Майрал 19-нний ниттил мазру ябаврил, буруччаврил хIакъираву пресс-конференция бунни ДР-лул дуккаврил ва элмулул министр Шагьаьппас Шагьовлул Журналистътурал союзрал къатлуву.

ХIасан Аьдилов
Министрнал ихтилат байбивхьунни ниттил мазурдил дарсру дишаврия. «Ниттил мазурдий дарсру дишаврил масъала – яла захIматми масъаларттавасса ца хъанай бур. Жул цIанасса буруккинттавасса ца бур Да­гъусттаннай ниттил мазру ябаву, жу луглай буру мазру ябансса, буруччинсса чараннах. Цуксса хIайпнугу, махъсса 1-2 шинай дурсса давурттал хIасиллу пашман буллалисса хьунни», — увкунни Ш. Шагьовлул.
Министрнал мукунма бувсунни ниттил мазру сахла баврил мурад бикIан аьркинну бушиву кIантту-кIанттурдайгу – муниципал сакиншиннал бакIчитурал, дуккаврил организациярдал каялувчитурал, дуклаки оьрчIал ва миннал нитти-буттахъал. Ганал мукъурттийн бувну, цIана шагьрурдай бакъасса, хIатта районнайгума, цалва ниттил мазурдий гъалгъа къатIий, оьруснай гъалгъа тIун хIарачат буллай бур. Му мукун бушиву исват бунни журналистътуралгу.
Ш. Шагьовлул бувсунни ниттил мазурдийсса луттирду итабакьаврил хIакъиравугу. Министрнал мукъурттийн бувну, луттирду итабакьаврил хасъсса даву дуллай бур Тахо-Годил цIанийсса педагогикалул элму ахттар даврил институтращал хIала-гьурттуну. Амма хъинну чансса бур ниттил мазурдийсса луттирду чичин хIадурсса инсантал. Му бур яла хъунмур ва захIматнийн багьсса масъала. Ганал увкусса куццуй, Да­гъусттаннал 33 мазрай дарсирдал луттирду итабакьаврин хасъсса даву гьашину дан тIий бур, амма бакIрай хIадуршин дан аьркинни.
Министрнал бувсунни ведомствалий хIадур буллай бушиву ниттил мазурдил учительтуран ялун ххи бувсса стимулирующий коэффициент ишла баврил масъалагу. Му даву дуллай бур учительтал цалла даву дуллай шяраваллаву личIаншиврул, шагьрурдайн къалихъланшиврул. Журналистътурал чIявусса суаллу буллай бия министрнахьхьун, бия ЕГЭ дулавриву дахханашивур­тту шаврил хIакъиравуссагу. Масалдаран, ца журналистнал бувсунни ниттил мазрал экзаменгу дулун буллали бан аьркиншиву, мазру сахла баву мурадрай. Дуклаки оьрчIаясса ниттил мазрал чулухасса тIалавшин кIулну, оьрчIалгу цалва мазрахсса къулагъас ххишала дулланссар тIисса пикрилий. Шагьаьппас Шагьовлул махъ буллунни юристътуращал маслихIатгу ккавккун, ца хIукмулийн учIан­шиву.
Гьалбатта министрнал тамансса бувсунни майрал 25-нний дайдихьлахьисса Цасса ПаччахIлугърал Экзамендалул хIакъиравугу.
Ганал увкусса куццуй, ларгсса шинайннин Дагъусттаннай ЕГЭ-рал баллу лавайсса бикIайва, амма дукIу тагьар даххана хьу­ссар – утти экзаменну тIайлану, марцIну дуллалиссар.
«ДукIу экзаменну дулаврийну жун бувчIунни жулва оьрчIал дуккаву, кIулшиву ласаву ци даражалий дуссарив. Утти нину-ппу репетитортурал хъирив буклан бивкIунни, цанчирча экзамен багьлух ласаврия пайда бакъашиву чIалан бивкIунни», — увкунни министрнал.
Ш. Шагьовлул бувсунни гьашину ЕГЭ дулавриву хьунтIисса дахханашивурттаятугу. Ганал бувсмунийн бувну, гьашину ЕГЭ дуллалисса циняв кIанттурдай дикIан тIий дур онлайн трансляция, яни экзамен дуллалисса тагьарданул видеочIалачIин. Майрал 25-нний Москавлия бучIантIиссар Рособрнадзорданул каялувчинал хъиривчу ва 170 федерал инспектор, ми ЕГЭ-лул ялув бацIантIиссар. Циняв экзаменнал давурттугу тIайла дуккантIиссар билаятрал цайми регионнай ххалдуван. Дагъусттаннайн дучIантIиссар ххалдуван цайми регионнал давуртту.
Министрнал ялагу бувсунни оьрчIал садикирттал щаллу баврил масъалалул хIакъиравугу.
Журналистътурал суалла­хьхьун жавабру дуллай, министрнал бувсунни школардал тагьардая, гай кьай-кьуйлул щаллу баврияту, чансса оьрчIру бусса школардал бакIрачIан бучIанмунияту ва цаймигу масъа­ларттал хIакъираву.
Лажин хIадур дурссар
ХI. Аьдиловлул