Ухссавнил Ккавкказуллал жагьилтурал «Машук» суккушиннарал, Аьрасатнал Федерациялул СКФО-райсса Полномочный вакилнал Аппаратрал чIаравбацIаврийну, щаллу дуллай байбивхьунни проект «ГТО в СКФО». Ва проектрал агьаммур мурад бур ГТО-лул суккушинна ва хIаятравусса спортрал тIуркIурду (спортрал дисциплинарду) Ухссавнил Ккавкказуллал федерал округрай машгьур даву.

Бадрижамал Аьлиева
Проектрал хьхьичIсса ма­съалартту укунсса бур: Ухссавнил Федерал округрай ГТО-лул нормарду дулаврийнсса хIадуршинна (workout – воркаут) дуллансса майданну тIитIаву, ГТО-лул суккушиндаравун жагьилтурал сакиншиннардивасса вакилтал кIункIу баву, СКФО-рай сакин даву ГТО-лул ва Воркаутрал суккушиннардал сообществарду, ми площадкарду тIитIлатIисса лагрулий фестиваллу (соревнованияртту), мастер-классру баву, ГТО-лувун шайссаксса чIявусса жагьилтал кьамул баву.
Воркаут тIисса махъ ингилис мазрая таржума буллай бур «уличный фитнес» тIий. Воркаут хъанай бур чIявусса инсантурал архIал дувайсса физкультуралул занятиярттал ца жура, цивунгу бухлахисса личIи-личIисса упражненияртту кIичIиравусса спортплощадкалий щаллу баву (турникирттай, брусьярдай, шведский стенкардай, уттанмай бивхьусса чурттурдай ва мукунна цаймигу конструкцияр­ттай, ягу, ми цичIаврагу дакъа, щяв, аьрщарай). Мукунсса тренировкарттахун багьсса спортсментурал цайнма учай воркаутеры, кIичIираваллил ягу хIаятрал спортсментал куну.
«ГТО в СКФО» проектрал лагрулий спортрал площадкарду буван най бур республикалул 8 шагьрулий ва 12 райондалий. ЦIусса спорткомплекс­ру цIананин бацIан бувну бур МахIачкъалалий ва Каспийскалий.
Уттигъанну Каспийскалий 2-мур школа-интернатрай хьунни Воркаутрал суккушиннарал гьурттучитурал ккаккиялунсса бяст-ччал.
Му журалул бяст-ччаллая бавтIминнахь бувсунни Да­гъусттаннайсса му суккушиндарал каялувчи Сяид Маллаевлул. ЧIурчIав дунни цалва агьаммур мурад бушиву республикалий ва округрай аьмну цIуллу-цIакьсса, спортрацIун бавхIусса оьрму, воркаут машгьур даву. Бувсунни му цинявннан аьмсса, харж-хурж буккан буван къабагьлагьисса спортрал жура бушиву, ччимур кIанай ва ччимур чIумал бюхъайшиву тренировкарду дуллан, му даврин аьркинмургу анжагъ спортрахун багьан­сса гъира бушиву.
Ва школа-интернатрал директорнал хъиривчу Аьбдулкьадир Оьмаровлул бувсунни цалва идаралуву хъуннасса къулагъас дуллай бушиву оьрчIру спортрахух гьан баврих, миннаву цIуллу-цIакьсса оьрмулухсса ччаврил гьану бизаврих.
Хъирив хьунни личIи-ли­чIи­сса бяст-ччаллу. Миннувух хьхьичIунсса гьурттушинна дунни школа-интернатрал тарбиячитуралгу.
Ялун ххи бан, спортрал площадкарду бихьлан тIий бур жагьилтуран занан бигьасса, гъан­сса кIанттурдай: паркирдачIа, школардачIа, стадионначIа. Комплексрал стандартрал лагру дур 10х8 м. Мунил багьа – 300 азарда къуруш. Ми бихьлайна хъуннасса къулагъас дуллай бур мюхчаншиву дуруччаврих. ДР-лул физический культуралул ва спортрал министрнал цалчинма хъиривчу Зайнал СалахIуттиновлул мукъурттийн бувну, муниципалитетирттал каялувчитал хIадурну бикIан аьркинну бур ххишаласса харж бу­ккаврийн – апатIру хьун къабитаву мурадрай, воркаут-площадка чара бакъа бишин аьркинну бур бетондалул гьанулий.
ГТО-лул площадкарду рес­публикалул шагьрурдай ва районнай бихьлахьисса давурттив дуван най бур ччясса мутталий. Майрая байбивхьуну, сентябрьданийн бияннин дуллан най бур зачетрал бяст-ччал (зачетные соревнования), ГТО-лул лишаннугу дуллалисса.