Ккурккуллал шяраву гьарица шинах дуллай аьдатравун дагьсса Ххувшаврил парад гьашину ляличIинура лахъа-хъунну ларгунни. Байрандалун хасну чIюлу бувсса шяраваллил дянивсса майданнив бувккунни ца куццуйсса янналувусса дуклаки оьрчIру, дяъвилия зана къавхьусса 57-гу виричунан хас бувсса альбомругу бувгьуну.
Кьюкьлул бакI дургьуманахь бур шяраву кьадрулий, бусраврай ябуллалисса ЯтIул Ттугъ, цийгу Ватан дуручлай жанну дуллусса 57-гу виричунал цIа чирчусса. Гьашинурив оьрчIал кьюкьлул хьхьичI ца ттугъ ххи хьуну бия. Ва бия Рейхстаграй бивщуну бивкIмуниха лавхьхьусса ттугъ. Ххувшаврил ттугъ бувгьуну дуклаки оьрчIал кьюкьлул хьхьичI най ия 11-мур классраву дуклакисса Камал Чупалов, ганащал архIал — шяраваллил ЯтIул Ттугъ бувгьусса Минкаил Гъужиев.

Андриана Аьбдуллаева
Хъирив дастта дархIуну нанисса дуклаки душварахь дия дяъвилия зана къавхьусса 57-гу виричунал цIарду чирчусса плакатру. Кьюкьа дурккунни «Священная война» тIисса балайлухун. ЧIирттува зурзу тIисса хханссия оьрчIру дастта дархIуну наниний, балайлул чIугу гьарнан бюхлай бия.
ОьрчIру кьюкьа дархIуну шяраваллил дязаннивсса майданнив дяъвилий ливтIуминнан дирхьусса гьайкалданучIан лавгунни. Ми чIарах наниний ккурчIа бувцIусса жямат пахъ багьну бавцIунни. ХьхьичIра-хьхьичI ва байрандалий хьусса, шикку дуллалимур цалчин ккаклакисса хъамал махIаттал хьуну бия.
Ккуркливсса Ххувшаврил байран лахъа-хъун дан бувкIун бия чIявусса бусравсса хъамал: Шяраваллил хозяйствалул академиялул преподаватель Аслан Къажлаев, миллат ххирасса, миллатрал дуллалисса хъин-хъинсса давурттая ххари шайсса, ккурккуллал дус, циняв лакрангу бусравсса, Кисловрай ялапар хъанахъисса АхIмадов Аьлил, цалагу цаманал хIурмат байсса, цанмагу бан лайкьсса Аьвдулхаликь Халилов. ЧIявусса студентътал ва преподавательтал бувкIунни инженертал шайсса республикалул колледжрава. Колледжрал ректор МахIаммадрасул Муслимовлул, цува къаучIарчагу, гьан бувну бия яла хьхьичIунми, оьрчIан ххирами преподавательтал: Анжелика Абачараева, Жамиля Керимова, Асият МахIаммадова, Наида Пичиева, Нестем ХIасанов. Вай цинявппагу махIаттал бувна дуклаки оьрчIал хIадур дурсса композициялул.
