Бюхттулсса Ххувшаврил 70 шинал юбилейрал хьунийн щалвагу Аьрасатнаву хьунни личIи-личIисса шадлугъру, мероприятияртту. Мукунсса давуртту ххишала дакъа чIярусса хьунни жулла республикалийгу.
Уттигъанну Нураттин Юсуповлул цIанийсса Республикалул ОьрчIал библиотекалуву миллатрал отделданувугу дия миннувасса ца – Совет Союзрал кIийла Виричу АхIмад-Хан Султаннун ва махъсса Буттал КIанттул цIанийсса Хъунмасса дяъвилий талай бивкIсса лакрал цинявппагу къучагътуран хас дурсса.

Бадрижамал Аьлиева
Му мероприятиялул сакиншинначи бия ва библиотекалул Миллатрал литературалул отделданул хъунмур, 1-мур ЦIувкIуллал шяравасса Агъаева Ххадижат КьурбанмахIаммадовна. Ва батIаву хьунни «Зул виричушиву абадссар» тIисса мукъурттилу. Шиккусса ихтилатругу хьунни лакку мазрай.
Ва мажлисрал хIурмат бусса хъамалну бия ДГПУ-рал философиялул ва культурологиялул кафедралул доцент, философиялул элмурдал кандидат, СССР-данул просвещениялул отличник, РСФСР-данул халкьуннал просвещениялул отличник, ДР-лул лайкь хьусса учитель Султанов Киров Абакарович ва аьмсса физикалул кафедралул хъунама, планетарийлул директор, физикалул ва математикалул элмурдал доктор, профессор, АьФ-лул лавайсса школданул лайкь хьу­сса зузала, ДР-лул элмулул лайкь хьусса ишккакку ХIусайханов МахIаммад-Баг Кьагьирович.
Ва батIавривух гьуртту хьун бувкIун бия МахIачкъалаллал шагьрулул школардай дуклакисса лакку оьрчIру ва учительтал: 46-мур школданул ниттил мазрал дарсирдал учительница, ДР-лул просвещениялул отличник Какваева Светлана Ибрагьимовна, 1-мур гимназиялул ниттил мазрал дарсирдал учительница, 1-мур гимназиялул ниттил мазурдил секциялул каялувчи, ДР-лул кIулшиву дулаврил отличник ХIабиева Шагьун Валижулаевна, 48-мур школданул лакку мазрал преподаватель ЛухIуева Аматуллагь Бариевна, 31-мур школданул библиотекалул хъунмур, КТНД-лул ва обществознаниялул дарсирдал учительница, АьФ-лул лайкь хьусса учитель Мусаева Лайла Аьбдулхаликьовна ва вава школданул лакку мазрал дарсирал учительница Исяева Жавгьарат МахIаммадовна ва вайннал дарсру дихьлахьисса вай школардал оьрчIру.
БавтIминнан ккаккан дунни АхIмад-Хан Султаннуя­сса фильм. Ххадижат Кьурбан­махIам­мадовнал оьрчIру кIул бунни библиотекалул ва кьинисса хъамаллуращал. Бувсунни га оьхIалсса дяъвилул шиннардий жулва инсантурал дяъвилул майданнай ва захIматрал фронтирттай дурсса виричушивурттая, циксса жагьилтал лавгссарив хушрай аьрайн, цикссаннал цалва оьр­мурду буллуссарив ва чанна­сса кьини дучIан дуллай. ДакIнийн бувтунни хъундакъасса республикалул билаятран уллушиву Совет Союзрал 60 Виричу.
Ва кьини библиотекалувун бавтIсса оьрмулул хъуними ва дуклаки оьрчIру ялун нанисса Ххувшаврил кьинилущал барча бунни Киров Абакаровичлул, бувсунни аьрайн лавгминная, дяъвилул шиннардийн тIайла дарцIусса цалла бигьа дакъасса оьрчIшивруя, дурккунни назмурду. БавтIминнан ххуй бивзунни ванал увкусса, лакку мазрайн цалва таржума бувсса, балай «Кьурукьру».
