Апрель зурул 21-нний МахIачкъалалив Журналистурал союзрал къатраву хьунни ДР-лул ишбажаранчитурал ихтиярду дуруччаврил уполномоченный Башир МахIаммадовлул пресс-конференция.
И. Саидова
Мунил даву дайдихьлай, ДР-лул Журналистурал союзрал председатель Аьли Камаловлул бувсунни ишбажаранчи Башир МахIаммадов ЧIарадиял райондалий хъунмасса пресс-центр буван хIадур хъанай ушиву.
— Башир МахIаммадовлул ппу уссия чIярусса шиннардий райондалул кказитрал редакторну. Мунияту, цала буттал аьпагу абад буван, райондалул кказитгу яхьуншиврул, ванан пикри хьунни шикку пресс-центр бувансса. ХIакьину шикку ва пресс-центрдания бусаву бакъассагу, Башир МахIаммадовлул бусантIиссар ишбажаранчитурал ихтиярду дуруччаву мурадрай цукунсса давуртту дуллай уссарив, — увкунни Аьли Камаловлул.
Башир МахIаммадовлул кIицI лавгунни ишбажаранчитурал ихтиярду дуручлачисса уполномоченныйтурал институт хIасул бувну билаятрай хъунма хIал къавхьушиву.
«Жул институтрал даву федерал ва региондалул законодательствалул ккаккан дурсса кьануннайн чул бивщуну дуллай буссар. Ва институт хIасул бувссар ишбажаранчитурал ихтиярду ва кьанунну дуруччаву мурадрай. Жу хъирив бивзун буссару республикалул ишбажаранчитурал ихтиярду тIайлану дуручлай бурив ххалбуллай ва ишбажаранчитурал чулухуннайсса кIанттул цила каялувшиннарал органнал даву дахшишру къадурну, тIайлану дуллай бурив ххалбигьлай.
Ларгсса шинал личIи-личIисса аьрзардащал жучIан увкIунни 350 ишбажаранчи. Вайннал кIицI лаглай диркIсса циняр диялдакъашивуртту жу щаллу дурссар. Шиккува кIицI лаганна республикалий сакин бувну бушиву ишбажаранчитурал даврихун дайшишрурду къадуллансса, миннал ихтиярду дуручлансса кьануннал базагу. Уттигъанну Дагъусттаннал Конституциялувугу ишбажаранчитурал ихтиярду дуручлачисса уполномоченныйнал бияла хъун буллалисса цаппара дахханашивуртту хьунни, — увкунни Башир МахIаммадовлул.
Ванал, мукунма, бувсунни цалла дуллалисса собраниярттавух, конференциярттавух ва личIи-личIисса мероприятиярдавух гьуртту хьун ччисса ишбажаранчитураща ва сайтрай (htt://www/ombudsmanrd/ru/) информация ххалбуван бюхъайшиву.
Ишбажаранчитураща вара сайтрай «контакт» тIимур бутIуйн гьан буван бюхъайссар цала чулухасса аьрзри ягу цаймигу рязийбакъашивуртту. Миккура дуссар ккаккан дурну «горячий линиялул» телефонгу.
— Сайки цинярдагу муниципал идарарттай буссар уполномоченныйнал жяматийсса кумагчитал. Му бакъассагу, Республикалул БакIчинал ХIукмулийн бувну, цинярда муниципалитетирдай ишбажаранчитурал ихтиярду дуруччайсса центрду тIитIлай буссар. Пикрилий буру, Аьрасатнаву кунма, хъунисса машлул центрдай, базардаву ишбажаранчитурал чулухасса аьрзарду бичлансса «почтовый ящикру» лахъан, — увкунни ванал.
Башир МахIаммадовлул бувсунни гихуннай дуллантIисса давурттая ва уттигъанну хьусса V-мур Аьрасатнал Ишбажаранчитурал ихтиярду дуруччаврил уполномоченныйтурал конференциялий хьхьичIунну зузисса ишбажаранчитуравух «За успехи в развитии института Уполномоченного по защите прав предпринимателей в регионе в 2014 году» ХIурматрал грамоталун цувагу лайкь хьушиву. Му бакъассагу, Башир МахIаммадовлун дуллуну дур «За вклад в развитие практики посещения мест лишения свободы в ходе работы с обращениями» ХIурматрал грамотагу.
— Ишбажаранчитурал ихтиярду дуруччаврин хас дурсса совещаниялий Москавлия на пахрулий кIицI лавгссия Аьрасатнаву яла чIявуми ишбажаранчитал Дагъусттаннаясса бушиву. Ва буниялагу тIайласса затри. Аьрасатнал субъектирдаясса яла хьхьичIунми ишбажаранчитурал сияхIраву дагъусттанлувтурал цIарду хьхьичI ххуттай дуссар. Мунийн бувнугу ва институтрал даву жулла республикалий дакъа чара бакъассар, — увкунни Башир МахIаммадовлул.
Республикалий Ишбажаранчитурал ихтиярду дуруччаврил уполномоченныйнал институт сакин бувссар 2013 шинал.
Ва институт тIивтIуния шихунмай исват хьунни республикалул ишбажаранчитурал ихтиярду дуручлачисса лябукку бусса идара бушиву. Мукунма Ишбажаранчитурал ихтиярду дуруччай уполномоченныйнал институтрал гьанулий хIасул бувну буссар «Бизнес против коррупции» тIисса центр ва Третейский суд.
