Майрал 9-нний МахIачкъалаллал Хъун майданнив хьунни Хъунмасса Буттал КIанттул цIанийсса дяъвилий Ххувшаву ларсун 70 шин шаврин хасъсса парад. Майданнив бавтIун бия ветерантал, аьраличалт, МВД-лул виваллил аьралуннал бригадартту ва чIявусса шагьрулул инсантал.

Парадрал хъунаману ия 102-мур бригадалул 7629-мур аьралуннал частьрал командирнал хъиривчу полковник Тимур Шарипов.
КIюрххил 9 ссятраву майданнив ккаккан дуллан бивкIунни Ххувшаврил Кьинилун хас дурсса концерт.
Парадрай махъ лахълай, Да­г­ъусттан Республикалул БакIчи Рамазан АьбдуллатIиповлул бувсунни дагъусттанлувтал пахрулий бушиву 9-мур майрал байрандалия, мукунма Ватан дуручлай бивкIминнайн барчаллагьрайгу бушиву, пашман­сса пикрирдугу хIасул хъанай бушиву чIявусса гъан-маччасса, ватанлувтал зана къавхьуну тIий. Цанчирча Совет халкьуннайн дагьну диркIун тIий дяъвилий ххувшаврил хъунмур хъар.
«9-мур майрал байран – жулва билаятрал, жулва халкьуннал яла хъунмур байранни. Дяъвилийн лавгссар Дагъусттанная 180 азара жагьилсса чиваркI ва душру. Миннавату бачIиксса зана къавхьуссар. Миннал абадлий бюхттул дурссар Дагъусттаннал Аьрасатнал, совет агьалинал цIа, узданшиву. Жува аьркинссар барчаллагь учин жулва ветерантурахь, цалла жанну хIайп къадурминнахь жулла аьмсса Ххувшаврил цIаний. Му Ххувшаву хьун дурссар фронтирдай дакъасса, дяъвилул къинттуллухгу. Ва Ххувшаву гъан дуллай бивкIссар духтуртуралгу – ацIвахъул госпиталлу бувну бивкIссар Дагъусттаннай Хъун дяъвилул шиннардий. Ва Ххувшаву хьун дуллай бивкIссар учительталгу, цанчирча агьали тарбия бувну бивкIун тIий ватан ххирашиврий. Жулва аьмсса задача – жулва бу­ттахъал ва ттаттахъал гьунардай лайкьну бикIавур», — увкунни Региондалул хъунаманал.
Р. АьбдуллатIиповлул бувсунни, мукунма, цIана Дагъусттан цIубуклай бушиву.
— Республикалий щаллу дуллай бур мюхчаншиву. Жува цал уттигу тасттикь барду Аьрасат душиву цIакьсса, дунияллий конкуренция духIан бюхъайсса паччахIлугъ. Жулва билаятрал, жулва агьалинал Европа тархъан бувссар фашистурал аьралунная. Мунийн бувну жува уттигу цал бакIру лахIан дуллай буру ветерантурал хьхьичI, жулла Ватандалул тархъаншиврул цIаний цалла жанну дуллуминнал хьхьичI. Зун хъунмасса барчаллагь. Дагъусттаннал халкьуннал цIанияту на баян буллай ура, жу зу бувсса гьунардануйн дакI тIайлану бикIанну, — увкунни Рамазан АьбдуллатIиповлул.
Республикалул хъунаманал ихтилат къуртал хьувкун, Дагъус­ттаннал хъуншагьрулул майданнийх шадлугърал марширай бавчунни МахIачкъалаллал гарнизондалул аьраллу, республикалийсса ФСБ-рал Дазул управлениялул расчетру, Дагъусттаннайсса МЧС-рал управлениялул расчетру, Аьрасатнал МВД-лул виваллил аьралуннал 102-мур бригада ва цаймигу.
Яла парадрай гьуртту хьуми бавчунни М. ХIажиевлул кучалийх Лениннул цIанийсса паркиравун ва аьралуннал хIатталлучIан, тикку дирхьунни тIутIив.
ХIадур бувссар
ХI. Аьдиловлул