Хъинну ххуйну, царагу жагъаласса, кIанийн къадуртсса даву янилун къадагьанну хьунадаркьунни Ккуллал райондалий Ххувшаврил байран. Ххарисса ва пашмансса пикрирду дакIурдиву хIасул буллалисса байран хьунни ва.  Дяъвилий талай бивкIсса цала буттахъал, ттаттахъал суратру ларсун най бия байрандалувух гьуртту хъанахъими. Вай суратирттал мугьалттуйнгу «Бессмертный полк» тIисса цIа дирзун дия.

Ккуллал райондалул райцентрну хъанахъисса Ваччиял шяраву, байрандалийн хIадур хъанай, хъинну чIярусса, янилун дагьлагьисса давурттив дунни. Майданнийх ва муничIансса ххуллурдайх асфальт бавкьунни, чIярусса баннерду лачIун дурну дия чIирттайн. Бакьин бунни ялтту райондалул Досуговый центр. Майданнив дацIан дунни СССР-данул кIийла Виричу хьусса АхIмад-Хан Султаннун гьайкал. Бунни Вирттаврал аллея. ЧIяйннал шяраваллил шанбачIулий дацIан дунни СССР-данул Виричу ЦIаххай Маккаевлун гьайкал. Дакьин дунни циняв шяраваллавусса гьайкаллу. Райондалул шяраваллавух буккан бунни «Аьпалул лу». ХIасил, дурсса давурттив циняв кIицI дулларча, хъуннасса сияхI хьунссар.
Ваччав Ххувшаврил байран дунни майрал 8-нний. ХьхьичIми кьинирдай гъараллу лачIлай диркIнугу, га кьини баргъ бивтсса, чаннасса хьуна. Райондалул администрациялул хьхьичIсса кIичIиравалу бувцIуну бия инсантурал. Вайннал каруннахь дия цалла-цалла шяраваллава дяъвилийн лавгсса чиваркIуннал суратру, транспорантру, ттугъру. ЧIявусса инсантал бия аьрали яннардаву, Георгиевлул лентарду хъазамравун лачIун бувну. Кьюкьлул хьхьичI ия, Дагъусттаннай хIасул бувсса балчантрал кавалериялул полкрал ца бутIану хъанахъисса, 4 балчаннуйсса бурттигьу. Вайннал хъирив най бия дяъвилул чIумалсса «полуторка» машина, кузоврай чяйлущалсса самовар ва саллатIнал каша бусса хъунмасса кIюххи бусса.
Гьай, яшасун, Лакку билаят­рал вирттал, ва шадлугърал сценарий чирчуми!
Шиккува кIицI буван, ва сценарий чирчуссар Ккуллал райондалул бакIчи Сяид Сулаймановлул, цала маслихIатчинащал ва пресс-секретарь Хизриев Шамххаллущал, мукунма гьур­тту хьуссар ва давривух райондалул Ветерантурал советрал председатель Загьидиев Аьбдул ва администрациялул цаймигу къуллугъчитал.
Гьавас хъиннува гьаз буллай бия лагмасса кIяла бакIур­дищалсса зунттурдал. Вай, тя­хъашиврийн бавтIсса инсантурайн икрам буллай, бакIру кьус дитан хIарачат буллалисса хханссия.
Ккаккан дурсса чIумуву, ссят 10-нний, райондалул жямат байрандалущал барча буван бувкIсса хъамал хьхьичIну, кьюкьри дарчуна. Хъамаллурал тIивтIуна Досуговый центрданул хIаятравусса Вирттаврал аллея. Лента кьувкьунни Лакрал райондалул бакIчи МахIаммадов Юсуплул, хьхьичIава Ккуллал райком партиялул цалчинма сек­ретарьну зий ивкIсса Абакаров Рапинал ва Ккуллал райондалул бакIчи Сулайманов Сяидлул. Вайннащал ия райондалий ялапар хъанахъисса дяъвилул шама ветераннавасса ца Самедов Садикь. Ванахь бия Берлиннай бивщусса ттугълил копия.
