МахIачкъалаллал администрациялийн транспортрал хIакъираву халкьунная бучIайсса аьрзирдал хIат-хIисав дакъар. Шагьрулул кIичIирттавух хIакьинусса кьини цIусса автобусру, троллейбусру ва маршруткарду занай бунугу, жяматрансса транспорт диял къахъанахъаврил масъала ттигу ца чулийн багьан бувар.
Маршруткардалмур масъала ттинин бивкIсса кIива МУП цачIун бувну, утти ца аьмсса «Горавтотранс» МУП сакин бувну, чанссарагу тагьар къулай хьунсса умуд бивхьуну бур. Ванил каялувчину ивтун ур Спартак Рабаданов.
Ванал бусаврийну, МУП сакин баврицIун дархIусса давуртту лахъи лаган тIий дусса дур апрельданул ахирданийннин. Маршруткардал циняв водительтурайн баян бувну бур бух хьусса, чапалсса маршруткарду бакьин бувну, марцI бувну, низамрайн буцин аьркиншиву. Шагьрулувусса циняв маршруткарду так хъахъисса ва кIяласса рангирдал бикIантIиссар. АцIурахъул шиннардий зузисса маршруткарду ххуллурдай халкь ххилай къабитан тIий бур. Гихунмай тIурча халкьуннал маршруткардавусса диялдакъашивурттая баян буллансса, миннал тIутIимунил хъирив буккансса шартIру хIасул дантIиссар «Горавтотрансрал».
Масалдаран, вай гьантрай МУП-рал каялувчитал бивну бур Степной поселокрай ва Газораспределительный станция бивхьусса кIанай ялапар хъанахъисса халкьунначIан, миннаясса аьрзирдал хъирив бувккун. Степной поселокрайсса халкьуннаясса аьрзри цалгу-кIилагу бувкIун бакъар шагьрулул администрациялийн №5 маршрутрай заназисса маршруткардал махъра-махъсса остановка цивппа яхъанахъисса общежитиялул хIаятраву дан рязийру тIисса. МУП-рал пишакартал ва аьрзирал ялув Степной поселокрайн бивну, хъирив лавну, халкьуннал тIимуних вичIидирхьуну махъ хIукму бувну бур 70 маршрутка бусса ва маршрутрал машинартту бацIансса шартIру общежитиялул хIаятраву дузал дуван къабюхъантIишиву. Цанчирча парковка дуваншиврул, цалчин хIаятравун нанисса ххуллу бусса бур къумасса, хьунийн машина буккарча, ти-шинмай бан захIмат хьунтIисса, кIилчин, цурда хIаятгу къумасса дуну, заллухъруннал машинартту биширчан, цаннахун ца бахчилан тIий бусса бур. Яла ккаккан дурсса низамрайн бувну, шикку къумасса кIану бухьувкун, водительтал, цалла чIун дияннин лажин-ка шюшин, кьатIув буккан, дукра дукансса шартIругу дузал дансса кIану бакъасса бур.
«1000 мелочей» ттучандалучIа №5 маршрутрай заназисса маршруткардал махъра-махъсса остановка дусса кIанайра дитан икьрал дурну дур.
Хъирив МУП-рал пишакартал бивну бур №33 «а» маршрутрай заназисса маршруткардал «конечныйлийн». Шиккусса халкьуннаясса рязибакъашиву дур, маршруткарду чансса буну, цив давурттайн, школардайн, вузирдавун чIал хъанай буру тIисса. Шиккува кIицI лаган, ва «садоводческий товариществалул» кIану бухьувкун, гьантлия гьантлийн къатригу чIяву хъанай, халкьгу гьарза хъанахъисса район дур. Инсантурал цанна ччи-ччикун къатри, хIаятру, дарвазарду бивхьуну, машинартту лагайсса 1-сса Фрегатная кIичIиравалу къумасса бур. Маршруткардал махъра-махъсса остановкалий водительтал бигьалаган, зат дукан, лажин-ка шюшинсса шартIру дакъасса дур. ХIукму бувну бур мугьлат бакъа ва масъалалуха зун ва линиялийн маршруткарду ххи бан.
Лажин хIадур дурссар
З. АьбдурахIмановал
