Жулва билаятрай дуллалисса байраннаву ца яла чаннамурну, гъилимурну хIисав дан багьлай бухьунссар ноябрь зурул махъра-махъсса алхIаткьини кIицI лагайсса Ниттил кьини. Му кьини гьар шинах Каспийскалий шайссар чIярусса мероприятияртту. Миннувасса ца дия «Матери России» Щалагу Аьрасатнал суккушиндарал Региондалул отделениялул штаб бусса шагьрулул Хъунмур библиотекалий.
Бадрижамал Аьлиева
Ва кьини шиккун оьвкуну бия Дагъусттаннай цалва къуллугърал буржру лахълай жанну дуллусса 7 пограничникнал щахъаннийн. Ва даву щаллу дурну дия Аьрасатнал Федерациялул ФСБ-лул Дагъус_ттаннаймур Управлениялул, оьрмулува лавгсса цалва уртакьтурал кулпатирттан кумаг баву, миннал багьу-бизулувусса, оьрмулувусса захIматшивуртту ялун личин даву мурадрай.
Дазу дуруччайминнал управлениялул кадрардал отделданул начальникнал хъиривчу Александр Ребровлул увкунни:
— Аьраличунал кулпатну бушиву – му хъуннасса жаваблувшинна дусса давур. ЛасурваврацIа хьусса зулмур иширавурив, тIурча, кIилий ххишаласса жаваблувшинна дур, цанчирча оьрчIру тарбия баву зул хъачIунттайн дагьну тIий. Ва шадлугъ жу хас дуварду Ниттил кьинилун, гьарца кьинисса къайгъурдая, иширттая зу цахъи бухьурчагу бигьалаган баву мурадрай. ЧIа тIий ура зун цIакьсса цIуллу-сагъшиву, талихI, дакьаву.
Ванал махъ лавхъун махъ ща­хъаннин дуллунни тIутIив, Дазул управлениялул «Махъва-махъсса бару» («Последний рубеж») тIисса вокально-инструментальная группалул, тIурча, вайннан пишкаш бунни «Хъамабивтсса полк» тIисса балай.
Гихунмай хъами барча буллалисса ихтилат бунни ва миннан барчаллагьрал грамотартту дуллунни «Аьрасатнал нинухъру» тIисса суккушиндарал Региондалул отделениялул председатель, ДР-лул Солдатътурал ниттихъал Каспийскаллалмур филиалданул председатель Таиса МахIаммадовал.
Махъ лавхъунни православ­ный килисалул къуллугъчи, МахIач­къалаллал епархиялул секретарь Отец Иоаннул:
— Евангелиелий увкуну бур: «Нет больше той любви, как если кто положит душу свою за други своя». Зул ласурваврал цалва оьрмурду цайминнахлу буллуну бур, мунийну дикIайкунсса ччаврил мисал ккаккан бувну. Му чулуха зу талихI бусса инсанталлу. Зу ва зул оьрчIру хъунмасса пахрулий бикIан аьркинссару гайнная. Заннал инсантуран гьан дувайссар личIи-личIисса захIматшивуртту, мунищала архIал булайссар ми дух дувансса гужгу, дулайссар рахIатшивугу. На чIа тIий ура зун рахIатшиву, зуща зерххумур зул оьрчIаву лякъиннав, миннал щаллу даннав тIий, — увкуна мунал.
Шадлугъ наниссаксса хIаллай лахълахъисса мукъурттил лях-карах балайрдугу тIий бия «Последний рубеж» ансамбльданул балайчитал.

Энергетикалул колледжрал актовый залданувун Ниттил кьини кIицI лаган бавтIун бия педагогтал, студентътал ва миннал нину-ппу. Бусравсса хъамалну бия «Аьрасатнал нинухъру» тIисса жяматийсса суккушиндарал Регионал отделениялул каялувчи Таиса МахIаммадова ва Каспийскаллал шагьрулул администрациялул культуралул управлениялул хъунмур Пайзанат Абачараева.
Шадлугъ тIиртIуна Таиса Темировал ва ва колледжрал хорданул щаллу дурсса «Аьрасатнал нинухъру» суккушиндарал гимнрайну.
Ва кьини къачансса барчаллагьру, бусраврал махъру тIий бия хъаннихь-педагогтурахьгу. Колледж­раву дарс дихьлахьисса чIявусса оьрчIру бусса хъаннин Таиса Билаловнал дуллунни грамотартту ва бахшишру. Таиса Билаловнан цинна, тIурча, Каспийск шагьрулул бакIчи МахIаммад Аьбдуллаевлул цIания дуллуна грамота, шагьрулул ва республикалул жяматийсса оьрмулуву бихьлахьисса хъунмасса захIматрахлу.
Энергетикалул колледжрал директор Арслан Хаппалаевлул хьхьичIунсса студентътурал ни­ттихъан дуллуна грамотартту.
Ниттихъал байран цалва номердайну чIюлу дуруна Дагъус­ттаннал цIа дурксса артистурал, МахIачкъалаллал 43-мур школданул «Ссалам» ансамбльданул. Колледжрал студентътуралгу нитти­хъан хасну хIадур бувну бия цалвами номерду.

Ниттил кьини лахъа-хъунну хьунадаркьунни Каспийскаллал ОьрчIал поликлиникалул коллективралгу. Байрандалийн ни­ттихъул бувкIун бия цалва мюрщулт­ращал, амухъул – цалва оьрчIал оьрчIащал.
Нинухълу барча буллалисса махъ лавхъуна Каспийскаллал шагьрулул хъунмур азарханалул хъунама хIакиннал хъиривчу Наида ЯрахIмадовал, «Аьрасатнал нинухъру» суккушиндарал Регионал отделениялул председатель Таиса МахIаммадовал. Ва суккушиндарал чулуха Таиса Билаловнал чIявусса оьрчIру бусса ниттихъан дуллунни ХIурматрал грамотартту.