«Дагестанская сетевая компания» МРСК Ухссавнил Ккавкказуллал сакиншиндарал каялувчи Гьимбат Гьимбатов цала даврил аьрххилий ивну ур Бабаюртуллал, ЦIуссалакрал, Къизилюртуллал ва Хасавюртуллал районнайн.

З. АьбдурахIманова
Мукьрагу райондалул электросетирдал каялувчитал ва жаваблувсса пишакартал гьуртту­сса батIаврий Гьимбат Гьимбатовлухь бувсун бур Бабаюртуллал райондалий так ца мартрай халкьуннал 131 къатлувунсса ва 145 объектрайнсса ттукI кьувкьушиву. Укун зун бивкIун махъ кассалувун дучIан дурну дур 3,5 млн. арцул.
Хасавюртуллал райондалий тIурча 254 объектрайн ттукI кьувкьуну бур. Миннува чIяруми дусса дур юридий объектру. ТтукI лещан ккаккан бувсса 62 муштаринал хIакъиравусса аьрзри махъунмай лавсун бур. Мунийн бувну, кассалувун 250 азарда къуруш дуркIун дур. ЦIуссалакрал райондалий март­рай 129 абонентнан ттукI кьувкьуну бур. Буржру буллуну бур 117 инсаннал. Къизилюртуллал райондалий 252 абонентнан ттукI кьувкьуну бур, миннува 41 дусса дур юридий объект, 211 укунмасса халкьуннал къатри.
БатIаврий Гьимбат Гьимбатовлул цал ялагу баян бувунни буржлувсса абонентътал муданмасса къулагъасралу бикIан аьркиншиву ва ччувччусса ттукIрал буржру батIаврил даву ялунгу чIуен дуван аьркиншиву.
Дагъусттаннай аьдатравун дагьну дур бурж къалавхъна, щихькIуй цIухху-руххугу къабувна, цIунилгу цалва ужагъирттайн ттукI буцлацаву. МРСК сакиншиннарал каялувчинал чIурчIав дурунни буржру бусса муштаритал ишла бувсса ттукIрах арцурду дуллали баншиврул ца яла къулаймур чаран ттукI кьукьаву душиву.
«Компаниялул пишакартурал укунсса рейдру дуллалийни, цал ялагу, курчIил къавхьуну, халкьуннан бувчIин буллан аьркинссар буржру къала­хъавриясса гайннан цанмасса зараллая. Цал ттукI кьукьирча, кIилчин цивппа авара къахъанан, халкьуннал укунсса баччибакъулшиву къадуллантIиссар», — увкунни ванал.
ХIакьинусса кьини жулла республикалий ишла бувсса ттукIрах дулунсса халкьуннал бурж бусса бур 17, 5 миллиардраха лирчусса арцуйн лавхъун.
Ва шинал январьдания тихуннай кьамул дурсса «Об электроэнергетике» №35 Федерал закондалийн бувну, буржлув­сса муштаритурал хIакъираву штрафрал санкциярду дайдихьлансса ихтиярду дуллуссар.