Шиная шинайн хъуннасса къулагъас дуллай бур Лак­рал райондалий дуклаки оьрчIру ва жагьилтал спортрахун машхул баврил чулухуннай. Ччя-ччяни шай кIий хъун хъанахъисса ник цIуллу-цIакьну тарбия даву мурадрай, ми оьмуния, оьккимуния буруччаву мурадрайсса, жура-журасса спортрал турнирду, бяст-ччаллу, тIуркIурду.

Миннува цаппарасса аьдатравун багьну бур. Гьарца шинал шай­ссар «Лакрал район» МР-данул бакIчинал завалунсса футболданул турнир, райондалул КIулшиву дулаврил управлениялул кубокрансса футболданул турнир, Ххувшаврил кьинилун хас бувсса спортрал личIи-личIисса тIуркIурдал бяст-ччал – «Президентские состязания» (ДР-лул КIулшиву дулаврил ва элмулул министерствалул сакин дурсса) тIисса ва «Президентские спортивные игры» (ДР-лул Спорт­рал министерствалул сакин дур­сса) щалвагу Аьрасатнал дуклаки оьрчIал дянивсса спартакиада. Райондалул спорткомитетрал ва кIулшиву дулаврил управлениялул сакиншиннарайну бигьалагай кьини Гъумук ларайсса сакиншиннарай хьунни аьдатравун дагьсса му спартакиада.
ЦIунцIия хьунан кумаг бан къаралданий бия «Анаварсса кумаграл» машина, бяст-ччаллил низам зия къадан къаралданий бия полицанал зузалт.
Гьуртту хъанахъиминнансса ах­ттайнсса дуруна КIулшиву дулаврил управлениялул харжлугърах.
Бяст-ччалливу гьуртту хьунни 14 школалул дуклаки оьрчIру, 300 – нния ливчусса дуклаки оьрчIру.
Бяст-ччаллил программалувун духлай дия ка дишаву, 16 кг. кIушиву дусса пут личаву, 1500 метралийх лечаву, 100 х 4 эстафета лахъишиврий тIанкI учаву, чару личаву ва цаймигу (душварал ва оьрчIал дянив).
Бяст-ччаллил хIасиллу дунни 5-9-ми классирттаву дуклакиминнал дянив ва 10-11-ми классирттаву дуклакиминнал дянив личIи-личIину.
10-11-ми классирттал дянив 1-мур кIану бувгьунни Гъумучиял школалул командалул, 2-мур кIану – ГьунчIукьатIрал школалул командалул ва 3-мур кIану – Кьубиял школалул командалул.
5-9-ми классирттал дянив 1-мур кIану бувгьунни Гъумучиял лицейрал командалул, 2-мур кIану – Гъумучиял школалул командалул, 3-мур кIану – ГьунчIукьатIрал школалул командалул.
ХьхьичIун дурксса командар­ттан бахшишру дуллалисса шадлугърай гьуртту хьунни райондалул КIулшиву дулаврил управлениялул каялувчи Явсупи ХIамзаев, Спортрал ва физкультуралул комитетрал хьхьичIунсса пишакар Малик ХIусманов, ОьрчIащалсса ва жагьилтуращалсса даврил отделданул каялувчи МахIаммад Гадаев, Ккурккуллал школалул директор Даниял Магьдиев.
Цинявппагу гьуртту хьуминнан райондалул КIулшиву дулаврил управлениялул буллунни дипломру, хьхьичIунсса кIанттурду бувгьусса командарттан дуллунни спорткомитетрал чулухасса бахшишру – футболданий, волейболданий ва баскетболданий буккайсса ттупру. Ххув хьуми командарттан буллунни райондалул спорткомитетрал кубок.