Хъирив ва батIаву дачин дурсса Ххадижат Кьурбан­махIаммадовнал махъ буллунни МахIаммад-Баг Кьагьировичлу­хьхьун. Ванал гьарта-гьарзану бувсунни оьрчIахь цала шяравучуная – Виричу АхIмад-Хан Султаннуя, мунал ххаллилсса оьрмулия ва дурцири виричушивурттая, цалва оьрмулул 25 шинаву му лайкь хьуну ивкIшиву 11 ордендалун ва 6 медальданун (Лениннул 3 орден, ЯтIул Ттугълил 3 орден, ЯтIул ЦIукул, Невскийл орден ва цаймигу). Бувсунни майрал 8-нний Ккуллал райондалий Ваччиял шяраву тIитIинтIишиву АхIмад-Хан Султаннунсса гьайкал ва му хъанай душиву Виричунан дирхьусса 8-сса гьайкал. Бувсунни Виричунал хIурмат ва муная­сса пахру Ярославль шагьрулул инсантурачIагу хъунмашиву ва миккугу дацIан дурну душиву мунан ххаллилсса гьайкал. Ванал увкумунил ялун ххи буллай, Киров Абакаровичлулгу оьрчIахь бувсунни АхIмад-Хан Султаннул Ярославль шагьру ххассал бувсса куц.
МахIаммад-Баг Кьагьировичлул цалва ихтилатраву кIицI лавгунни, миллатрал аьдад хIисав дурну, циняв миллатирттаву лак­рал ва дяъвилувух дуршиву яла хъуннамур гьурттушинна, лак бушиву ххаллилсса тарих, культура, багьу-бизу бусса миллат ва му дакIнийну, муния пахрулийну къуццу буллан аьркиншиву. Бувсунни цала буттал шярава — 1-мур ЦIувкIрату дяъвилул майданнай талан лавгшиву 200 адамина, миннава бачIи зана къавхьушиву, мукунма — гьарцагу лакрал шяравагу.
Лавай кIицI лавгсса гьарцагу школданул оьрчIал хIадур дурну дия цалла-цалла программарду. ОьрчIал бувккунни дяъвилиясса ва Вирттавран хас бувсса шеърирду, дирхьуну дия аьрали тематикалийн дагьайсса суратру, бувсунни ва бувккунни Вирттаврая док­ладру: АхIмад-Хан Султаннуя, Якьув Сулаймановлуя, Ризван Сулаймановлуя, ЦIаххуй Маккаевлуя, ХIажи Бугъановлуя.
Гихунмай ихтилат бувна ва библиотекалул зузала, захIматрал ветеран Алескерова ТIагьират Абакаровнал. Ванин дяъвилул шинну ххуйну дакIний лирчIун дакъая, амма дяъвилий ивкIусса цила ппу махъа-махъ шавату увксса куц дакIний ливчIун бия ххуйну. Гихуннай тIурча дяъвилул ччуччин дурсса оьрчIшиву, ккашил ва захIматрал азурда бувсса шинну, аьтIий, къана тIий, зий, занай, 3 ятин ччаннай бацIан бувсса цилла нину.
Шагьун Валижулаевналгу бувсунни цила буттая-ветеранная, мукунма цинма гъансса Гъумучатусса цаймигу цIанихсса фронтовиктурая, бувсунни Ленинградуллал блокада дурхIусса, Сталинград­рахлусса талатавривух (цангу му шагьру оьрмулухун ххира, аьзиз хьусса) ва чIярусса цайминнувухгу гьуртту хьусса цила буттал буслай ивкIмур. Оьвчаву дунни гай вирттаврал аьпалунмагу лакку маз буруччин, хъирив нанисса никирттайнгу биян буван.
Ахирданий Ххадижат Кьур­бан­­махIаммадовнал барчаллагь увкунни ва давривух гьуртту хьусса хъамаллурахь, учительтурахь ва дуклаки оьрчIахь.
ДакI ххари хъанай дия лакку мазрай назмурду ккалаккисса, ихтилатру буллалисса дуклаки оьрчIах ва оьрмулул хъуниминнах вичIидихьлай. Барчаллагь ва библиотекалун, миллатрал литературалул отделданун, хасну Ххадижат КьурбанмахIаммадовнан, махъа нанисса ник ниттил маз, буттал кIанттул тарих ххирану ва кIулну тарбия шаву мурадрай дуллалисса укун багьа бищун къашайсса давурттахлу.