Шанна кьини МахIачкъалалив бишлай бивкIсса гужсса мурчал азарахъул инсан, ацIвахъул кIичIиртту, шагьрулул сайки циняр поселокру ттукI, щин, ца-ца кIанттурдай газгу бакъа кьабивтунни.

Ва тIабиаьтрал кьисас лахълахъисса кунмасса бурандалул гьантрай шагьрулул бакIчи МахIаммад СулаймановлучIа хьунни МахIачкъалаллал шаннагу райондалул, циняр идарарттал каялувчитал ва къуллугъчитал гьурттусса хъуннасса батIаву.
Гъаралгу хIалану бишлаши­сса мурчал шагьрулун биян був­сса хъунисса зараллая буслай, шагьрулул бакIчинал хъиривчу Камил Изиевлул кIицI лавгунни, шагьрулул личIи-личIисса кIичIирттаву, ттуршунниха ливчусса кьатI хьусса мурхьру сававну, чIярусса ттукIрал ххаллу дурцун, ттукIрал тталлу кьатI хьуну бушиву. Ванийн бувну, ттукI бакъа ливчIун бур циняр поселокирттал халкь. ТтукI бакъашивруцIун, Хушетрайсса водохранилищалул насосгу къазий, бачIи шагьру щин дакъагу ливчIун бур. Шагьрулул 12 детсад ва школарду щин, ттукI, гъилишиву дакъа бусса бур. Шагьрулул 30 котельня бусса бур бавцIуну. 30м/с бишлаши­сса мурчаха вай давурттаха зун хIадурсса ремонтрал мобил бри­гадартту давурттахун багьан къахъанай ливчIун бур.
К. Изиевлул бусаврийн бувну, Аьрасатнал Кьиблалийсса регионнайгу дусса дур вара захIматсса тагьар. Циняр хIаллихшиннардая махIрумну ливчIсса агьалиная, шагьрулул кIичIирттавусса тагьардания батIаврий мукунма ихтилатру бунни шагьрулул районнал хъуниминналгу.
Вайннал бусаврийну, кьатI хьусса мурхьирдалу ккуччу хьуну бур халкьуннал машинартту, къатрая ва идарарттая ларсун дур магъив, кьатI хьуну лахIу-ччахIурду хьуну дур рекламалул хъунисса уларду, баннерду.
«Горэлектросетирдал» каялувчи МахIаммад ГьитIиновлул бусаврийн бувну, зузалтрал оьр­мурдан хъуннасса нигьачIаву дунугу, бишлашисса мурчавух ва лачIлачIисса гъаравух зий шагьрулул цаппара кIичIирттавун ттукI буллуну бур. Шагьрулул 36 фидер левщун бивкIун бур. Шагьрулун ттукI булаврил давурттаха зузисса мобил бригадалул цаппара фидерду щурущи бувну бур, вайннува бувагу 12 фидер ливчIун бур лахъан.
БатIаврий шагьрулул бакI­чинал кIицI лавгунни, Ма­хIач­къалаллал сайки циняв къуллугъру личIи-личIисса заллухъруннал машан лавсун бухьувкун, цанна мяйжаннугусса тагьар цукун, ссайн дирну дуссарив балжину къакIулшиву.
— Жу дурсса хъиривлаявур­ттайн бувну, аьч хъанай бур шагьрулул МУП-ру законнал ялтту ххарххив ларсун, дуцири диялдакъашивурттащал приватизировать бувну бушиву. Кьянкьану баян буллай ура – «Горэлектросети», «Горводоканал», «Теплосети» ва цаймигу къуллугъру шагьрулул балансрай бакъа тIий хазналувун ца къуруш къадукIлай диркIшиврия. Утти ва иширал хъирив бувккун буссар низам дуруччай органну. Умуд бур судрая махъ вай къуллугъру шагьрулун махъунмай зана бантIишиврийн, — увкунни М. Сулаймановлул.
БатIаврий мукунма ххалбивгьунни цайми-цаймигу шагьрулул агьамсса масъалартту. Шикку ххалбигьаврия тихунмай масъалартту бунийва къаличIан, шагьрулул бакIчинал къуллугъчитурая тIалав бунни гьарца масъала щаллу бувну махъ отчетру дулун.