Декабрьданул 1-нний ЦIуссалакрал райондалий КЦСОН-далул дяхттасса отделениялий Ниттил кьини шадлугърай кIицI лаган бавтIунни чIявусса оьрчIру тарбия бувсса ва буллалисса ниттихъул, учительницахъул, захIмат буллай оьрмурду гьан бувсса яхIлувсса хъами.
Мероприятие хIадур дурну дия центрданул культорганизатор Анжела Аьбдуллаевал. Ниттихъул барча буллалисса ихтилат бувна КЦСОН-далул хъунмур Малика Жамхатовал, кIицI лавгсса отделениялул хъунмур Шамсият Аьлиловал. Ниттихъахасса шеърирду бувккуна дуклаки оьрчIал. Райондалул Культуралул центрданул зузала Написат Аьлисултановал, тIурчарив, хIадур дурну дия ниттихъан ххуйсса концертрал программа. Райондалул чиваркIуннал цIанияту ниттихъул барча бувна ЦIуссалакрал №1 школалул тарихрал учитель ХIамидов Сулайманнул. Байрандалийн бувкIсса ниттихъан бахшишругу дуллуна.
Мува КЦСОН-далул ва райондалул администрациялул уртакьну хIадур дурсса байран хьунни ТIюхчардал шяравугу. Ниттихъул барча буллай, ТIюхчардал шяраваллил хъунама Аьли Аьлиевлул кIицI лавгунни, жунма оьрму булаврицIун, ниттихъал жунма оьрмулух ва дунияллух ччаву дуну яхъанангу лахьхьин бувшиву, ниттихъал хIурмат ва кьимат муданма лахъну бикIантIишивугу.
