Апрельданул 27-нний МахIачкъалалив Р. ХIамзатовлул цIанийсса Миллатрал библиотекалуву хьунни АьФ-лул халкьуннал артист, М.В. Ломоносовлул цIанийсса МГУ-рал искусствалул факультетрал профессор, Аьрасатнал Федерациялул Президентнал протокол мероприятиярттал диктор, Аьрасатнал МВД ГУ-лул Жяматийсса советрал член Евгений Хорошевцевлущалсса хьунабакьаву. Ва даву щаллу дурну дур ДР-лул Культуралул министерствалул.
ЦIанихсса дикторнащал, Левитаннул ученикнащал хьунабакьин бувкIун бия республикалул театрдал режиссертурая, диктортурая тIайла хьуну, республикалул дуккаврил идарарттал 1-ми курсирдал студентътурайн бияннин.
Ва хьунабакьаву дачин дурну бия ДР-лул культуралул министрнал хъиривчу, РДНТ-лул директор Марита МухIадова.
Республикалул хъунасса хъамаличунал бувсунни цалва оьрмулия. Увну ур Евгений 1944 шинал июльданул 23-нний Москавлив. Оьрмулул 9 шин хьуну, занан ивкIун ур Москавливсса Зуевлул цIанийсса ДК-лул В. Книппердул театральный студиялувун. Цаппара хIаллавун, оьрмулул 16 шин хьуну, кьамул увну ур Москонцертравун. Миккура, Наталья Сацлул каялувшиннаралу, ларсун дур актернал кIулшивугу.
Хорошевцевлул къуртал бувну бур ГИТИСрал режиссертал хIадур байсса факультет. 1968 шинал зун ивкIун ур Щаллагу Союзрал дикторну. ЦIанихсса Левитаннущал архIал дачин дурну ивкIун ур 1-мур майрал ва 7-мур ноябрьданул байраннал демонстрацияртту. Цаппарасса хIаллай зий ивкIун ур Щалагу Аьрасатнал «Радио-1»-лул генеральный директорну. 2006-ку шиная шинай Евгений Хорошевцев дачин дурну ур Москавлив ЯтIул майданнивсса Ххувшаврил Парадру. Ванал чIу къабавсса инсан Аьрасатнаву цаягу акъахьунссар, мюрщиминная тIайла хьуну, къужрайн бияннин. 2012-ку шиная ккалай ур Минута молчаниялул текст. Евгений Хорошевцев 2010 шинал лайкь хьуну ур Почетрал ордендалун.
Цалва ихтилатраву Хорошевцевлул дакIнийн бивчунни цала учительнал Левитаннул махъру, инсантурал диктортурайн бувнур маз лахьлахьисса тIисса, совет диктортал мяйжаннугу маз хъинну ххуйну кIулсса, ларайсса кIулшивурттащалсса, лавайсса даражалул пишакартал бивкIшиву буслай. Дикторнал, ТВ-лул ва радиолул зузалтрал даврия ихтилат буллай, ва хьунабакьаврий ванал цимилвагу дакIнийн бувтунни гьарцагу зузалал канилу чара бакъа бикIан аьркиншиву Д. Розенталлул словарь.
Укунсса инсантуращалсса хьунабакьаву – му оьрмулуву цалвагу хьун къашайсса ишгу бухьувкун, Евгений Хорошевцевлухьхьун булунсса суаллугу бавтIминначIа чансса бакъая, ванал ци маслихIатру, ци аьйрду дувайрив ккаккан, ванал хьхьичI назмурду дуккин ччимигу чIявуя. Суаллурив бия захIматну чайсса мукъурттийн, гъалгъалул техника хьхьичIуннай даврийн, текстращалсса даврийн, видеокамералул хьхьичIсса вас-ццахлищал лаяврийн багьайсса. Суаллу буллалиминнаву бия республикалул каналлал диктортал, ведущийтал, Республикалул Культуралул ва искусствалул Б. Мурадовал цIанийсса колледжрал, ДГУ-рал ва цаймигу дуккаврил идарарттал студентътал, преподавательтал. Ванал дурсса аьйрдугу, маслихIатругу хьунни вайннан хъуннасса бахшишну. НахIакь дан увкуну бакъархха «Замечание мудреца дороже, чем восхищение глупца» куну. Цила чIумал дурсса аьйлул хъунмасса кумаг буллай бур инсаннан цалла даву хъиннура ххуйну дуллан, мукунсса маслихIатругу оьрмулухун дакIний личIлай бур, хъанай бур оьрмулухунсса дарсну.
Цалла даврил даража лавай баву мурадрай, Хорошевцевлухьхьун суаллу буллалиминнавух бия «Вести Дагестан» программалул ведущая Елена Еськина, мукунма цаймигу тележурналистал. Миннахьгу, махъминнахьгу Евгений Александровичлул бувсунни чIу вардиш цукун буллантIиссарив, ци упражненияртту буллан аьркинссарив гьарца кьини.
Евгений Александровичлул, цахьва бувсса тавакъюрайн бувну, бувсунни цува Л. Брежневлущал хьунаавкьусса куц. Мукунма, ванахь тавакъю бунни Москавлив ЯтIул майданнив Ххувшаврил Парадрай баян байсса куццуй ца-кIива махъ учин. Вагу хьунни уттинин телевизорданул экранная ванал чIу бакъа къабаллай бивкIминнансса бахшишну.
Гихунмайгу ванахьхьун булунсса суаллу чIявуя, ванах вичIидишин гъирарайнма бия, амма цуксса къаччайнугу, ва батIаврил ахир дуркIуна. Ахирданий Марита Велихановнал барчаллагь увкунни ванахь, укунсса хьунабакьаврихлу. БавтIминнахь бувсунни хъиривмур кьини Евгений Хорошевцевлул дачин дувантIишиву ватандалухасса балайрдал Щалагу Аьрасатнал фестиваль-конкурс «Журавли над Россией».
