Майрал 8-10-нний Каспийск шагьрулий най дия Хъунмасса Буттал КIанттул цIанийсса дяъвилий ххув хьуну 70 шин шаврин хас дурсса лачIун буккаврил Аьрасатнал чемпионат.

ХIасан Аьдилов
Шадлугърал тагьардануву турнир тIитIавриву гьуртту хьунни Дагъусттаннал БакIчи Рамазан АьбдуллатIипов.
Чемпионат сакин дурссар Аьрасатнал Спортрал министерствалул, АьФ-лул ЛачIун буккаврил федерациялул, ДР-лул Спортрал министерствалул, Дагъусттаннал лачIун буккаврил федерациялул. Чемпионатрай гьуртту хьуссар билаятрал 40 региондалиясса спортсментал.
Спорткомплексрал трибунар­ттай бия чIявусса бусравсса хъамал, миннавух – олимпий чемпионтал, дунияллул ва Европанал чемпионтал. Миннавух – 1988 шинал Олимпий тIуркIурдал триумфатор, Аьрасатнал лачIун буккаврил федерациялул Президент Михаил Мамиашвили.
Чемпионат тIитIаврий махъ лахълай, Рамазан Аьб­дуллатIиповлул бувсунни Михаил Мамиашвилил хъунмасса хIарачат бувшиву ва журалул спорт Олимпий тIуркIурдаву личIаншиврул, Дагъусттаннан хъунмасса хIурмат бувну бушиву лачIун буккаврил билаятрал чемпионат жулла республикалий дурну.
Дагъусттаннал БакIчинал Михаил Мамиашвилин, шамийла олимпий чемпион Бувайсар Сайтиевлун ва Аьрасатнал лачIун буккаврил федерациялул вице-президент Оьмар Муртазялиевлун дуллунни Дагъусттаннал яла лаваймур даражалул награда – «За заслуги перед Республикой Дагестан» тIисса орден.
Яла байбивхьунни цалчин кьинилул бяст-ччал. Га кьини лачIун буклай бия 65 ва 86 килорал кIушиврий.
65 килорал кIушиврий ххув хьунтIиссар тIий буссия я да­гъусттанлув Европанал чемпион МахIаммад Кьурбанаьлиев ягу осетин, дунияллул Чемпион Сос­лан Рамонов. Амма миннавату цаягу ххув къавхьунни: Рамоновлул ларсунни арцул медаль, Кьурбанаьлиевлул тIурча – чарвитулсса. Мусил медальданун лайкь хьунни Къаяккантуллал райондалиясса Илияс Бекбулатов.
86 килорал кIушиврий лачIун уклай ивкIсса цIанасса дунияллул чемпион Аьбдурашид Сяъдуллаев ххув хьунни цала ватанлув Шамил КIудиявмахIаммадовлуяр. Чарвитулми медаллу ларсунни осетин Сослан Кцоевлул ва Кабардин-Балкарнавасса Анзор Уришевлул.
Чемпионатрал кIилчинмур кьини бяст-ччал хьунни 61, 74 ва 97 килорал кIушиврий.
97 килорал кIушиврий Аьрасатнал чемпион хьунни Дагъусттаннал лачIунукку Аьбдуссалам ХIадисов, ва ххув хьунни Ухссавнил Осетия-Аланиянал спортсмен Владислав Байцаевлуяр 5:0 счетрайну. Мура кIушиврий чарвитул медаллу ларсунни Чачаннал Республикалиясса Адлан Ибрагьимовлул ва дагъус­ттанлув МахIаммад Ибрагьимовлул.
Га кьини Аь. ХIадисовлуяр ххи­шала мусил медаль ларсунни бурят Александр Богомоевлул, ва ххув хьунни 61 килорал кIушиврий олимпий чемпион, Москавуллал аьраличу Жамал Отарсултановлуяр. 74 килорал кIушиврий мусил медальданун лайкь хьунни Кабардин-Балкарнал лачIунукку Аниур Гедуев, финалданий ва лачIун увкссар осетин Станислав Хачировлущал.
61 килорал кIушиврий чарвитул медаллу ларсунни ХIажимурад Рашидовлул ва Рустам Аьбдурашидовлул. 74 килорал кIушиврий 3-ми кIанттурду бувгьунни АхIмад ХIажимурадовлул ва ХIабиб Батировлул (циняв дагъусттанлувталли).
Чемпионатрал 3-мур кьини лачIун буклай бия 57, 70 ва 125 килорал кIушивурттай.
57 килорал кIушиврий ххув хьунни Саха (Якутия) республикалиясса Виктор Лебедев. Финалданий ванал муттаэну ия жула Исмяил Мусакаев, Лебедев ванаяр ххув хьунни 2:1 счет­райну. Мура кIушиврий чарвитул медаллу дурххунни Тува республикалиясса Дондок-Оол Хурешлул ва Дагъусттаннал лачIунукку Нариман Исрапиловлул.
70 килорал кIушиврий мусил медаль ларсунни Ставрополлал крайраясса МахIаммадрасул ГъазимахIаммадовлул. Финалданий ва ххув хьуссар Красноярскаллал крайрал вакил увсса Исрапил Кьасумовлуяр 9:0 счетрайну. Шамилчинми кIанттурду бувгьуссар Чачаннал Республикалиясса Расул Джукаевлул ва Бурятиянал Респуб­ликалиясса Евгений Жербаевлул.
Яла лахъмур кIушиврий (125 кило) ххув хьуссар Ухссавнил Осетиянавасса олимпий чемпион ХIажимурад Гоцалов. Ва финалданий лачIун увкссар Самаралиясса Эдуард Базровлущал. Чарвитул медаллу ларсъссар вара кIушиврий Чачаннал Республикалиясса Бекхан Дукаевлул ва Дагъусттаннаясса Мурадин Кушховлул.
Чемпионатрал хIасиллу дуллай, Михаил Мамиашвилил бувсунни рязину ушиву бяст-ччаллу лавайсса даражалул сакиншиннарай хьушиврия. Ганал барчаллагь увкунни Дагъусттаннал БакIчи Рамазан АьбдуллатIиповлухь ва ХIукуматрал Председатель Аьбду­ссамад ХIамидовлухь ххуйну кьамул баврихлу ва кумаг баврихлу.