Ххувшаврил байран хIадур даншиврул, тамашачитуран, хъамаллуран чIалачIимур асар хьунсса кьяйдалий дузал дуваншиврул, яруннин къачIаларчагу, зузисса чIявусса инсантал бия Ккуллал райондалий. Укун гьавасращал цащава шаймур буллалисса къуллугъчитал ттул янилун къабагьлай чIярусса шинну ларгуна.
Улу, ца ка мушакъатсса, ттущалагу дусъсса, ЧIяйннал шяравасса, Ккуллал райондалул КIулшиву дулаврил управлениялул къуллугъчи ХIусайнов Юсуп ия чIатIущал Досуговый центрданул лагмасса чIира буллалисса усттартуран цементрая пяп дуллай.
Ттун хъиннува кIицI уван ччива Ккуллал райондалул муниципал сакиншиннарал администрациялул 2 къуллугъчи: администрациялул информациялул ва аналитикалул давурттай каялувшиву дуллалисса специалистал ХIусманов Сулайман ва Абакаров Шамил. Вайнналли хIадур дурсса циняв шяраваллаву, «Бессмертный полк» цIа дирзсса, дяъвилийн лавгминнал суратру рищаву ва улттайн лачIун даву. Мукунна вайннал хIадур дурссар циняв шяраваллавусса хъунисса баннерду. «Аьпалул лу» шяраваллал дузал барчагу, гикку рищунсса суратру вайнналли хIадур дурсса.
На кIицI дував анжагъ ца-кIира даву, хIатта вайннал дурсса давурттал хIат-хIисав дакъахьурчагу. Укунсса, дакIнийхтуну зузисса, зирангсса жагьилтал жула дянив бусса чIумал, умуд бур ялун бучIантIимур чаннасса бушиврийн.
Шиккува ттулла даврищал бавхIусса затгу кIицI буван ччива. Шяраваллаву чIярумур чIумал интернет къазий, редакциялийн аьркинсса макьаларду цила чIумал гьан дуван къахъанахъисса чIумал, ттул циняв макьаларду «Илчи» кказитрайн вай жагьилтурал цачIарату тIайла дуккайссар. Барчаллагь, Сулайман, Шамил, ттулми буруккинтругу чулийн буккан бувайсса буну тIий. На мудан зуя пахрулий уссара!
