Мартрал 25-нний щалагу Аьрасатнаву кIицI лагайссар Культуралул зузалал кьини. Му Кьинилул мархри бур 2007 шинаву. Му шиная шиннай, Аьрасатнал Федерациялул президент Владимир Путиннул ХIукмулийн бувну, мартрал 25-нний кIицI лагайссар Культуралул зузалала кьини. Мунил сипталущаллив увккун ур га чIумал АьФ-лул культуралул министрну ивкIсса Александр Соколов. Мунал увкумуних къулагъас дурну, культуралул ва искусствалул арардаву зузисса цинявппагу зузалтрал кьинирду цачIун дурну, щалвагу билаятрай ца кьини хьунадакьлай бур му байран.

Бадрижамал Аьлиева
ЧIяву миллатру, чIяру культурарду дусса Дагъусттаннай му кьини кIицI лагай хьхьичIунну. Культуралул ирс буруччаву, машгьур баву мурадрай хьхьичIунну зузисса пишакартал ва кьини лайкь шай личIи-личIисса наградарттан. Ва ххуллухгу мукунсса батIавурттавасса цану хьунни республикалул культуралул идарарттай зузисса жагьилсса пишакартуран ДР-лул Культуралул министерствалул чулухасса ХIурматрал грамотартту дуллалимур.
ДР-лул Культуралул министерствалул конференц-залданувун ва кьини бавтIун бия биялсса халкь. ДР-лул культуралул министр Зарема Буттаевал, шадлугъ дайдихьлай, цилва ихтилатраву кIицI лавгунни Дагъусттан машгьурну бушиву культуралул ва искусствалул яргсса гьунар бусса пишакартурал цIардайну, ми мудангу дакIний душиву.
— ХIакьинурив ДР-лул БакIчи Рамазан ХIажимурадовичлул ургаву дуллай ур жагьилтурахгу. Буттал улклул цIаний захIмат буллалисса жагьилсса никгу ххютулу личIан къааьркин­ссар. Жун зуяту пахру буссар. Зу жулла республикалул ялун бучIантIимиру! — увкунни Зарема Ажуевнал.
ДР-лул Культуралул министерствалул ХIукмулийну, Дагъусттан Республикалул чIявумиллатирттал культура хьхьичIуннай давриву бихьлахьисса захIматрахлу ва Культуралул зузалал кьинилийн, ДР-лул Культуралул министерствалул чулухасса ХIурматрал грамотарттан лайкь хьунни ва министерствалул биялдаралу зузисса идарарттал зузалт: Художествалул училищалул, ЧIава жагьилтурал, ОьрчIал ва Миллатрал библиотекарттал, Халкьуннал инструментирттал оркестрданул, ПаччахIлугърал хорданул, «Лезгинка», «Каспий», «Айланай» ансамбльлал, Республикалул Халкьуннал творчествалул къатлул, Культуралул ва искусствалул колледжрал ва чIявусса цайминнулгу. Грамотартту дуллуну махъ министрнал баян бунни цинявннан бахшишран Къалмукьнал паччахIлугърал къавтIаврил ва балайлул «Тюльпан» ансамбльданул концерт дикIантIишиву вара кьини.
Хъинну ххариру ва кьини ХIурматрал грамотарттан лайкь хьуминнавух бушиврия ххаллил­сса лакку душ, Лакрал райондалийсса Уриннал шяравасса Мусал душ МахIаммадова Уммугьалигу (Ума). Ума зий бур ДР-лул Культуралул министерствалучIасса Республикалул Халкьуннал творчествалул къатлул информационный обеспечениялул отделданул пишакарну. Цилла даву дакIнийхтуну ва кIулну дуллалисса лавайсса даражалул пишакар бакъасса, Ума бур инсаншиврул бутIа ххину буллусса, инсаннан ка-кумаг буван мудан хIадурсса душгу. Умал бувккуну бур ДГУ-рал востоковедениялул факультет. Му бувккуну хъунма хIал къавхьуну зун бувкIун бур РДНТ-лийн. Шиккува кIицI лаган, цилла агьаммур даврищал, Ума зий бур репетиторствалухагу, оьрчIахь аьраб ва ингилис мазурдил дарсру дихьлай.
МахIаммадова Умагу, ва кьини ХIурматрал грамотарттан лайкь хьусса махъсса цинявппагу жагьилталгу барча буллай, чIа учинну вайннан цIу-цIусса наг­радартту, бахшишру.
Вара кьини М. Горькийл цIанийсса Оьруснал театрдануву, республикалул культуралул цинявппагу зузалт­ран бахшишну, Къалмукьнал паччахIлугърал къавтIаврил ва балайлул «Тюльпан» ансамбльданул ккаккан дунни концерт.
Шадлугъ дайдирхьунни ДР-лул культуралул министр Зарема Буттаевал.
— ХIурмат бусса дустал, ххирасса уртакьтал! На ххарира зу цинявппагу, республикалул культуралул ва искусствалул цIаний къуллугъ буллалими, жулла пишакаршиврул аьмсса байрандалийн бавтIун бушиврия.
Культуралул зузалал кьини — му ххаллилсса байранни, жулла цачIусса хьхьичIуннайшивуртту ва ххувшавуртту кIицI лагансса кашир.
ДакI ххари хъанай дур жулва билаятрай культуралуву ва искусствалуву ялу-ялун чIяру хъанахъисса хъинчулиннайсса дахханашивурттая. Хьунадакьлакьисса захIматшивурттая нигь дакъа, зу дуллай буру ххаллилсса мероприятияртту, иширайну щаллу буллай буру зулва пикрирду, инсантуран ххаришивуртту дуллай…
Министрнал махъ лавхъун махъ, сахIналийн бувккунни Къалмукьнава бувкIсса коллектив «Тюльпан». Ва кьини Оьруснал театрданул залданувун бавтIминнаща бювхъунни Аьрасатнал ва дунияллул культурардал хазнану хьусса «Тюльпан» ансамбльданул къавтIавурттая ва балайрдая хIаз ласун.