, яла Цхалтубо аьралий санаториялий физкабинетрал медсестрану. Ши­ккури цалчин Нателла ххал хьу­сса бакIралгу ххуйсса, чурххалгу оьвхъусса, игьалаган увкIсса аьраличу, Ккулатусса Каммаев Сяидлун. Гьай-гьай, жагьилсса бакIрал ххуйсса Нателлангу Сяид хIисав къавхьуну къаливчIун ур. Гания мукьах сайки 50 шинай цачIу ялапар хъанай буссия мудан мина даххана дуллалисса, ца кIаная цамур кIанттайн куч хъанахъисса аьрали кулпат. Сяидлущал архIал мудан буссия, ласнайн хиянат къашайсса, ххирасса Нато, укун ттюнгъану учайва цалва кулпатрайн Сяидлул. Вай цал буссия яхъанай Ахалкалакилий, яла Батумилий, яла Сяид Керимович тIайла увкссар Венгриянавун. 10 шин дурссар вайннал Венгриянаву. Нателлал мудан дакIнийн дичайва тай шинну. «Ттун дакIний бур, цаппара тайннал махъру ла­кку мукъурттиха лавхьхьусса бия. Масалдаран, хъюртуйн жула кунма тайнналгу хъюрт учайва», — тIий буслан бикIайва.
Нателла Александровна бия бакI-чурххал ххуйсса, интеллигентнайсса, хъинну дакI-аьмал хъинсса инсан. Цу учIарчангу, чара бакъа ххал дан аьркинссия Нателлал дурсса гуржиял дукра: хачапури, лобио, гуржиял зумувну бувсса бадиржанну, шагьнал лачIал ччатI ва м.ц.
Сяид Керимович уссия цува тIул-тIабиаьтрал, хасиятрал кьян­кьасса аьралий инсан. Так кIукI­лусса, иминсса Натоща бювхъуна кIукIлу дан кьянкьасса аьраличунал, зунтталчунал дакI.
Ххуйсса, аьркинсса мас­ли­хIат­ру байва цивилизациялиягу архсса, зунттаву хъуни хьу­сса ккуллал хъаннин, къаччан къабикIанну, хIалимну, бувчIин байва духIин дакъа хъярчру буллалинангу. Цал Сяидлул бувцуну увкIуна Нателла зунттавун. Лагма лавгун вайннал, хъярч-махсара буллан бивкIун бур зирангсса, къудурсса ккули душру. Гьай-гьай, шяраву душваран Сяид, дакI мяшсса «жених», улун ччай бакъахьунссия, цувагу гуржири душнин. Амма Сяид гава цIана Нателлагу бувцуну лавгун ур хьхьичIа. Цакуну бавцIуну бур Нателла, махIатталну буруглай цала хьхьичIун нанисса ххалабакIух. Буруглай бивкIун бур цилва яруннийн вих бакъа, так гъан хъанахъиссаксса хIисав хьуну бур та ххалабакIул лув дахьва чIалачIисса ччанну. ЧIарав бияйхту ххуйну ххал бувну бур – цила ттиликIрай щаллусса ххалабакIу лавсун нанисса хъамитайпа. Цу­ппагу ккурчIав щябивкIсса арамтурал чIарах най бунува, цаягу адамина ивзун, ганин кумаг къабувну бур. Щил банссия кумаг, ва шяраваллаву хъаннил дайсса даву дур. ТакIуй хъамакъабитайва Нателлан ва хъамитайпа. КъакIулли Гуржиянаву зунттавусса хъаннил тагьар цукунсса диркIссарив.
80-ку шиннардий Сяидлуща бювхъуна МахIачкъалалив изан, яла уссия пенсиялийн укканцIа органнаву зий. Сяид шанийн агьсса чIумалгу Нателла хъинну ххуйну, ссавурданий бурувгссар, цуппа сакъатну бунува. Вайннал чIарав ххуйну бавцIунни душ Иветагу. Ивета Сяидовна бур хIакин-эндокринолог. Иветал хъунмур душ Элисо, МахIачкъалалив медакадемиягу къуртал бувну, Москавлив интернатурагу къуртал бувну, жагьилсса оьрмулий медициналуву хъунисса кIулшивуртту ккаккан дурну тIий, цIана зий бур Н. И. Пироговлул цIанийсса консультативно-диагностический центрданий оьрчIал неврологиялул отделданул заведующийну. Нателла Александровна хъинну пахрулий бикIайва цила внучкая. ЧIивимур внучка Мариям зий бур Россельхозбанкраву.
Бувччунни Нателла цила ласнал чIарав МахIачкъалалив.
Аьпа баннав цил, ххуйсса хъамитайпа бикIайва.
А. Кусаева
Бищун хIадур бувссар
Т. ХIажиевал