Ваччиял майдандалий тIиртIуна АхIмад-Хан Султаннул гьайкал. Виричуная кутIану бувсуна Сулайманов Сяидлул. Гания махъ хъамал гьаз хьуна цIуну бакьин бувсса майдандалул лулттучулийсса сахIналийн. Хъамаллуравух бия: Ахъушиял райондалул бакIчи МахIарамов АхIмад, Лакрал райондалул бакIчи МахIаммадов Юсуп, ДР-лул Халкьуннал Мажлисрал депутатътал Давдиев Камил, Аьлиев ХIасан, Айдаев МахIаммад, «Илчи» кказитрал дус, Кисловодскалий яхъана­хъисса заргал ва Лакку билаятрал патриот АхIмадов Аьлил. Ва кьини Аьли­ллун дуллуну дия «Почетный гражданин Кулинского района» тIисса хIурматрал цIа. Барча, Аьлил, вил цIа!
Бия, мукунма, 1-мур ЦIув­кIуллал шяраваллил вакилтал гьайкал дуллалиний чIарав бавцIусса ва цаймигу хIурмат лавайсса хъамал. Гания гихуннай цалла даву дачин дурна ва шадлугъ дачин дурсса Хизриев Шамххаллул.
Дяъви байбивхьусса кьини дакIнийн дутлай, майданнивсса радиолувух баллан бивкIуна Левитаннул чIу. СахIналул хьхьичI бавцIуну бия га чIуних вичIидирхьусса жагьилтал. Яла гай, цала вещмешокругу хъарацIун бивчуну, душманнащал талан лавгуна. Хизриев Шам­ххаллул кутIану бувсуна дяъвилул шиннардий СССР-данул инсантурал ккурхIусса аькьуварттая, агьамсса талатавурттая. Махъру лавхъуна, Ккуллал райондалул агьалинал дурсса гьурттушиннарая буслай, Сулайманов Сяидлул. Ккуллал райондалул жямат байрандалущал барча буллай, ххуй-ххуйсса махъру лавхъуна МахIарамов АхIмадлул, МахIаммадов Юсуплул, Давдиев Камиллул, Загьидиев Аьбдуллул ва цайминнал. Баян бувуна «Минута молчания». Кьамул бувуна оьрчIру «Ахмедхановцынал» кьюкьравун.
Ккуллал райондалул бакI­чинал ва байран хIадур дуллай чIарав бавцIусса инсантуран Барчаллагьрал чагъарду буллуна, дяъвилий ва муния махъ ласру ливтIусса хъаннин арцуйнусса ва дуки-хIачIиялийнусса бахшишру дуллуна.
Шиккува, майдандалул ца зуманив чятирду бавкьуну, тIивтIуну бия саллатIнал каша буллалисса ссупра.
Ккуллал райондалул культуралул зузалтрал ва республикалул балайчитурал хIадур дурну дия хъинну ххуйсса концерт.
Гъарал лачIлан дикIавай, марххала буллан дикIавай, дунияллул тагьар даххана хъанай дунугу, байран хъинну ххуйну ларгунни. Райондалул бакIчи Сулайманов Сяид дуллалисса давурттачIату ца шаттирал ти-шинай къахъанай, ялув авцIуну ия. Куннах куннал вичIидирхьуну, пикрирду кIибачIлачIисса чIумал, укун ххуйсса давурттив дуван шай­ссар. Щихь цIуххирчагу байрандалия, гьарцаннал учайва: «Грандиознайну, царагу жагъалашиву хьун къадиртун, эстетикалул чулуха чIявусса пикрирду чантI учин буллалисса кьяйдалий ларгунни», — куну.
Яраппий, я Аллагь, ва байран ялунчIингу хьунадакьин жу­хьхьунна цIуллушиву дулуннав!