Итни кьини, март зурул 30-нний, хьунни МахIачкъала шагьрулул Ленинский райондалул судрал заседание. Муний Дагъусттаннал журналист Аьвдулмалик АхIмадилов оьрмулуцIа увсса Мурад Шуаьйбовлуй ва Ися АьвдурахIмановлуй тахсир ккак­лакисса ва миннан танмихI кьукьлакьисса хIукму бунни. Мурад Шуаьйбов 10 шин ва дачIиннуй, Ися АьвдурахIманов 8 шинай дуснакь бансса танмихI кьувкьунни судрал. Ми кIиягу цIакьсса низам дусса колониялий щябитан увкунни.

А. Аьбдуллаева
Шиккува кIицI лаган, судрал заседаниялий хьхьичIра икьрал дурну диркIун дунура, журналистал я сурат рищун, я бусласимур диктофоннайн чичин къабивтунни. Аьвдулмалик АхIмадилов ивкIусса иш Дагъусттаннай журналистал ливтIусса иширттаву цалчин ашкара бувмур бур.
Аьвдулмалик АхIмадилов ия «ХIакьикьат» кказитрал жаваб­лувсса секретарь ва «Согратль» кказитрал хъунама редактор. ДакIнийн бутан, ва оьрмулуцIа увссия 2009 шинал август зуруй. Ккулларду бивтсса Аьвдулмалик­лул жаназа ванал цалва машиналуву ляркъуссия.
Шинну ларгунни ва тахсиркаршиву аьч дан.
Журналист бивтун увтун хъунма хIал къавхьуну, полициялул зузалтрал бувгьуссия щак багьлагьисса Мурад Шуаьйбов ва Ися АьвдурахIманов.
Силистталул комитетрал сайтрай бувккуна ми мукIру хьуну, тахсиркаршиву цукун дурссарив бувсунни тIисса информация. Мурад Шуаьйбовлул бусласимунийн бувну, ванал му тахсиркаршиву дурну дур Аьвдулмаликлуйн сси буну, му цаятува тIааьн бакъасса, вагьабистурал чул бувгьумари тIисса хаварду ппив буллай уну тIий. Ися АьвдурахIмановгу ванацIун авкьуну, му тахсиркаршиврувух хIала хьуну ур.
Ва иширал хIакъираву силис­тталул органнал, АьФ-лул Уголовный кодексрал кIива статьялийн бувну (ст. 105 «Инсан ивчIаву» ва ст. 222 – «ЗакондалуцIун къабавкьуну ярагъ ябаву»), 2013 шинал декабрь зуруй сукку дурну дур ва иширал хIакъиравусса уголовное дело.