Апрельданул 28-нний МахIачкъалалив Оьруснал театрданул Хъунмур залдануву хьунни ватандалухасса балайлул Щалагу Аьрасатнал фестиваль-конкурс «Журавли над Россией». Ва дуллалиссар Республикалул БакIчи Рамазан АьбдуллатIиповлул сипталийну, «Человеческий капитал» приоритет проект щаллу даврил лагрулуву. Му хас дурну дия Бюхттулсса Ххувшаврин 70 шин шаврин. Ва концертрай ия цува Рамазан ХIажимурадовичгу, хъамаличу хIисаврай.

Концерт дачин дурну ия Аьра­сатнал халкьуннал артист, АьФ-лул Президентнал протокольный мероприятиярттал диктор Евгений Хорошевцев.
«Журавли над Россией» фестиваль-конкурсрал агьамми мурадру бур Буттал КIанттул цIанийсса Хъунмасса дяъвилиясса аьпа абад баву, Совет халкьуннал аьрали ва захIматрал къучагъшивуртту махъа нанисса никиран мудан дакIний дикIаву, жагьилтал ватан ххирану тарбия баву, гьунар бусса жагьилтал ялун личин баву ва миннал чIаравбацIаву. Мукунна Аьрасатнал цайми регионнащалсса творчествалул арарду цIакь даву, даврил опыт кIибачIаву.
Евгений Хорошевцевлул махъ буллуну, сахIналийн увккунни ДР-лул ХIукуматрал Председательнал цалчинма хъиривчу Анатолий Карибов. Цалва ихтилатраву мунал кIицI лавгунни Бюхттулсса Ххувшаврил байрандалул цуксса агьамшиву дуссарив жулва билаятран, му Хъуннасса кьинилул хьхьичI хъанахъисса ва ватандалух­сса ччаврил видурцIусса фестиваль-конкурс дуллалишиву ДР-лул Президент Р. АьбдуллатIиповлул чIаравацIаврийну, ва сакин дуршиву Аьрасатнал ва Дагъусттаннал Культуралул министерстварттал гужирдайну.
«Буттал КIанттул цIанийсса Хъунмасса дяъвилул шиннардил патриот музыка, цахунгу душманнал ххяппурттаща шагьрурду ва билаятру Совет армиялул тархъан буллай бивкIсса балайрду, макьанну, цалгу дяъвилул шиннардий инсантал цачIун бувсса, хьун аьркин­ссар хIакьинусса балайчитуран ва автортурансса эбратну. Му лахъсса планкалучIан кIункIу тIун аьркин­ссар Аьрасатнал личIи-личIисса регионнаясса балайчиталгу, — увкунни Анатолий Шамсуттиновичлул.
Гихунмай сахIналийн був­ккунни республикалул районнаясса коллективру. Миннувух бия ЦIуссалакрал райондалул Культуралул къатлул художествалул самодеятельностьрал хоргу. Вай бувкIун бия ва фестиваль-конкурсрайн райондалул Культуралул управлениялул хъунмур ХIабибат Буттаеващал. Миннал щаллу бунни «Моя родина» тIисса балай.
СахIналийн, мукунма, бувккунни Аьрасатнал цимирагу региондалиясса коллективру: Кабардин-Балкарнавасса, Ингушетиянавасса, Чачаннавасса, Ухссавнил АьсатIиннавасса-Аланиянавасса, Ставрополлал крайраясса, Астраханнал, Москавуллал, Томскаллал областирдаясса творчествалул коллективру ва балайчитал. Балайрду тIий бунува, махъ ккаккан буллай бия кинохроникирдавасса парчри. Ва кьини Оьруснал театрданул сахIналия баллай бия дяъвилул шиннардий чивчусса язи-язими балайрду, хIатта гай шиннардий лащинсса, ялавайсса цавагу балай къабивкIнагу. Ва мероприятиялувух гьуртту хьусса цинявппагу лайкь хьунни дипломирттан.
Ахирданий Анатолий Карибовлул Евгений Александровичлун пишкаш дунни Рес­публикалул БакIчи Рамазан ХIажимурадовичлул цIа чирчусса ссят.