Щалвагу Аьрасатнал билаятрай бюхттулну кIицI дунни Хъунмасса Буттал КIанттул цIанийсса дяъвилий Ххувшаву ларсун 70 шин хъанахъисса юбилей. Цинявппагу шагьрурдай, районнай дакIнийн бивчунни Бюхттулсса Ххувшаву гъан дуллай къучагъшиврий жанну дуллусса вирттал. Ххаллилсса давуртту дунни Ххувшаврил юбилейрал гьантрай ЦIуссалакрал райондалийгу.

Андриана Аьбдуллаева
Дяъвилул ва захIматрал ветерантурал бувсса захIматран кьимат бишлашисса, миннал чувшиврун хIурмат буллалисса цикссагу давуртту най дия шинал лажиндарай ЦIуссалакрал райондалий. ЛяличIинура кIицI лагансса ххаллилсса давуну хьунни ЦIуссалакрал райондалиясса 22 дуклаки оьрчIал Виричунал цIа ларсъсса, бусалардавун багьсса Волгоград шагьрулийнсса аьрххи. Ми бивунни шагьрулия арх бакъасса, Совет Союзрал Виричу Ханпаша Нурадилов увччусса, Букановская тIисса станицалийн. ОьрчIру бучIаннин хIадур дурну дия вай буцинсса экскурсиярдал маршрутругу, бацIансса гостиницагу. ОьрчIащал ва аьр­ххилийн лавгунни учительтал ва оьрчIал хIакин. КIива гьантлий оьрчIру бивунни Волгог­радрай Ххувшаврил дайдихьу дурсса яла къизгъинми талатавуртту най диркIсса кIанттурдайн. ХьхьичI кьини вай бувцунни Букановская тIисса станицалийн. Шикку 1942 шинал оьсса талатавурттаву къучагъшиврий жан дуллуну дур Да­гъусттаннал миллатрал язисса арс, Совет Союзрал Виричу, ЯтIул ЦIукул ва ЯтIул Ттугълил орденнал кавалер Ханпаша Нурадиловлул. Букановская станицалул Культуралул къатлул директорнал бувсунни оьрчIахь цалла жандалий хIайп къаувкуну Волгоград буручлай ивкIсса Виричу Ханпаша Нурадиловлуя.
Хъиривмур кьини оьрчIру бувцунни Волгоград шагьрулийн. Вайннан кка­ккан дунни ва шагьрулий яла машгьурмину хъанахъисса – Мамаев Курган ва «Родина-Мать» тарихрал гьайкаллу. ОьрчIан хъинну асар хьунни «Сталиннул Бункер» тIисса музейравунсса экскурсия.
Дяъвилул тарих ялу-ялун арх буцлацисса цIанасса чIумал укунсса аьрххилул агьамшиву хъинну хъуннасса дур. Ва хьунни ялун нанисса никиран тарих лахьхьаврилгу, лавгмунил кьадру-кьимат баврилгу, ми Ватан ххирану тарбия баврилгу гьанурду цIакь буллалисса ххаллилсса даву.
Учительталгу, нину-ппугу хъунмасса барчаллагь тIий бур, щала харжлугъ цала бакIрайн ларсун, оьрчIру ва аьрххилийн тIайла бувксса ЦIуссалакрал райондалул администрациялул бакIчи ХIажи Айдиевлухь. Ва оьрчIан хъунмасса хIаллай дакIний личIансса, мюнпатсса аьрххи хьунни.