ЗахIмат бувсса ва буллалисса агьулданул – хъудугьул, ризкьичинал, канил пагьму бусса усттарнал, буттал кIану ххирасса инсаннал мурадру, хияллу дузрайн буккан бувсса, оьрму захIмат лахъ буллай гьан бувсса зунтталчури 1-мур ЦIувкIуллал шяравасса Рамазаннул арс Къалмаев Оьмар.
Март зурул 30-нний оьрмулул 85 шин хьуссар цаннагу. Оьмар нину-ппугу ччянива ливтIуну ятинну ливчIссар, амма ятинна тIий къума-цIаншиврул буруккин бансса муттавагу къавхьуну бур мунан: кIива ссугу бухьувкун, минналсса бангу цанма багьлай бухьувкун, захIмат буллан багьну бур шяраваллил кIанттай даймур дуллай. ЗахIматрал фронтрай яхI буллалинавух яхI буллай. Хьхьу-кьини личIи къадурну, хъу-лухччинул давурттай зий. Дяъви къуртал хьувкуннив, къатлул маэшат гьаз бан, ссурвал ччаннай бацIан буван, мунан хIалтIилухун гьан багьну бур. Къалайчинал пишагу лавхьхьуну, ххуйсса усттар хьуну, кIинттул личIи-личIисса шагьрурдай зий икIайсса ивкIун ур. Инттухавай тIурча шяравунай зана хьуну, хъу-лухччинул давурттай зий ивкIун ур. Укун, хIарачат бувну, ссурвалгу чивун буккан бувну бур, цувагу ххуйсса къатта-къушлил заллу хьуну ур. Янна дуруххай машинартту бакьин бан лавхьхьуну, Узбакисттаннай ми бакьин буллайгу ивкIун ур. 35 шинал хьхьичIра МахIачкъалалив къатри ласурчагу, яхъанайрив уссар Къалмахъал Оьмар хIакьинугу шяравува зий, захIмат буллай. Кулпат Гьаписатлущал цивппа кунма захIмат ххирану тарбия бувссар шамагу арс. ДухIан багьссар ххирасса арс ШарапуттиннуцIа шаврил кьурчIисса хажалатгу. ХIакьину Оьмардул ва Гьаписатлул хъунмур ххаришивугу, тирхханнугу дур тIайла бавцIусса, хIарачат буллалисса, цахава мудангу хIурматрайсса арсурваврая ва миннал наслулия.
«Ттул ласнал буттал буниялттунгу яхIлувсса чувнал оьрму бувтун бур, ссурвавращал ятинну личIарчагу, хьхьара къадурну, чIивисса оьрчI захIмат буллай улувкьуну ур. Жулми оьрчIангу, Шарапуттиннул ва Закирдулминнангу му захIмат ххирашиврул, яхIлил, чувшиврул эбратри, мунал хIурмат жучIа хъунмассар, гьар ишираву арсурваврал чIарав авцIуссар, цащава шаймур бувссар», — тIий бур хъунама арснал кулпат Земфира.
Ттул шяравучунал, захIматрал ветеран Къалмаев Оьмардул бахшиширттаву вай гьантрай ххи хьуссар Ххувшаву ларсун 70 шин шаврил медальгу. Март зурул 5-нний Ваччав, Совет Союзрал кIийла Виричу АхIмад-хан Султаннунсса гьайкалданун гьанулул чару бихьлахьисса батIаврий, райондалул хъунама Саэд Сулаймановлул медаль дуллунни Оьмардунгу.
Барча вил юбилейгу, медальгу, ттул хъинсса шяравучу! ОьрчIал наслулул ххари улланнав ина, уттиния тинмайгу цIуллусса, рахIатсса оьрму хьуннав вил.
ПатIимат Рамазанова
