Дарбант шагьрулул 2 000 шин шаврил хьунийн республикалий, хIатта мунил кьатIувгума, дуллай бур чIярусса давурттив. Му юбилейран хасну ДР-лул Промышленностьрал, машлул ва инвестициярдал министерствалулгу баян бувну бивкIссар Дунияллул дянивсса заочнайсса конкурс-ярмарка «Лучшее изображение видов Дербента на изделиях народных художественных промыслов» цIанилусса. Муний 1-сса кIану бувгьуну, цалчинмур даражалул дипломран лайкь хьунни гьунар бусса лакрал балайчи, художник Жанна Кьурбанова. КIилчинмур даражалул диплом буллунни «Кизляр» ПП ООО-лун ва «Межгюльская ковровая фабрика» ГУП-ран, шамилчинмур даражалул дипломгу — «Гоцатлинский художественный комбинат» ГУП-ран, «Ляхлинская ковровая фабрика» ГУП-ран ва «Сулевкентская керамика» МУП-ран.
Ва конкурс-ярмаркалуву хьхьичIун ливчуминнан бахшишру дуллалисса батIаву хьунни уттигъанну му министерствалуву. Мунивух гьуртту хьунни ДР-лул промышленностьрал, машлул ва инвестициярдал министрнал цалчинма хъиривчу Казбек Кандауров, хъиривчутал Александр Гальмуков, Макьсуд Мусаев, Расул Гайрбеков, мукунма министерствалул управлениярттал ва отделлал каялувчитал.
Ва конкурсравух гьуртту хьуминнахь захIматсса экономикалул шартIирдаву дурсса давурттахлу барчаллагь тIутIисса махъ лавхъунни ДР-лул промышленностьрал, машлул ва инвестициярдал министр Юсуп Умавовлул.
— Жулла выставка ккаккан дурссар ПаччахIлугърал Думалуву, му лахъсса кьиматран лайкь хьунни. Зу гьуртту хъанахъисса цайми-цайми мероприятиярттайгу зул гьунардай хIайран хъанай бур инсантал. Му зул ххаллилсса давур, зул мусил карур. Хъинну ччива зу зулва-зулва предприятияртту ябувну, жулва чулухарив жугу шаймур банну, — увкунни министрнал.
Ххув хьуминнан наградарттугу дуллунни цалла министрнал.
— Дарбант шагьрулул юбилейрал масштабрал даву жучIара цамур хьушиву къакIулли. Ттун ттунма хъинну ххирар Дарбант шагьру ва Нарин-Къала цуппа. Ва конкурс душивугу махъату баян бувна, цурда ларгсса шиналла художник-прикладниктурал дянив баян бувну диркIнугу. Ванийнсса даву дуллай байбивхьуссияв ва шинал январь зуруй. Ци бухьурчагу, хъирив лавра конкурсрайннин къуртал дуван. Ттунма ххирасса Нарин-Къала бакъа ция, туну, ттулла даврил теману язи дугьантIисса. Му даву ванияр тиннайгу цайми-цайми иширттаву ишла дувантIишиву бувсунни, — тIий бур Жанна.
Жанна Кьурбановагу, махъсса цинявппагу барча буллай, чIа тIий буру ва бусравсса давриву гьарцагу дуллалимуниву тIайлабацIу, цIу-цIусса ххувшавуртту.
Лажин хIадур дурссар
Бадрижамал Аьлиевал
