Кьунияхъайсса шинну хьунни Совет Союз пасат хьуния махъ Дагъусттаннайсса Каспий хьхьирил зумарду, пляжру марцI бан къахъанай, хьхьиривун шагьрулия нанисса чапалсса щинну дацIан дан къабюхълай. Цамур бакъахьурчагума, МахIачкъалаллал пляжвагу низамрайн буцин хъанай бакъар. Чапалсса щин шагьрулия хьхьиривун найнна дур ттигу.

Гьар шинал кунма, майрал 15-нний гьашинугу тIитIин аьркинссия хьхьиривун бучIаврил чIун, амма уттигу ихтияр къадуллунни ДР-лул Роспотребнадзорданул Управлениялул, пляжрачIасса щин чапалсса дуну тIий. МахIачкъалаллал пляжраяр ххишала Дагъусттаннай бур 11 пляжрал кIанттурду, амма миннувату цавагу зий бакъар закондалийну, цанчирча миннучIа дакъар санитарно-эпидемиологическое заключение халкь хьхьирил щинавун бучIлан ихтияр душиврул хIакъираву. Агарда июньдалул 1-нин ми пляжру низамрайн къабуцирча дагьайсса давуртту дурну, ми кIанттурдай щинавун бучIан къадагъа дишинтIиссар, увкуну бур Роспотребнадзорданул каялувчинал.
ДукIу хьхьиривун нанисса чапалсса щинал хьхьичIалу кьукьин аьркиншиврул хIакъираву судрайн чивчуну бивкIссар, буссар чапалсса щин хьхьиривун экьигьан къадагъа дишаврил хIакъиравусса судрал хIукмугу. Амма хIажатханттавасса щинну уттигу найнна дур хьхьиривун.
Вай гьантрай, майрал 14-нний, ДР-лул ХIукуматрал Пред­седательнал хъиривчу МахIаммад Исяевлул каялувшиврулу ххалбивгьунни Каспий хьхьирил зумарду, пляжру низамрайн буцаврил хIакъиравусса масъалартту, хъиривмур кьини хьхьиривун бучIаврил чIун дайдишаву хIисавравун ларсун.
Тикку ихтилат буллай, Ма­хIам­мад Исяевлул бувсунни чIявуми пляжру чапалну бушиву (совещание хьун хьхьичIми гьантрай пляжирттал марцI-чапалшиву ххалдурну диркIссар Роспотребнадзорданул зузалтрал).
Совещаниялий МахIаммад Исяевлул увкусса куццуй, 2014 шинал Дагъусттаннайн бувкIун бивкIссар 330 азаруннаяр ххишаласса туристътал. Республикалул пляжру муданма бувцIуну бикIай инсантурал. Мунияту аьркинни иширайнусса дахханашивуртту дуван гъинттул халкь бигьалагайсса, щинавун бучIайсса кIанттурдай.
ДР-лул Туризмалул комитетрал председатель Виталий Демченколгу тасттикь бунни МахIачкъалаллал, Каспийскаллал, Избербашуллал, Дарбантуллал ва Къарабудахккантуллал ва МахIарамккантуллал районнайсса пляжру къаххуйсса тагьарданий бушиву, таман­сса диялдакъашивуртту душиву ва ччясса мутталий миннул­сса буван аьркиншиву. Ганал му­къурттийн бувну, пляжрал зонардай чара бакъа бикIан аьркинни янна даххана дайсса кабинарду, хIачIайсса щин дусса фонтанну, хIажатханартту, цIинцI-ччюрк дичинсса контейнерду. Миккува бикIан аьркинни медпункт, полицанал къатта, ххассал байсса станция, пляжрал администрация ва цаймигу.
Совещаниялул хIасиллу дуллай, вице-премьернал тапшур бунни тагьар тIайла дацIан дансса давурттал план дуван. Мунийн бувну ца нюжмардул дянив Туризмалул комитетран аьркинссар «дорожная карта» хIадур дан, яни щаллу дан аьркинсса давурттал сияхI дуван, давурттахлу жаваб дулаймигу ккаккан бувну. Му бакъассагу, гьарца пляжрал зоналуцIун цIакь уллалиссар хасъсса шагьрулул, райондалул администрациялул зузала давурттай контроль баншиврул.
Ва темалул хIакъираву жу утти­гу чичинну зурул ахирданий.