Барият Мурадовал цIанийсса Дагъусттаннал Культуралул ва искусствалул колледжраву ччянира цIакь хьуну дур аьдат гьарца дуккаврил шинал ахирданий — гьарца курс къуртал буллайна, студетътурал цанма кIулмур, лавхьхьумур ккаккан буллалисса концерт ккаккан дуллалисса (отчетный). Апрельданул 25-нний ва Колледжрал студентътурал ккаккан дунни мукунсса концерт.

Колледжрал актовый зал щапI увкуну бувцIуну бия хъамаллурал. Миннавух бия республикалул жяматийсса ва культуралул оьрмулуву хъинну ххуйну кIулссагу: министртурал хъиривчутал, музыкалул, актернал магьиршиврул кIулшиву дулайсса дуккаврил идарарттал бакIчитал, республикалий ва мунил кьатIув машгьурсса балайчитал ва къавтIалт — ва Колледжрал выпускниктал.
Концерт дайдирхьунни Колледжрал студентътурал ва преподавательтурал, залданувуциригу бивзун, Аьрасатнал Гимн учаврийну. Ва ххуллухмур концерт хас дурну дия Бюхттулсса Ххувшаврил юбилейран. Концертрал гьарцагу номердануву чIалай дия совет инсантурал гай шиннардий дурсса чувшивуртту, бюхттулсса державалул цIанихсса тарихрал лажинтру. Студентътурал хъинну усттарну увкунни аьрали балайрду, ккаккан дунни къавтIавуртту. Колледжрал чIава актертурал магьирну ккаккан бунни душманнащалсса талатаврил сценка, махъва-махъсса ссихIирачIагу жулва саллатI ватан дуручлай бивкIсса куц. Мунилгу, мукунма «Ты же выжил, солдат» балайлул ва цаймигу аьрали балайрдал залдануву щябивкIми хъювусул буккан бувна. Концертрал цинявппагу номерду цаннияр ца ябацIансса бия.
Ва концертрал программалуву хъунмасса бутIа бивхьунни жулва, лакрал, преподавательтурал ва студентътуралгу. Муданна кунна, тамашачитурал хъинну ххуйну кьамул дунни Колледжрал преподаватель Наргиз ДалхIатовал (ш. Ккул) каялувшиннаралусса коллективрал къавтIавуртту. Жагьилсса къавтIалтрал гьарцагу шаттираву чIалай дия гьунар бусса хореограф Наргиз Рамизовнал захIмат, хIарачат ва даврил кIулшиву. Цалва уттининсса оьрму щалва ва колледжрацIун бавхIуну ва колледж тIивтIусса гьантрая шихунай шиву зузисса преподаватель, ПЦК-рал (Предметно-цикловая комиссия) заведующий, 53 шинал дянив цимигу никиран кIулшивуртту ва тарбия дуллусса Жидалаев МахIаммадлул (ш. Гъумучи) каялувшиннаралу 3-мур курсирал студент Ибрагьим Рабадановлул (ш. Ххюлуссун) ва 4-мур курсирал студентка Равганият Зайпуллаевал (ш. Бархъал) увкунни лакку мазрайсса балайрду. Шиккува кIицI лаган, РавхIаният бувккун бур хъунмасса сахIналийн, уттинин чивчуну бур цаппарасса балайрду, лакрал тамашачитуран ванил цIа кIулссар. Ва колледжрал выпускник, оьрмулул шиннах къаурувгун, цалла даву ххуйну кIулсса ва му хъуннасса жаваблувшиннаращал дуллалисса жагьилсса преподаватель Ислам МахIаммадовлул (ш. Шахьуйми) каялувшиннаралусса дачIучитурал номергу залданун хъинну ххуй бивзунни. Цайва-цайва гьарцаннай къабацIларчагу, аьм­сса къавтIавурттавух, хорданувух гьурттусса жулва студентътал ялагу къачанъя.
Концерт нанисса сайки 3 ссят ларгунни кIуллагу дакъа. Концерт­рал программа къуртал хьунни «День Победы» балайлийну.
Ахирданий сахIналийн був­ккунни оьрчIал къавтIаврил «Счастливое детство» ансамбльданул каялувчи Шалуми Матаев ва ДР-лул Культуралул министерствалул искусствалул отделданул хъунмур Жамалуттинова Лилия.
— Буттал кIанттухсса дазу дакъа­сса ччаву, цалла усттаршиву, захIмат бивхьуну бур хIакьинусса ва концертрал гьарцагу номердануву преподавательтурал. ХIайпгума тIий ура ва давриву ттулва бутIа бакъашиврий. Хъунасса Зал мудангу жула ялув икIаннав, Культуралул министерство — мудан жулва чIарав, — увкунни Шалуми Самуиловичлул.
— ДакI ххари хъанай дия студентътурал дакIнийхтуну, цалла къюкIливух буккан бувну ккаккан буллалисса номердая. Хъунмасса барчаллагь Колледжрал каялувшиннарахь, педагогтурахь укун цимурцаннул пикри бувну сакин дурсса программалухлу, — увкунни Лилия ХIасановнал.
Цалва ихтилатирттаву хъамаллурал ялагу кIицI лавгуна уттигъанну республикалийн ххувшаврищал зана хьушиву Наргиз Рамизовнал каялувшиннаралусса ва колледж­рал ансамбль, студентътурал цайми-цайми шадлугъирттайгу, масалдаран, СССР-данул халкьуннал артистка Барият Мурадова ниттил бувну 100 шинал юбилейрайгу утти­гъанну тасттикь бувшиву шиву лавайсса даражалул педагогтурал коллектив зий бушиву.
— Жу гьарца шинал ахирданий дувайссар укунсса концертру. Циняв номерду, туну, укунсса концертирттавун бичин къашай. Укунмагу хIакьинумур концертраву бия 30 номер. ХIакьину сахIналийн бувкми бакъа, жучIа гьунар бусса жагьилтал цаймигу къачанссар. Амма ми цинявгу ца концертравух цалархIал гьуртту буван къашай. Жу хIарачат бувару гьарца журалул номерду буххан буван концертрал программалувун, оркестр тIий, халкьуннал балайрду, къавтIавуртту, цамур тIий. Вай концертирттал ххуйшивугу бахха-бахханасса номерду бушавриву дур. Жулва билаят булувкьуну хIадур хъанай бур Ххувшаврил 70 шинал юбилей хьунадакьин. Жугу тинмай къабавцIуру мукун агьамсса иширая, — тIий буслай ур концертрая махъ МахIаммад Сиражуттинович.
Лажин хIадур дурссар
Бадрижамал Аьлиевал