Апрель зурул 18-19-нний Лакрал театрдануву лавайсса даражалий хьунни ингилиснал шаэр, дунияллул цIанихсса классик Уильям Шекспирдул пьесалиясса «Гамлет» спектакльданул премьера лакку мазрайгу, оьрус мазрайгу.
Зулайхат Тахакьаева
КIилчингу бювхъунни Лакрал театрданул актертураща театрданул яла бюхттулмур бакIну ккаклакисса Шекспирдул произведение лавайсса даражалий ккаккан бан. ДакIнийн бутанна, 3 шинал хьхьичI Лакрал театрданул бивхьуссар дунияллул классикалуву ца яла бюхттулмур произведениялун хIисавсса, дуниял хIайран дурсса ччаврил кьисса «Ромео и Джульетта». КIира шинал лажиндарай най буссия спектакль театрданул репертуардануву. Лавайсса даражалий кьамул бувссия спектакль Владикавказрай, Астраханнай ва Нальчикрай. Оьрус мазурдийсса театрдал фестивальданийгу кIива-шанма номинациялуву ххув хьуссар. Танийсса экзамен лавайсса даражалий дулун бюхъарчагу, Лакрал театрданул коллективрал ялату жаваблувшинна лаглай дакъая. Циванни лакрал драматургтурал пьесарду къабишайсса тIисса аьй-бювкьурдугу чан къашайхха, хIатта Лакрал театр чув буссарив къакIулсса лакрал зуматугума.
Дунияллул цIадурксса театрдал бивхьусса спектакль бишин чIивисса Лакрал театрданул гуж хъирив лаянтIиссарив, хаснува агьамсса суал бия, бюхъантIиссарив авадансса ингилис мазрая «Гамлет» мискинсса лакку мазрайн буцин тIисса. Му мурад бартбивгьуну бия Сулайман Мусаевлул, усттарну бувцуну бия пьеса лакку мазрайн.
Спектакль бивхьунни тава «Ромео и Джульетта» бивхьусса Болгарнал режиссер Богдан Петканиннул. Лакку мазраймур спектакльданул ассистентшиву дурну дия ДР-лул Халкьуннал артист Аслан МахIаммадовлул.
ХIатта «Ромео и Джульетта», му бакъасса тамансса цаймигу спектакльлу оьрус мазрай усттарну бивхьуну бивкIхьурчагу, чан къашай тамашачитураву хьувивав лакрал актертураща оьрус мазрайсса спектакль бишин тIисса кIихIуллашиву. Театрданущал уртакьну зузисса ттунмарив мудангу чIалан бикIай актертуран лакку мазраймур спектакль бишин захIматсса кунма. Цанчирча театрданул жагьилсса актертурал лакку маз театрданувур бувагу лавхьхьусса. Амма цалла даврих эшкьи хьусса актертал хIарачат буллай бур, миннал ялув захIмат бихьлай бур театрданул хъунмур никгу. Ва базилухрив на миннал лапва махIаттал-хIайран бувунна. Цанчирча лакку мазраймур спектакльдануву ца роль дургьусса актертал хъиривмур кьини оьрус мазраймур спектакльдануву бия цамур роль дургьуну. Цал архIал кIи-кIира рольлугу лархьхьуну, ца образрава цамур образравун уххан къабигьасса масъала бур. Амма актертураща бювхъунни тамашачитурангу, театрданул критиктурангу дакI дакьинну спектакль бишин. Гайннавусса гьавас залдануву щябивкIминнайнгу биллай бия. СсихI бигьиннин тIисса кунма спектакль къурталгу хьуна. Тамашачитурал цукссагу хIаллай итакъабакьлай бия, режиссер тIурча кIийла-шамийла уккан увна сахIналийн.
(Спектакльдания
гьарза-гьартану бусанну
хъиривмур номерданий)
