Май зурул 8-нний Лакрал райондалий дя Гъумук хъуннасса шадлугърай тIивтIунни «Вирттаврал чIира». Микку гьуртту хьунни райондалул бакIдургьуми, шагьрурдаясса бусравсса хъамал. Хъамал цивппагу ва кьини бия лапва чIявусса, Ваччав АхIмад-Хан Султаннул гьайкал тIитIин наницири.

З. Тахакьаева
Ва чIира бувну бур 1960 шинал Гъумучиял школалул директорнугу, райкомрал секретарьнугу зий ивкIсса Чалабов Ибрагьимлул, райондалул хьхьичIунсса инсантурал суратру лахъансса ХIурматрал улттун цIа куну. Тай шиннардий Лениннул культ лавайну бивкIун бур, мунал сурат дакъасса кIану къабивкIун бур. Ибрагьим Чалабовлулгу Лениннул сурат чарий цIарцIуну дур. Коммунист партиялул заманагу бухлавгукун, ХIурматрал ула дусса чIирагу бия чартту кьатIа тIий, щалва ппив шавай. Гьашину Ххувшаврил 70 шинал юбилейрал хьунийн райцентрданул, шяраваллал чIалачIин ххуй дан багьлай бухьувкун, райондалул администрациялул бакIчинал хъиривчу Амсар Къажлаевлун пикри хьуну бур ва чIирагу цIубуккан бувну, шикку лак­рал миллатрава бувксса Вирттаврал суратру дусса мармарчарил ултти лачIун дурну, вания бан «Вирттаврал чIира». Спонсорталну бувккун бур цащалва ца классраву дуклай бивкIсса, 1975 шинал Гъумучиял школа къуртал бувсса, МахIаммадов Буниямин, Макъиев МахIаммад, Эфендиев МахIаммад, МахIаммадов Низами, Рамазанов Сайпуллагь, ХIасанов ХIасан. Гьашину вайннал школа къуртал бувну хъанай дусса дур 40 шин. Школа къуртал бувсса юбилей кIицI дан дакIний бухьувкун, шяраваллин, райондалул цаявасса хъамакъабитулун ва чIира бан пикри хьуну бур вайннан. СпонсортурацIун цачIун хьуну бур цува Амсар Къажлаевгу, вайннащал ца классраву дуклай ивкIсса райондалул администрациялул бакIчи Абакар Къюннуев ва райондалул бакIчи Юсуп МахIаммадовгу.
ЧIирайн лархъун дур шаннагу райондалия бувксса Совет Союзралгу, Аьрасатналгу Вирттаврал суратру: Хъун дяъвилул ххюягу Виричунал – АхIмад-Хан Султаннул, ЦIаххай Маккаевлул, Ризван Сулаймановлул, Якьув Сулаймановлул, ХIажи Бугъановлул; Италиянал Виричу ХIасан-ХIусайн Камаловлул; Франциянал Виричу ХIусайн Кущаевлул; летчик-космонавт Муса Маннаровлул; ЦIуссалаккуйсса дяъвилуву ливтIуну махъ Аьрасатнал Вирттаврал цIурттан лайкь хьусса Халид Мурачуевлул ва Мутай Исяевлул; экстремизмалущал талай оьрмулуцIа хьуну махъ Аьрасатнал Виричунал цIанин лайкь хьусса Гапал ХIажиевлул; Социалист ЗахIматрал вирттал Гъази Ххинчаловлул, Юрий Жанаевлул, НурмахIаммад Аьлиевлул, Ибрагьим МахIмудовлул суратирттащалсса мармарчарил ултти.
ЧIира цуппагу цIубувну къуртал бунни кутIасса чIумул мутталий, щаллу дакъасса 2 нюжмардул дянив.
Мемориал тIитIлатIисса шадлугърай махъру лавхъуна райондалул бакIчи Юсуп МахIаммадовлул, ДР-лул Хъунисриннал советрал хъунаманал хъиривчу Сиражуттин Илиясовлул, ДР-лул Халкьуннал Мажлисрал депутат Камил Давдиевлул, дяъвилул гьур­ттучинал арс Аслан Къажлаевлул.
Укунсса чIира ттинин чувчIав бакъассар тIий ххарину, ва бан сиптачи хьуминнайн барчаллагьрай бия цинявппагу.
Амма гьар ишираву буккайхха барчаллагь учин къакIулсса, «ккунукраву чIара лякъаркъуну къабикIан» рюрххусса инсанталгу. Цайминнал арцу цукун харж дан аьркин­ссарив буслан ххирасса. Лениннул суратрал Вирттаврал кьимат цукссава кьюкьин бувну чIалай буссарив, духIин дакъасса хъярчру, рихшантругу дия Фейсбукраву.
Чарий цIувцIусса хъуннасса сурат дукьаншиврул щалва чIира гъагъан багьлай бивкIун бур. «Жува бендеровцы бакъарухха, гьайкаллащал турлий буклан. Ленингу жулва билаятрал тарихраву агьамсса кIану бувгьусса инсанни, цIана замана баххана хьуну ккуччу улларчагу. Лавгмур хъамабитайнан, бучIантIимургу бакъассар», — тIий бур чIира бан арцу харж дурми.
«Виричу лахъ айсса виричуналли» учай жула. Барчаллагь бакъултраллив аьй рищунсса багьана ча-бунугу лякъай. Щил ци учирчагу, барчаллагь хьуннав тарихралгу, вирттавралгу аьпа ябансса багьа бакъасса даврихлу.