Гъумучатумур делегация хъиннува хъунмасса бия. Райондалул бакIчи Юсуп ХIамидович хьхьичIну, бувкIунни личIи-личIисса организациярдал ва идарарттал вакилтал: прокурор Светозар Оьмарович, райондалул администрациялул бакIчинал хъиривчу Амсар Къажлаев, Ветерантурал советрал председатель Сулайман ХIажиев, Соцзащиталул управлениялул хъунама МахIаммад Сунгъуров, Артур Дибиров ва м.ц. Ххувшаврил байран буттал шяраву хьунадакьин бувкIун бия мудангу шяраву дуллалисса давурттал чIарав бацIайсса Зиявуттин Муртузялиев, Сайпуллагь Аьвдуразакьов, Давуд Идрисов, Ризван ХIажиев, Тельман Магьдиев, ккурчIал дянив вирттавран лухIисса мармарчарил гьайкал дацIан дурсса Сулайман Сулайманов, Ккурккуллал вирттавраясса лу итабавкьусса Аьвдуссалам Магьдиев. Гьайкалданул чIарав вирттаврал цIарду тIутIиний, тачIав къабивкIсса ку­ццуй бувцIусса ккурчIа пахъ багьуна. Цамур кIанай къадурсса, уттинин чувчIав къархьусса даву хьуна гьашину Ккурклив. Дяъвилия зана къавхьусса вирттавран цIа куну медаллу дия дурну. Ми дан дурну дия Таганрог шагьрулий мина дирхьусса ккуркличу Эльдар Магьдиевлул. Медальданий чирчуну дур виричунал цIа, 1941-1945 шинну, «Барчаллагь Ххувшаврихлу» тIисса махъру. Ми медаллу ланжарттай дирхьуну, душру, миннал хьхьичI Ттугъ бувгьуну аьрали янналувусса кIия ученик ккурчIнил лагмагу бувккун, цIунилгу гьайкалданучIан бувкIуна. Яла медаллай вирттаврал цIарду чирчусса ятIулсса ва някIсса лентарду бавхIунни. Цалчинмур медаль дия Ккурклия цалчин дяъвилий ливчIсса, 1940 шинал финнащалсса дяъвилуву жан дуллусса Магьдиев ХIажимусал цIа кусса. Медаллу дулаву дайдирхьуна Лакрал райондалул бакIчи МахIаммадов Юсуп ХIамидовичлул. Щарнил жяматран укун ччан бивкIунни. Магьдиев ХIажимусал медаль Юсуп ХIамидовичлул дуллунни дяъвилий ливчIсса виричунал ссил оьрчI Магьдиев Шамиллухьхьун. Гайми медаллу цIарду тIий вир­ттаврал гъан-маччанахьхьун дуллай ия Ккурккуллал школалул директор Даниял Магьдиев. Ми дуллалисса чIумал инсантал цайва бияла бакъа хъювусул буклай бия. Сулайманов Илияслул медаль ласун увкIун ия ванал арс Аьвдулбасир. Даниял Магьдиевлул «гьалмахтал» кусса чIунил чантI учин бунни медаллу дулаву асар хьуну пахъ багьсса инсантал.
Бавчунни махъру лахълай дяъвилий ливтIуминнал оьрчIру, гъан-маччами, шяраваллил жямат. Махъ лавхъунни Ханича Аьлиевал, Салим Жабраиловлул, Сибрижат Буттаевал, Иманшапи Мажидовлул, Шамил Магьдиевлул. Хъинну бюххансса ихтилат бунни Авгъаннал дяъвилуву гьуртту хьусса Сапижуллагь Аьбдуллаевлул. Ванал хъазамравугу дия аьрали бурж къучагъну лавхъун лайкь дурсса орден-медаллу.
Байран най хъунмасса хIал хьурчагу, чIун най чIалай дакъая.
Дяъвилий жанну дуллусса вир­ттавран цIакуну дурсса медаллу, миннал суратирттал хьхьичIун лархъун, ккурчIа чIюлу буллай бия.
КкурчIа цуппагу байрандалун лавхьхьуну чIюлу бувну бия. Лагмава ттугъру, вирттаврал суратру, плакатру. ТIутIавун бахьлавгун бия Сталиннул бюст. Мунияту жямат рязину бия. Щарнил лахъний – АннибакIуйгу архниява чIалай палцIа тIий бия Ххувшаврил лишанну хьусса ЯтIул Ттугъ. Шикку ккавкмур асар хьусса АхIмадов Аьли­ллул цала канийсса ссят лирккун музейран бахшиш дунни. Ххувшаврил байрандалул шадлугъ аргъиравусса чIумал дирунни Москавлия ПаччахIлугърал Думалул депутат Ризван Кьурбановлул гьан дурсса барча буллалисса телеграмма. Даниял Магьдиевлул дурккунни му цинявннал хьхьичI.
Ва кьини Ккурккуллал щарнил аргъ дирзун дия. Шадлугърал мажлис къуртал хьуну махъгу, жямат ппив къахъанай хъунмасса хIал хьуна. Байрандалий гьурттушинна дан бувкIсса хъамалгу рязину лавгуна.